سەرهلدانا ناكۆكیێن سیاسی ل شنگالێ ئەگەرێ ڤەنەگەریانا خەلكێ یە
راپۆرت:جوان بەرواری 
پشتی قەزا شنگالێ ژ دەستێن تیرۆرستێن داعشێ هاتیە رزگاركرن،ململانا سیاسی و ناكۆكییان ژلایێ پارتێن كوردی ڤە سەرهلدای و هەتا نۆكە بەردەوامن و بووینە ئەگەرێ سەرەكیێ ڤەنەگەریانا خەلكێ بۆ سەر جی و وارێن خۆ،هەروەسا پێتڤیە حكومەتا هەرێمێ و دگەل لایەنیێن نێڤ دەولەتی كار بۆ پاراستنا خەلكێ ژ هەر دوژمنەكی ل دەڤەرێ دا بكت ،دهەمان دەم دا هەول هاتینە كرن بۆ دابینكرنا پێتڤیێن وەرزێ هاڤینێ بۆ ئاوارەیێن ڤەگەریاین.
(قاسم شەمو سالح)ئاوارەیەكێ شنگالێ یە و ل پارێزگەها دهۆكێ ئاكنجی یە دبێژت:رەوشا ئاوارەیان ل سنوورێ پارێزگەها دهۆكێ ژ روویێ هاریكاریان ڤە گەلەك خرابە و رۆژ بۆ رۆژێ دگەل هاتنا وەرزێ گەرما هاڤینێ خراپ تر ژی لێ تێت،تایبەت پشتی دەستپێكرن و رزگاركرنا باژێرێ مووسل و ژمارەكا زۆر یا خەلكێ وێ ئاوارەبووین،ئەو هاریكاریێن دئێنە بەلاڤكرن ل سەر ئاواران دئاستێ پێتڤی دا نینن زۆربەیا رێكخراوان فوكسێن خۆ كرینە سەر ئاوارێن مووسلێ وان دا و ئەڤێن دی پشت گوه هاڤێتینە،لەورا پێتڤیە رەوشا ئاوارەیان بەرچاڤتر بێتە وەرگرتن،هەروەسا ئەگەرێ سەرەكیێ نە ڤەگەریانا خەلكێ شنگالێ بۆ سەر مالێن خۆ دزڤرت بۆ ناكۆكیێن ئالیێن سیاسی ل وێ دەڤەرێ كو ب چ رەنگان نە دبەرژەوەندیا مە دانە و ئاڤەدانكرن و قەرەبووكرن و دابینكرنا ئێمناهیێ و هندەك ئەگەرێن دی وەك ئاستێ پێتڤی بۆ خەلكێ دەڤەرێ نینە و پێتڤیە كارەسات و قوربانیدانا گەلێ ئێزدی ل سەر هەموو بەرژەوەندیێن سیاسی و جوگرافی و هەر تشتەكێ دی بت و رێز ل ئیرادا خەلكێ ئێزدی بێتە گرتن و نەبنە قوربانیێن ناكۆكیێن ئالیێن سیاسی.
هەروەسا چاڤدێرێ سیاسی (دلوڤان یاسین)گۆت:پشتی شەرێ تیرۆرستێن داعشێ و داگیركرنا شنگالێ ب هەزارەها كچ و ژنێن ئێزدی بوونە قوربانی و بازرگانی پێ دهاتە كرن، كو ئەڤە مەزنترین كارەساتا تراژیدی بوو كەفتیە دناڤا جڤاكێ ئێزدیان دا،لێ پشتی شنگال هاتیە رزگاركرن ژلایێ پارتێن كوردی ڤە ململانا سیاسی سەرهلدا و بوو ئەگەرێ ناكۆكیێ دناڤبەرا لایەنێن سیاسی و گەلێ ئێزدی بخۆ ژی دا ،لەورا ژی ل ڤێرە رەنگە ئاسویەكێ نەباش بت بۆ قەزا شنگالێ،ژبەركو ژلایێ سیاسی و كۆمەلایەتی ڤە ململانا هەرێمی ونێڤ دەولەتی وتایبەت باندۆرا ئیران و توركیایێ كەفتیە سەر ڤی جهێ ستراتیجی و دڤێت بكەڤتە بن كۆنترۆلا وان داكو ب ئاسانی دەربازی سووریێ ب بن و توركیا ژی ب هەمان شێوە هەولا ڤێ یەكێ ددەت،لەورا ب دیتنا من بەرەف ململانەكا سەربازی یا رەشبینتر دچت،پێتڤیە حكومەتا هەرێمێ و دگەل دەولەتێن نێڤ دەولەتی هاریكاریا قەرەبوویا ڤێ كەیسا گەلێ ئێزدی بدەن ب هەموو لایان ڤە كار بۆ بێتە كرن و جارەكا دی ڤەگەرن سەر جی و وارێن خۆڤە و بێنە پاراستن ژ هەردووژمنەكی،داكو جارەكا دی كارەساتێن ب ڤی شێوەی دووبارە نەبنەڤە و گەلێ ئێزدی نەبتە قوربانیێ ڤان كۆمكوژیان.
تُتاح هذه الصورة أيضا في: کوردی