چارەمین ڤیستەڤالا شنگال یا فلكلۆر و هۆنەری هاتە گێران
تۆرا لالش یا راگەهاندنێ/دهۆك
ب چاڤدێریا بەرێز “شێخ شامۆ” سەرۆكێ دەستەیا بلندا بنگەهێ لالش یێ رەوشەنبیری و كۆمەلایەتی،چارەمین ڤیستەڤالا شنگال یا فلكلۆر و هۆنەری ب چەندین برگێن هەمەجۆر هاتە گێران.
ل رۆژا 23ی تەمووزا 2019ێ ل هۆلا رواند ل قەزا زاخۆ و ب ئامادەبوونا نوونەرێ لقێ 17یێ پارتی دیموكراتی كوردستان و بەرپرسێن فەرمانگەهێن حكومی و ئەمنی ل شنگال و زاخۆ و رێڤەبەرێ كەمپا چەم مشكۆ و دای شەمێ دیرو ژپێش خێزانێن جانگۆریان ڤە و جەماوەرەكی زۆر،بنگەهێ لالش تایێ شنگال و نڤیسینگەهێن بسەرڤە ب هەڤكاری دگەل گرۆپێ هیڤی یێ خۆبەخش چارەمین ڤیستەڤالا شنگال یا فلكلۆر و هۆنەری گێران.
ل پێشیێ وەك رێزگرتن بۆ گیانێ جانگۆریێن كوردستانێ ئامادەبوویی خۆلەكەكێ سەكنین،ل پێرا بەرێز “شێخ شامۆ” سەرۆكێ دەستەیا بلندا بنگەهێ لالش یێ رەوشەنبیری و كۆمەلایەتی پەیڤەك پێشكێشكر و تێدا بەحس ل هەلویستێ جوامێرانە یێ خەلكێ زاخۆ هەمبەر برایێن وان یێن ئێزدی كر،زێدەباری رۆلێ بنگەهێ لالش بۆ پاراستنا كلتۆر و فلكلۆر و پشتەڤانیا بنگەهی بۆ هۆنەرمەندان.
ژلایەكی دی ڤە بەرێز”حەلال خرمش”پەیڤا بنگەهێ لالش تایێ شنگال و گرۆپێ هیڤی یێ خۆبەخش پێشكێشكر و بەحسێ دەستپێكا ڤیستەڤالێ ل خۆلێن بۆری دا كر.
پاشی ڤیستەڤالێ ب چەندین برگان دەستپێكر كو تێدا هەلبسەتەكا هۆزانڤان “ئەدریس سەرحوكی” و هۆزانڤانا كچ “سامیا شنگالی” هاتن خووندن،پاش سمینارەك لسەر كلتۆرێ كوردی ژلایێ “سەعید جردۆ”ڤە هات پێشكێشكرن.
دبرگەیەكا دیتر دا چەندین ستران ژبال هۆنەرمەندان(خەلەف حالی،برجون،خەلو،جەلۆ،سەبری،تەحسین،عەلی،خەلەف شنگالی،مستێ)ڤە هاتن گۆتن،پاش گۆڤەندكا مللی یا كەڤنا شنگالێ ژبال گرۆپێ هیڤی هاتە پێشكێشكرن،ل پێرا گوهدانا كۆمەكا سترانێن فلكۆری و داستانێن قارەمانانە ژبال هۆنەرمەندان ڤە هاتە كرن.
هەر دڤێ ڤیستەڤالێ دا پێشانگەهەكا وێنان لدۆر ئازارێن ئێزدیان و ژیان ل ئاوارەیێ دا هاتە ڤەكرن،هەروەسا پێشانگەهەكا دی لدۆر قۆناغێن ژیانا ئێزدیان هاتە ڤەكرن.
دئالیەكی دی دا كۆمەكا كارێن دەستی یێن فلكۆرێ شنگال ژبال گرۆپێ هیڤی ڤە هاتنە نمایشكرن.
ل داویا ڤیستەڤالێ دەیكا جانگۆریا دای شەمێ ب ئارمێ ڤیستەڤالێ ژبال بەرێز شێخ شامۆ ڤە و تەڤ پشكدار ژبال ئامادەبوویان ڤە هاتنە خەلاتكرن.
تُتاح هذه الصورة أيضا في: کوردی