شێخ شامۆ:هەلسەنگاندنا بنگەهێ لالش ژبال سەماحەتا بارزانی ڤه دەستكەفتەكی مەزنێ دیرۆكی یە
تۆرا لالش یا راگەهاندنێ/دهۆك 
سەرۆكێ دەستەیا بلندا بنگەهێ لالش یێ رەوشەنبیری و كۆمەلایەتی ل دهۆكێ دووپاتكر كو سەركەفتنا پرۆسا هەلبژارتنێن پەرلەمانێ كوردستانێ سەركەفتنەكا مەزنە بۆ پرۆسا دیموكراسیێ ل كوردستانێ،جەخت كر كو ئەو دەنگێن پێتڤی یێن بەربژێرا ئێزدی هەدیا موراد بدەستڤەئیناین ب هاندان و پشتەڤانیا سەركردایەتیا سیاسی بوو ب تایبەت سەماحەتا سەرۆك مەسعود بارزانی،هەروەسا دیاركر پەیڤا دیرۆكی یا سەرۆك بارزانی پێشكێشكری ل كۆمبوونا تایبەت لگەل ئەندامێن بنگەهێ لالش و كۆمەكا رەوشەنبیری ئێزدیان و رۆلێ بنگەهی هەلسەنگاندی دەستكەفتەكی دیرۆكی یێ مەزنە بۆ بنگەهێ لالش.
د كۆمبوونا ئاسایی یا دەستەیا بلندا بنگەهێ لالش ئیرۆ رۆژا دووشەمبوویێ 15ی ئوكتۆبەرا 2018ێ ب ئامادەبوونا بەرێز”شێخ شامۆ”سەرۆكێ بنگەهێ لالش و گشت ئەندامێن دەستەكا بلند و سەرۆكێن تایێن لالش،شێخی ئاماژەكر كو بدەستڤەئینانا”نادیا موراد” خەلاتێ نۆبل یێ ئاشتیێ دەستەكەفتەكی مەزنە بۆ گەلێ كوردستانێ ب گشتی و جڤاكێ ئێزدی ب تایبەتی.
دلایەكی دی یێ كۆمبوونێ دا شێخی دیاركر:”ئیسالە رێك و پێكی و رێكخستن بۆ گێرانا رێورەسمێن جەژنا جەمایێ ل پەرستگەها لالش هەبوو،هەروەسا ئاماژە دا سەرەدانا گرنگ یا بەرێز”سیروان بارزانی” بۆ پەرستگەها لالش ل دەمێ رێورەسمێن جەژنێ”.
هەر دكۆمبوونێ دا سەرۆكێ بنگەهێ لالش پیرۆزباهی ل بەرێز”سەیدۆ چەتۆ”كر ب هەلكەفتا وەرگرتنا پۆستێ سەرۆكێ جڤاتا پارێزگەها مووسل،هەروەسا پیرۆزباهی ل گشت ستافێ رۆژناما دەنگێ لالش كر ب هەلكەفتا بۆرینا 14سالان لسەر دامەزراندنێ و رۆلێ كارا یێ رۆژنامێ گێرایی ل ئاستێ جڤاكێ ئێزدی بلند نرخاند.
ژ ئالیەكی دی ڤە بەرێز”شێخ شامۆ”داخواز ژ سەرۆكێن تایێن لالش كر دەرگەهێ ئەندامبوونا نوو بۆ كەسێن دڤێن پێشكێش بكن ڤەكن ب رێیا داگرتنا فۆرمەكا تایبەت و ژڤانێ گرێدانا كۆنگرێ چاردێ یێ بنگەهی دەست نیشان بكن.
ل داویا كۆمبوونێ ب درێژی بەحس ل گرنگترین بزاڤ و چالاكیێن تایی و نڤیسینگەهێن لالش ل ماوێ بۆری دا هاتە كرن.
تُتاح هذه الصورة أيضا في: کوردی