بنگەهێ لالش:راگرتنا پشتەڤانی یا نێڤ دەولەتی بۆ ئاوارەیێن ئێزدی “كارەساتە” و “سزایەكێ” چاڤەرێ نەكری بوو
ل بیرەوەریا هەشتێ یا كۆمكوژیا ئێزدیان،داخوازا دیتنا چارەسەریەكا بنەرەتی و بجهئینانا رێككەفتنا شنگالێ دكەین
بیرەوەریا هەشتێ یا دلتەزین یا هێرشا درندەیێن داعش یێن تیرۆرست بۆ سەر دەڤەرێن ئێزدیان ب گشتی و شنگالێ ب تایبەتی دەرباز دبت، ئەو تاوانێن كرێت و ترسنۆك یێن تاریخوازان ئەنجام داین ژ تیرۆرستێن داعش كو خوە ب چەكدارێن دەولەتا ئیسلامی ل عێراق و شامێ ب ناڤ دكرن، ئەو ژی 6417وەلاتیێن ئێزدی یێن سڤیل یێن بێ گونەه هەتا ژن و زەلامێن تەمەن 90سالی هاتنە گرتن و كوشتن.
تاوانێن كوشتن و سەرژێكرن و گرتن و كەنیزەكرن و دەستدرێژی دەرهەقی خەلكێ مە دا ل شنگالێ ب بەهانەیێن ئاینی و توندرەوی ڤە هاتنە ئەنجام دان، كو بتر ژ 3 هەزار مرۆڤێن ئێزدی بوونە قوربانی، وهەتا نها دبێ سەر و شوونن،و ژ دەرئەنجامێ ڤێ چەندێ نێزیكی 400هەزار ئێزدی دەربەدەر و ئاوارەی هەرێما كوردستانێ بوون،وبتر ژ 100هەزار ئێزدیان كۆچبەری ئەورۆپا و ئەمریكا و ئوسترالیا و چەند وەلاتێن دیتر بوون.
سەرەرای پێكۆلێن مرۆڤی یێن باش یێن سەركردایەتیا هەرێما كوردستانێ،و گەلێ وێ یێ هێژا هەمبەری ئاوارەیێن خەلكێ مە یێن لێقەومیایی كرین،زێدەباری پشتەڤانی یا نێڤ نەتەوەیی و یێن وەلات و گەلێن خودان شارستانیەت،لێ هێشتا ئازارێن خەلكێ مە ل كەمپێن ئاوارەیێ یێن كو هژماران نۆكە دگەهتە نێزیكی 37هەزار خێزانان،هێش یەبەردەوامە،چنكو ئەو هەست ب ئێمناهی و ئارامیێ ناكەن هەتا ڤەنەگەرنە جیه ووارێن خۆ دگەل هەبوونا گەرەنتیێن راستەقینەیی بۆ پاراستنا وان و سزادانا تیرۆرستێن داعش و كەسێن هاریكاربووین بۆ ئەنجامدانا تاوانان،و دێ مینت خالەكا رەوش ل سەر روویێ هەر توندرەو و تیرۆرستەكی دا.
هەروەسا پشتەڤانی یا نێڤ دەولەتی بۆ ئێزدیان ل رۆژانێن دەستپێكی یێن هێرشا هۆڤێن داعش،جیێ رێزگرتن و سوپاسیا مەنە،دیسان ئاماژێ ددەینە پلانێن نێڤ نەتەوەیی بۆ دەستەسەركرنا تیرۆرستێن داعش یێن ب رێیێن دەریایی بەرەف ئەورۆپا ڤە رەڤین،چ ب رێیا وەلاتەكێ دراوسێ یێ عێراقێ،یان خۆ ڤەدزینە وەلاتێن دیتر ژبۆ بگەهنە كەنارێن ئەورۆپا،ئەم دخوازین و داخوازێ ژ نەتەوەیێن ئێكگرتی دكەین پێداچۆنێ ل پلانا راگرتنا پشتەڤانیێ بۆ ئاوارەیێن عێراقی و ب تایبەت كوردێن ئێزدی بكت ئەوێن ل كەمپێن هەرێما كوردستانێ دا دژین،ئەم دبینن كو راگرتنا پشتەڤانیێ بۆ ئاوارەیێن ئێزدی وەكو كارەساتەكا دی یە و سزایەكێ چاڤەرێ نەكریە بۆ قوربانیێن بی گونەه و كەسوكارێن وان،هیڤی خوازن رەوشا مرۆڤی یا تایبەت یا ئاوارەیێن ئێزدی ل بەر چاڤ بێتە وەرگرتن،ژبەركو دەڤەرا شنگالێ بوویە گۆرەپانەكا نێڤ دەولەتی بۆ هەڤركیێن هەرێمی ب هەبوونا گرۆپ و هێزێن چەكدار یێن ژ دەرڤەی سنووری هاتین و گرۆپێن چەكدار یێن نە ل بن كۆنترۆلا دەستهەلاتا بەغدایێ دا و هەر ئێكی ئەجندایەكا تایبەت و رێككەفتن دگەل جیێن پشتەڤانیا دارایی لێ دكن هەیە.
ئەم دبینن و پێتڤیە دەست ژ دیتنا چارەسەریێن سادە یێن ئازارێن خەلكێ شنگالێ بەردەن،و دەست ب دیتنا چارەسەریێن ریشەیی و چارەنڤیساز ب پشتەڤانی یا نێڤ نەتەوەیی بێتە كرن،و ب تایبەت رێككەفتنا شنگال ئەوا دناڤبەرا حكومەتێن هەولێر و بەغدا دا هاتیە ئیمزاكرن،وب تەمامی بێتە بجهئینان و سزادانا هەر جیەك و ئالیەكی رێگریێ دكەت بۆ بجهئینانا وێ رێككەفتنێ كو گەرەنتیا راستەقینەیە بۆ مافێ ئاواران و كۆچبەران و قوربانیان ژ خەلكێ شنگالێ ،دیسان ئەوه كو سزادانا تیرۆرستێن داعش و لایەنگرێن وان وئەڤا بسەرێ ئێزدیان هاتی ب جینۆساید ل قەلەم بدەن ل ڤێ بیرەوەریا دلتەزین دا،ئەم سۆزێ ددەینە قوربانیان و كەسوكارێن لێقەوماى یێن خەلكێ شنگالێ كو دێ بەردەوام بین ل سەر داخوازكرنا مافێن وان و سزادانا بكوژان،و ئەم بێ دەنگ نابین هەتا ئێك گرتیا ئێزدی مابت و چارەنڤیسێ بێ سەرشوونان ل گۆڕێن ب كۆم دا بێتە ئاشكەراكرن.
دلۆڤانی بۆ گیانێ قوربانیێن بێ گونەه
روورەشی و شەرمەزاری بۆ تیرۆرستێن توندرەو و ترسنۆك
دەستەیا بلندا بنگەهێ لالش یێ رەوشەنبیری و جڤاكی/دهۆك
دوی تەباخا 2022
تُتاح هذه الصورة أيضا في: کوردی