پەنابەرێن ئێزدی ژ سووریا ڤەدگەرنە شنگالێ
ئەڤرۆ نیوز:
قایمقامێ قەزا شنگالێ راگەھاند، ل سالا ٢٠١٤ دەمێ کارەساتا شنگالێ پەیدابووی، نێزیکی ھزار کوردێن ئێزدی بەرەڤ وەلاتێ سۆریا برێکەفتن و ل وێرێ د کەمپەکێ دا ب ناڤێ (مخیم نوروز) ئاکنجی بووینە و رەوشا وان یا ژیارێ گەلەک یا بێسەرۆبەرە و نھا ژ بەر تێکچوونا رەوشا رۆژئاڤای، جارەکا دی ئەو پەنابەرە ڤەگەریانە ھەرێما کوردستانێ و ھندەک ژی جارەکا دی چوونە شنگالێ.
مەحما خەلیل، قایمقامێ قەزا شنگالێ، بۆ ئەڤرۆ نیوز دیار کر، ماوێ زێدەتر ژ چوار سالان بویە نێزیکی ٥٠٠٠ کوردێن ئێزدی چووبوونە سوریا و ھندەک ژی ل کەمپا نەوروز دا ل رۆژئاڤایێ کوردستانێ دا دژیان و رەوشا وان گەلەک یا خراب بوو و ژین و ژیارا وان ژی گەلەک یا نەباش بوویە و نھا ژی پشتی رەوشا رۆژئاڤایێ شنگالێ تێکچوویە و بەرەڤ خرابتربوونێ ڤە چوی، ئەو کوردێن ئێزدی ھەموو یێ ڤەدگەرنەڤە و ھندەک ژی وان جارەکا دی چووینە شنگالێ سەر مال و مۆلکێن خوە و ھندەک ژی ڤەگەریاینە ھەرێما کوردستانێ.
مەحما ئاشکرا ژی کر کو رەنگە د ڤێ مەھێ دا ھەموو کوردێن ئێزدی کەمپا نەوروز ل رۆژئاڤای چولبکەن و بگەھنە شنگال یان ژی ھەرێمێ، بەلێ ئەو کوردێن ئێزدی یێن چووینە شنگال د رەوشەکا گەلەک خراب دانە و خانیێن وان ھەموو ژلایێ داعش ڤە ھاتینە خرابکرن و بێ مال و حال و بێ خزمەتگۆزاری ماینە ل شنگال.
تُتاح هذه الصورة أيضا في: کوردی