چالاكڤانەكێ ئێزدی:ژمارا ئێزدیان ل عێراقێ ل كێمیێ دایە
تۆرا لالش:
چالاكڤانەكێ ئێزدی دیاركر،كو خۆشبەختانە تا نهۆ بتر ژ دەهـ وەلاتێن جیهانێ كۆمكوژیا ئێزدیان ب جێنۆساید ناسكرینە و كەیسا ئێزدیان یا چالاكە ل ئاستێ جیهانێ،ئاشكەراكر ژی كۆچبەربوونا ئێزدیان بۆ دەرڤەی وەلاتی خالەكا ب مەترسیە چنكو ل ئایندەی ژمارا ئێزديان دێ گەلەك كێم بت ل عێراقێ.
چالاكڤان(كامل خودێدا)بۆ رۆژناما دەنگێ لالش دیاركر،ژ سالا (2014)ێ تا نهۆ گەنج و لاو ئافرەت و هەموو تەخ و چینێن ئێزدیان ل جیهانێ لگۆر شیانێن خۆ ب بەردەوامی كار لسەر خزمەتكرنا كەیسا ئێزدیان دكن و پێتڤیە ب باشی كار لسەر ناساندنا كۆمكوژیا ئێزدیان بكەین و مفایی ژێ وەربگرین،خۆشبەختانە تا نهۆ بتر ژ دەهـ وەلاتێن جیهانێ كۆمكوژیا ئێزدیان ب جێنۆساید ناسكرینە و كەیسا ئێزدیان یا چالاكە، لێ د هەمان دەمدە هەرچەندە ئێزدیان لۆبیەكێ مەزن ل جیهانێ نینە و لێ ناسكرنا كۆمكوژیێ ژلایێ ئێزدیان ڤە ل جیهانێ ب شێوەیەكی خورت ب رێڤە دچت، هەروەسا پێتڤیە هەموو رۆژێن مە هزركرن بت بۆ خزمەتا ئێزدیان و ئێزدیاتیێ و پێتڤیە هەموو جیێن شۆلەژێ یێن ئاینی و حكومی و رەوشەنبیری یێن ئێزدیان ل هەرێما كوردستانێ و عێراقێ و ل جیهانێ هەردەم د خزمەتا كەیسا ئێزدیان و ئێزدیاتیێ دابن و هاریكار و پشتەڤانێ هەڤ بن.
لدۆر كۆچكرنا گەنجێن ئێزدی چالاكڤانی گۆت:كۆچكرن دیاردەیەكا جیهانی یە لێ دناڤ ئێزدیان دە بۆ چەند ئەگەران دزڤرت ژوان ژی نەبوونا ئێمناهیێ و كێمی یان سستیا خزمەتگوزاریان،لەورا پێتڤیە زێدەتر هەردوو حكومەتێن هەرێما كوردستانێ و حكومەتا عێراقێ و كاربەدەستێن ئێزدیان ب هەڤرا كاربكن د هەر بیاڤەكی دە،چنكو خەلكی پاشەرۆژەكا گەش بخۆ و زارۆكێن خۆ دڤێت،دیسان داخوازێ ل وان ئێزدیێن كۆچكرینە وەلاتێن جیهانێ دكەین خۆ دگەل كلتۆرێ وان وەلاتان بگونجینن و ب خووندنێ كلتۆر و هەبوونا خۆ بپارێزن و زارۆكێن خۆ ببەنە بەرخووندنێ و هاریكار و پشتەڤان بن دگەل وان داكو نفشەكێ بەرهەمهێنەر چێببت،بۆ ڤێ چەندێ ژی پێتڤیە مال و كۆمەلێن ئێزدیان د پشتەڤان و هاریكاربن،هەروەسا كۆچبەربوون بۆ ئێزدیان خالەكا ب مەترسیە چنكو ل ئایندەی ئێزدی دێ گەلەك كێم بن ل عێراقێ هەروەسا ژی هەر خێزان و گەنجەكێ ئێزدی لدەما ل وەلاتەكێ دن ئاكنجی دبت پێتڤیە زێدەتر خۆ ماندی بكت و كلتۆرێ خۆ بپارێزت.
هەروەسا دیاركر،پەیڤا وی بۆ گەنجێن ئێزدی ئەوە ئاستەنگی پارچەیەكا ژ ژیانێ لێ پێـتڤیە ل داویێ لسەر ئاستەنگان زالبن و سەركەڤن و مفایی ژێ ببینن، ژبەركو خووندن تاكە رێیا سەركەفتنێ یە پاشەرۆژا ئێزدیان پێڤە گرێدایی یە و ئەم وەك ئێزدی ب خووندنێ دێ پێشكەڤین د هەموو بیاڤێن ژیانێ و جڤاكی دە و هەرچەندە گەلەك ئاستەنگ ل پێشیا مەنە لێ ب خووندنێ دێ دەربازكەین،و دێ پاشەرۆژەكا گەش ل پێشیا مللەتێ مەبت،لێ ئەگەر پووتێ نەدەینە كەرتێ خووندنێ دێ ئاستەنگێن دژوار و بگرە دژوارتر ئێنە پێشیا مە.
چالاكڤان و ئەندازیار كامل خودێدا ل سالا (1971)ێ ل گوندێ سینا ل دەڤەرا قاییدیا ژ دایكبوویە،قۆناغێن خووندنا سەرەتایی ل قوتابخانا گوندێ سینا و ناڤنجی ل گوندێ شاریا و ئامادەیی ل سەنتەرێ پارێزگەها دهۆكێ ب داوی ئینایە و ل سالا(1993)ێ باوەرناما بەكالۆریۆسێ ل زانكۆیا مووسل پشكا ئەندازیاری بدەستڤەئینایە و ماستەر لژێرناڤێ (شرۆڤەكرنا ئەگەرێن تێكچۆنا رێیێن هەرێما كوردستانێ بەری دەمێ دیاركری) ل سالا (2019)ێ ل ئەلمانیا وەرگرتیە،هەروەسا ناڤبری ل سالا (2009)ێ پەرتۆكەك بناڤێ (حول الخگاب الایزیدی) چاپكریە،گەلەك گۆتار و ڤەكۆلین د چەندین گۆڤار و رۆژنامەیان دا ب زمانێ كوردی و عەرەبی بەلاڤكرینە،گەلەك كارێن ئەندازیاری بۆ پەرستگەها لالش و دەڤەرێن ئێزدیان كرینە وەكو چیكرنا هۆلێن لالش و نووژەنكرنا چەندین مەزارگەهان،ژ (1999 هەتا 2003)ێ ئەندامێ دەستەكا بلندا بنگەهێ لالش و جڤاكی و سەرۆكێ لژنا پەیوەندیان بوویە،و ( ژ 1996 هەتا )2013ێ ئەندازیار بوویە ل رێڤەبەریا رێك و پران ل دهۆكێ و ژ( 1999 هەتا 2005)ێ ئەندازیارەكێ كارا بوویە د پرۆژەیێن هۆلێن لالش و نووژەنكرنا مەزارگەهێن ئێزدیان،كارێ ئەندازیاریێ ل رێڤەبەریا رێك و پران ل دهۆكێ دگەل پارێزگەها دهۆكێ و دگەل رێڤەبەریا ئەشغالا دهۆكێ كریە و بەردەوام كار و هەول ددان بۆ جێبەجێكرنا پرۆژەیان بۆ دەڤەرێن ئێزدیان.
تُتاح هذه الصورة أيضا في: کوردی