40 ڕووفاتێن جینۆسایدا ئێزديان دێ ئێنه ڤهگهراندن
باسنيوز:
نوێنهرێ خهلكێ گوندێ حهردان ل قهزا شنگال دیاركر، خهلكێ گوندی دهست ب بهرههڤیان بۆ ڤهشارتنا روفاتێن جینۆسایدا شنگالێ دكهن نوكه حكومهتا عێراقێ ئهم ئاگههداركرینه دێ ڤێ ههیڤێ هژمارهكا روفاتان رادهستێ كهس و كارێن قوربانیان كهن”.
حهسهن قاسم، نوێنهرێ خهلكێ گوندێ حهردان ل قهزا شنگال بۆ (باسنیوز) راگههاند، حكومهتا عێراقێ ئهم ئاگههداركرینه کۆ دێ ڤان رۆژێن بهێت ژ ڤێ ههیڤا ئێك سالا 2024ێ ههتا 40 روفاتێن ئێزدیان ژ نوژداریا داد دهركهڤن و هێنه رادهستكرن بۆ دهستێ كهس و كارێن قوربانیان ژوانا ژى ههتا 17 روفاتان قوربانیێن جینۆسایدا گوندێ حهردانن ل شنگالێ کۆ سالا 2014ێ ژلایێ تیرۆرستێن داعش ڤه هاتینه گوللهبارانكرن”.
خۆیا ژى كر، جیۆسایدا شنگالێ یا بهردهوامه ههتا نوكه چارهنڤیسێ گهلهك وهلاتیان دیارنینه و هیشتا گهلهك گۆرێن بكۆم نههاتینه ڤهكرن و ناسنامهیێن قوربانیێن جینۆسایدا شنگالێ ئاشكرانهبووینه و هیشتا ههمى خهلكێ ئێزدى نهشیایە ڤهگهریت بۆ سهر جهـ و مالێن خۆ ئهم هیڤیدارێن پتر ههڤكاریا ئێزدیان بۆ ئاڤهدانیا شنگال و زڤرینا ئاواره و قهرهبوویا خهلكی و رزگاركرنا رهڤاندیێن ئێزدى بهێته كرن”.
نوێنهرێ خهلكێ گوندێ حهردان ل قهزا شنگال ، ئاشكهرا كر، خهلكێ گوندێ حهردان نوكه یێ گۆرستانهكا مهزن ل گوندێ حهردان دروست دكهن، ئهڤ گۆرستانە دێ یا تایبهت بیت بۆ ڤهشارتنا قوربانیێن خهلكێ گوندێ حهردان ئهو جهێ کۆ خهلك تێدا هاتیه گوللهبارانكرن ژلایێ تیرۆرستێن داعش ڤه ئهو جهـ دێ بیته گۆرستان و ههمى قوربانى دێ دناڤدا هێنه ڤهشارتن”.
تیرۆرستێن داعش ل رۆژا 3/8/2014ێ هیرشى سهر قهزا شنگالێ كر، د ئهنجامدا شهش هزار و 417 كهسێن ئێزدى هاتنه رهڤاندن و بێ سهروشین كرن، ب پشتهڤانیا حكومهتا ههرێما كوردستانێ نڤیسینگهههك بۆ رزگاركرنا رهڤاندیێن ئێزدى هاته ڤهكرن و دهست ب كارێ رزگاركرنا رهڤاندییان هاته كرن ، ههتا نوكه پتر ژ چوار هزار كهسان ژ ههردوو رهگهزان رزگاربوونه و هیشتا چارهنڤیسێ پتر ژ دوو هزار كهسان دیارنینه و چهندین گۆرێن بكۆم ل شنگال هاتنه دیتن و روفاتێن وهلاتیێن ئێزدى دناڤدانه و هێشتا گهلهك ژى نههاتینه ڤهكرن”.
خهیرى عهلێ، چالاكڤانێ ئێزدى ل قهزا شنگالێ بۆ (باسنیوز) دیاركر، پشتى گۆرێن بكۆم هاتینه ڤهكرن ل دۆریانا حهردان ههمى رۆفات بۆ نوژداریا داد ل بهغدا هاتینه ڤهكرن دیاربوویه هندهك ههستیێن رۆفاتان ل جهێ گۆرێن بكۆم ماینه ئهڤه بوویه جهێ دلگرانیا خهلكی کۆ بهلگهیه ئهو لایهنێن گۆرێن بكۆم ڤهدكهن ب دروستی كارێ خۆ ناكهن ههتا نوكه ناسنامهیێن گهلهك ژ قوربانیێن جینۆسایدا شنگالێ ئاشكرانهبووینه و رۆفات ل نوژداریا داد ل بهغدا و مووسلێ ماینه ئهم هیڤیدارێن كارهكێ رژد بۆ ئاشكراكرنا ناسنامهیێن روفاتێن قوربانیێن جینۆسایدا شنگالێ بهێته كرن”.
تُتاح هذه الصورة أيضا في: کوردی