پشتی خۆ ڤەكێشانا پەكەكێ ئاوارە دێ ڤەگەرنە شنگال
تۆرا لالش یا راگەهاندنێ/كاروان باعەدری
ل رێككەفتی(23/3/2018)هێزێن پەكەكێ دراگەهاندنەكێ دا بریارا خۆ ڤەكێشانێ ژ سنوورێ شنگالێ راگەهاند و پشتی بجهئینانا ڤێ بریارێ،ئاوارە دێ ڤەگەرنە شنگال و پرۆسا ئاڤەدانكرنێ دێ دەست پێ كت،هەروەسا خەلكێ ئێزدی و ئەرەب ژی داخواز دكن ئیدارا شەرعی یا شنگالێ ڤەگەرت و هێزێن پێشمەرگەی وان بپارێزێن.
پەیڤدارێ كەجەكێ(سەرحەد ڤارتۆ)دیاركر،كۆما جڤاكێن كوردستانێ بریار دایە خۆ ژ سنوورێ شنگالێ ڤەكێشت و ئەو دێ بریارێ ب جهئینن،هەربریارەكا سەركردایەتیا مە بدەت دێ پابەند بین.
دڤی دەربارەی دا بەرپرسێ لقێ شنگال یێ پارتی دیموكراتی كوردستان(قادر قاچاغ) دیاكر،پشتی گەفێن توركیا بۆ سەر شنگالێ ژبەر هەبوونا پەكەكێ،خەلكێ شنگالێ و زەلامێن ئایینی و سەرۆك هۆزێن ئێزدی، داخواز ژ پەكەكێ و حەشدا شەعبی كریە ژ دەڤەرا وان دەركەڤن و چۆل بكن،بەلێ هەتا نهۆ ل شنگال ماینە و خۆ ڤەنەكێشایە،دەنگۆیەك هەیە كو هندەك ل باكوور و رۆژئاڤایێ كوردستانێ ڤەكێشاینە،بەلێ هێشتا پەكەكە لێ ماینە،ل شنگال ڤالاتیا ئیداری هەیە و ئەو ئیدارا هەی ژی شەرعی نینە و هاریكاری ناگەهنێ، دەزگەهێ خێرخوازیێ بارزانی دوو جاران هاریكاری بۆ رەوانەكرینە،پەكەكێ رێ نەدا هاریكاریێن پێتڤی بۆ خەلكێ دەڤەرێ بێنە رەوانەكرن و راستی رێیێن دی نینن هاریكاری بۆ بچن،لەوا بارودۆخێ وان زۆر خراب،ئەگەر ئەو راست دبێژن و بەرژەوەندیا كوردێن ئێزدی دڤێت،بلا دەڤەرێ چۆل بكن و تووشی هێرشا توركیا نەبن و زیان ب وی خەلكی نەكەڤت،بەلێ هەتا نهۆ مە نزانیە شنگال بجێهلا بت،ئاشكەراكرژی هەتا پەكەكێ ل شنگال بمینت كوردێن ئێزدی دمەترسیێ دا دێ مینن و دوور نینە جارەكا دی تووشی جینۆسایدێ ببن،خەلكێ ئێزدی و ئەرەب ژی داخواز دكن ئیدارا شەرعی یا شنگالێ ڤەگەرتە شنگال و هێزێن پێشمەرگەی وان بپارێزێن.
سەبارەت ڤەكێشانا هێزێن پەكەكێ ل سنوورێ شنگالێ قایممقامێ شەرعی یێ شنگال(مەحما خەلیل)دبێژت:هەبوونا پەكەكێ ل شنگال مەترسی بوو بۆ سەر سەدان وەلاتیێن ئێزدی هەلبەت توركیا بریار دابوو ژبەر هەبوونا پەكەكێ بێتە ناڤ شنگالێ ئەڤە چەندە ئەگەر بوو جارەكا دی ئێزدی ببنە قوربانی،هەروەسا بریارا پارتا كرێكارێن كوردستانێ پەكەكێ بۆ خۆ ڤەكێشانێ ژ دەڤەرا شنگال، بۆ دوو ئەگەرێن سەرەكی ڤەدگرت ئەگەرێ ئێكێ ئەوە كو وەلاتێ توركیا دێ پەكەكێ كەنە ئارمانج ئەگەر ل شنگال بمینت و گەفێن هێرشكرنێ لێ دكن،ئەگەرێ دووێ ژی رێككەفتن هەیە ل ناڤبەرا پەكەكێ و حكوومەتا بەغدا و توركیا دا،هەلبەت دەركەڤت ژی كو بەغدا هاریكاری و پشتەڤانیا پەكەكێ دكت و هەر ب بریارا بەغدا ژی ژ سنوورێ شنگال ڤەدكێشن،تەكەزكر ژی كو ئێك ژ ئەگەرێن ڤەنەگەریانا خەلكێ شنگال،بۆ هەبوونا هێزێن پەكەكێ ل دەڤەرێ دا ڤەدگەرت،ئەگەر بریارا خۆ ڤەكێشانێ بێتە بجهئینان،ژ چەند لایان ڤە دێ كاریگەری هەبت،ژ وانا ژی ڤەگەریانا بەشەكێ زۆر یێ ئاواران و دەستپێكرنا پرۆسا ئاڤەدانكرنا دەڤەرێ،كو هەتا نهۆ ژبەر پەكەكێ رێگری هەبوویە.
پشتی چەندین جاران حكوومەتا هەرێما كوردستانێ و ئیدارا خۆجها شنگال و كوردێن ئێزدی،داخواز ژ پەكەكێ كربوو ژ شنگالێ ڤەكێشن بەلێ رەت دكرن،پاش توركیا چەندین جاران گەفێن سەربازی كرین بۆ سەر شنگالێ ژبەر هەبوونا پەكەكێ ل دەڤەرێ دا، پەكەكێ دراگەهاندنەكێ دا راگەهاند كو ئەو دێ ژ شنگالێ خۆ ڤەكێشن.
تُتاح هذه الصورة أيضا في: کوردی