گەنجێن ئێزدی بۆ پاراستنا مەزارگەهێ شەرفەدین شەرێ مان و نەمانێ ل دژی داعش كرن
تۆرا لالش یا راگەهاندنێ/رائد غانم
مەزارگەهێ شەرفەدین پشتی لالشا نوورانی گەلەك پیرۆزیا خۆ ل نك ئێزدیان هەیە،ل كارەساتا شنگالێ ل(3/8/2014)ێ تیرۆرستێن داعش(17)جاران هەول دا مەزارگەهی ب پەقینن،بەلێ گەنجێن ئێزدی شەرێ مان و نەمانێ ل دژی داعش كرن بۆ پاراستنا وی و نەهێلان بۆستەكێ ژی پێشڤەبچت،نهۆ دەڤەرا شەرفەدین ل بن كۆنترۆلا هێزێن پێشمەرگەی دایە و رەوش لێ ئارامە و خەلك ڤەگەریاینە سەر مال و حالێ خۆ ڤە،لێ نەبوونا خزمەتكاریا خەلك بێزاركری یە.
فەرماندێ فەرماندەیا شنگال یا هێزێن پێشمەرگەی(قاسم شەشۆ) وی دەمی سەرپەرشتیا وان گەنجێن ئێزدیا دكر یێن شەر ل دژی داعشێ دكرن دیاركر،دباوەریا ئێزدیان دا شەرفەدین دینێ ئێزدیا یە و مەزارگەهی گەلەك پیرۆزیا خۆ هەیە ل نك ئێزدیان پشتی لالشا نوورانی مەزارگەهێ شەرفەدینە،سالانە توافا ڤی مەزارگەهی ل(18/8)دئێتە گێران و ب هەزاران خەلك پشكداریێ تێدا دكن و هەر كەسەكی ئۆمێدەك هەبت خۆ دهاڤێتە قوبا شەرفەدین دا مراز وی ب دەست ڤە بێت ئەڤە ژ ئالیێ ئایینی ڤە،وەختێ وان گەنجێن ئێزدی بەرخودان كرین و غیرەت كێشاین وی دەمی شەرفەدین هاریكاریا وان خۆرتا كر،وان خۆرتێن وی دەمی خۆ گەهاندینە بەر شەرفەدین شەرێ مان و نەمانێ ل دژی داعش كرن و نەهێلان داعش بۆستەكێ ژی پێشڤەبچت و (17) جارا داعش هەول ددا بێن مەزارگەهی پەقینن وان گەنجا نەهێلا داعش ب ئارمانجا خۆ شاد ببت و بسەر شۆری ڤە دزڤرین،وی وەختی پتر ژ(60) هەزار كەسی هاتنە بەر شەرفەدین و ل هەمان دەم دا ل وێ رێیێ را قورتال بوون و خۆ گەهاندنە دەڤەرێن ئارامێن هەرێما كوردستانێ،پشتی دەمەكی درێژ ژ بەرخودانا وان گەنجێن ئێزدیا،پێشمەرگێن كوردستانێ ب سەرپەرشتیا راستەوخۆ یا سەرۆك بارزانی هێرشی تیرۆرستێن داعشێ كرن و ناوچەداریا سنوونێ و گوندو و كۆمەلگەهێن بسەر ڤە رزگاركرن،پشتی رزگاركرنا ناوچەداریا سنوونێ فەرماندەیەك ب بریارا سەرۆك بارزانی ژ خەلكێ شنگالێ را هاتە دامەزراندن و (8) هەزار پێشمەرگەیان پێك دهات،ئێكسەر ساترێ پێشیێ گرتن و لسەر خەباتا خۆ بەردەوام بوون و هەر ژ گوندێ حەیالێ و جەدالێ هەتا گوندێ حەردان كو درێژاهیا پتر(65) كیلۆمەترا بخۆ ڤە گرت بوون و ب دەهان جاران هێرشێن داعشێ تێك دشكاندن،هەروەسا پشتی خیانەتا(16)ی ئوكتۆبەرا سالا(2017)ێ و هاتنا حەشدا شەعبی دیسان وان گەنج و پێشمەرگا رێیا بەرخودانێ هەلبژارتن و پاراستنا مەزارگەهێ شەرفەدین دكن و گەلەك جاران حەشدا شەعبی ژی هەول دایە بێنە بەر شەرفەدین لێ وان پێشمەرگا رێ نەدایا وان و دەڤەرا شەرفەدین ب هێلا سۆر دزانن و هەتا نهۆ ژی ئەو پێشمەرگە لسەر ئەركێ خۆ دبەردەوامن و كارێ پێشمەرگایەتیێ دكن و ئامادەنە پاراستنا هەر بۆستەك ژ ئاخا كوردستانێ بكن و بپارێزن.
