بنگەهێ لالش جەژنا سەرسالێ پیرۆز دكت:جەژنێن مە یێن كەڤنار پشكەك ژ ناسنامەیا رەوشەنبیری و ئاینی و نەتەوەی یە
ب هەلكەفتا هاتنا جەژنا سەرێ سالا ئێزدیان(سەرێ سال_چارشەمبوویا سۆر)،جوانترین و گەرمترین پیرۆزباهیان ئارستەی تەڤایا ئێزدیان ل كوردستانێ و عێراقێ و جیهانێ دكەین،هیڤیخوازن سالا تەناهی و ئارامی و خێر و خۆشیێ بە بۆ هەموو مرۆڤایەتی و ئێزدیان ل وەلات و ژ دەرڤەی وەلاتی.
و ب هەلكەفتا ڤێ جەژنێ كو دبتە ئێك ژ كەڤنترین جەژنێن ئێزدیان،ئەم دووپاتێ پێكڤەگرێدانا جەژنێن خۆ دكەین كو پێتڤیەكا دیرۆكی و هەڤچەرخە،ژبەركو ئەڤ جەژن خودان فەلسەفە و ناڤەرۆك و درێژەپێدانا دیرۆكی یا ئێزدیان ل خاكا وان یا كەڤنار و دێرین خویا دكە،و ئێك ژ كەڤنترین پێكهاتەیێن كو ل ڤی عەردی بنەجهبووین.
و ئەم دبینن كو ئەڤ جەژنێن مە،تایبەت جەژنا سەرێ سالا ئێزدیان دبە پشكەك و ئالیەكێ گرنگ ژ ناسنامەیا مە یا رەوشەنبیری و ئاینی و نەتەوەی،ئەم پشت راست دكەین هەر ئێكی بزاڤا شێواندنا بیروباوەرێن مە یێن ئاینی و ئینتیمائا نەتەوا مە یا كوردی یا رەسەن كری چارەنڤیسێ وان شكەستن و بێ هیڤی بوون بوویە،ژبەركو راستیا رۆن و ئاشكەرا ب دەڤێ كۆمەكا كەسێن تۆز و با نائێتە ڤەشارتن.
كار و كریاران سەلماند كو ئینتیمائا مە بۆ كوردستانێ وەكو خاك و مللەت ئنتیمائه‌كا سروشتی یە،و بێ كوردستانا ئازاد و گەش و ئارام و بهێز ،پێشەرۆژا ئێزدیان ل رۆژهەلاتا ناڤەراستا یا دناڤ پری بوویەران دا نابە.
ژبەركو ل جەژنا سەرێ سالا ئێزدیان دبت خرڤەبوونێن خێزانی و جڤاكی و جەماوەری پەیدا بن،ئەم داخوازێ ژ هەموو خەلكێ خۆ دكەین ل هەر جیەكی بن پێتڤیە رێنمایێن تایبەت ب بەرنگاربوونا ڤایرۆسێ كۆرۆنایێ ل بەرچاڤ وەرگرن و رێگریێ ل بەربەلاڤبوونێ بگرن،ب رێیا پێگیریكرنێ ب رێكارێن ساخلەمیێ یێن دئێنە دەركرن و ب هەر رەنگەگی دشیان دا بت تێكەلیێ و ب تایبەت ل دەڤەرێن گرتی نەكەن.
سالا خێر و خۆشیێ بە بۆ تەڤایا ئێزدیان و هەموو مرۆڤایەتیێ
دەستەیا بلندا بنگەهێ لالش یێ رەوشەنبیری و جڤاكی/دهۆك
13ی نیسانا 2021
تُتاح هذه الصورة أيضا في: کوردی