گەرۆكێ كوردستانێ سمینارەك ل باعەدرێ پێشكێشكر
تۆرا لالش:
پێخەمەت ئاشناكرنا قوتابیان ب كەلتۆر و داب و نەریت و فلكلۆر و ئاخ و ژیانا گەلان ل جیهانێ،ئیرۆ 30ی ئادارا 2022ێ بنگەهێ لالش تایێ باعەدرێ ب هەڤكاری دگەل كارگێریا ئامادەیا باعەدرێ یا تێكەل رابوون ب گێرانا سمینارەكێ بۆ گەڕۆكێ كوردێ بەرنیاس بەدەل رەڤۆ ل ژێر ناڤ و نیشانێن (بەدەل رەڤۆ دناڤبەرا كوردستانێ و جیهانێ دا)،ب ئامادەبوونا نوونەرێن لیژنا ناوچا باعەدرێ یا پارتی و چەند دام و دەزگەهێن میری ل باعەدرێ و ئەنجومەنێ مالا میران و نوونەرێ ئێكەتیا قوتابیان ل شێخان و مامۆستا و قوتابیێن ئامادەیێ.
ل دەستپێكێ خەلات باعەدری،بەرپرسێ بنگەهێ لالش تایێ باعەدرێ ب خێرهاتنا سمیناربێژی و تەڤایا ئامادەبوویان كر،لدووڤدا وەك رێزگرتنەك بۆ جانگۆریێن بزاڤا ڕزگاریخوازا كوردی سەركێشیێ وان بارزانیێ نەمر ڕێورەسمێن سمینارێ دەستپێكرن.
گەڕۆكێ ناڤهاتی د دەمێ سمینارێ دا رۆناهی ئێخستە سەر سەربۆرا خۆ یا دەستپێكێ ئەو قۆناغێن ل وەلاتی كو بووینە شەنگستێن گرنگ د كاروانێ دەستپێكا نڤیسینێ دا،ئینجا بەرەف سەربۆر و رەوشەنبیری و كەلتۆر و داب و نەریت و ئەزموونا چەندین وەلاتێن جیهانی ڤە چوو دبیاڤێن جۆراوجۆر و هەمەڕەنگ پێخەمەت مفا گەهاندنا ئامادەبوویان و چەوانیا لاسایكرنا مللەتێن پێشكەفتی یێن كو ناڤهاتی ئەزموون دگەل دەربازكرین د دەمێ گەریانێن خۆدا، زێدەباری ڤەگوهاستن و ناساندنا ئاخ و وەلات و ژیان و داب و نەریتێن و كەلتۆرێ كوردان ب چەندین مللەتێن جیهانی،دگەل چەندین بابەت و خالێن بالكێش كو جەرگێ سمینارێ بخۆڤەگرتین.
ل داویێ دانوستاندنەكا گەرم و گۆڕ ل دۆر بابەتی دناڤبەرا سمیناربێژی و ئامادەبوویان دا پەیدابوو،كو خۆشی و تامەكا دیتر دا كەش و هەوایێ سمینارێ.
بۆ زانین بەدەل رەڤۆ گەڕۆك و هۆزانڤان و وەرگێرەكێ ناڤدارێ كوردە و خودان 18 بەرهەمێن چاپكریە،گەریان ل چەندین وەلاتێن جیهانێ كریە و نهۆ ژیانێ ل وەلاتێ نەمسا دەرباز دكت،سالانە چەند جارا قەستا كوردستانێ دكت و ئەزموونا گەلەك وەلاتان دگەهینتە كوردستانێ نەخاسمە ناڤەندێن خووندنێ یێن جۆراوجۆر.
تُتاح هذه الصورة أيضا في: کوردی