وەك مجێورێ مەزارگەهێ شەرفەدین (شێخ ئیسماعیل) ئاماژێ دكت كو كەس ب مەرەما هێرشكرنێ لسەر چیایێ شنگالێ بسەرنەكەفتیە و گۆت:شەرفەدین دینێ هەموو ئێزدیایە و (74) فەرمان بسەرێ ئێزدیان دا هاتینە و هەر ریۆرەسمێن خۆ یێن ئایینی نەهێلاینە،هەر كەسێ هێرشی شنگال و چیایێ وێ كربت شكەستن خواریە،داخوازێ ژ كوردێن ئێزدی دكەم كو هەموو ببنە ئێك دەست سەبەقەیەكا قەول هەیا و دبێژت:(ئەگەر دو برا كرا تەبایی وێ چیا دانن سەر چیایی)،بلا مرۆڤ لسەر ئاخا خۆ بمرت نە ل غەریبیێ چنكو شام شەكرە لێ وەلات شیرینترە،قوبا ئێكێ یا شەرفەدین ل سالا (1274)ێ هاتە ئاڤاكرن و توافا شەرفەدین سالانە ل(18/8)دئێتە گێران بەری توافێ خەلك ب رۆژەكێ دچنە بەر شەرفەدین وێ رۆژێ شیلانا شەرفەدینە رۆژا ل دوڤدا توافە و پەریا شەرفەدین دبنە سەر بیرا شەرفەدین مۆر دكن و پشتی هنگی پەری دئێتە سوار كرن و هەر كەسەكی بڤێت خێرا خۆ بكت دێ زیارەت بت و هیڤیێن خۆ ژ شەرفەدین خوازت دا مرادا وی ب دەست ڤە بێت،هەروەسا ریۆرەسێن ئایینی ژی دئێنە گێران و هەموو رۆژێن چارشەمبوویێ فتیل لبەر مەزارگەهی دئێنە ڤێخستن و رۆژانە خەلك ژی قەستا میرگەها شەرفەدین دكن.
(شەمۆ رشۆ) وەك نۆژدار و رێڤەبەرێ بنگەهێ ساخلەمیێ ل دەڤەرا شەرفەدین وی ژی مینا هەموو خۆرتێن ئێزدیا لبەر مەزارگەهێ شەرفەدین خزمەتا وی خەلكی دكر ژلایێ ساخلەمیێ ڤە و ئاشكەراكر،ل رۆژا(3/8/2014)ێ رۆژا كارەساتا شنگالێ مە خزمەتا پێشمەرگەی و خەلكێ خۆ دكر هەر چەندە ل وی وەختی دا دەرمان نەبوون ژی لێ هندەك تشتێن ساخلەمیێ ل نك من مابوون و چارەسەری بۆ وی پێشمەرگەی دكر بۆ ماوەیەكی درێژ هەتا كو دەڤەر نەهاتە رزگاركرن،پشتی پێشمەرگەی ل(19/12/2014)ێ ناوچەداریا سنوونێ رزگاركری و رێ هاتیە ڤەكرن دەرمان هاتنە دابینكرن و بەردەوامی دا كارێ خۆ و هەموو گاڤا لگەل پێشمەرگەی بوون ل هەموو شەران دا و هەتا نهۆ ژی بەردەوامن لسەر كارێ خۆ بۆ خزمەتكرنا خەلكێ دەڤەرێ.
دەربارەی خووندنێ رێڤەبەر و مامۆستایێن قوتابخانا شەرفەدین دبێژن،هەتا نهۆ قوتابخانەك ل دەڤەرا شەرفەدین نینە و نەهاتیە ئاڤاكرن و رەوشا قوتابیان یا ب زەحمەتە و نكارن خووندنا خۆ بەردەوام بكن،ژبەر نەبوونا جی لەوما داخوازێ ژ جیێن خێرخوازی دكەین قوتابخانەیەك بێتە ئاڤاكرن دا قوتابی ژ خووندنێ بێ بەهر نەبن و نەبوونا مامۆستایان ژی بوویە ئاریشە،هیڤی دكەین پەروەردە ب چاڤەكی مەزنتر بەرێ خۆ بدەنە قوتابخانا شەرفەدین.
(كەمال سەیدۆ) ئاكنجیێ دەڤەرا شەرفەدینە بەحسێ ژیانا ل دەڤەرێ دكت و ئاشكەراكر،ژیان ل دەڤەرێ وەكی بەرێ یە لێ نەبوونا خزمەتكاریا خەلك یێ بێزاركری و خەلكێ دەڤەرێ ب تەمامی ڤەگەریاینە سەر مال و حالێ خۆ و رەوشا دەڤەرێ یا ئارامە و ل بن كۆنترۆلا هێزێن پێشمەرگەی دایە و خەلك یێ ئارامە ل دەڤەرا شەرفەدین،لێ كێماسی ل دەڤەرێ هەنە داخوازێ دكەین بێنە چارەسەركرن داكو ژیانا خەلكێ خۆشتر لێ بێت وەك ئاڤاكرنا قوتابخانەكێ.
تُتاح هذه الصورة أيضا في: کوردی