ب چاڤدێرییا نڤیسینگەها سەرۆکێ حكومه‌تا هەرێما کوردستانێ، دابەشکرنا هاریکارییا دارايى ل سەر ڕزگاربوویێن ئێزدی یێن ژ دەستێ داعشێ بەردەوامە و تا نۆکە سێ هه‌زار و 590 کەسان ژ ڤان هاریکارییان مفادار بووينه‌.

لژنەیا سەرپەرشتیيا دارایی یا مەسرور بارزانی، سەرۆکێ حكومه‌تا هەرێما کوردستانێ، ڕاگەهاند: ” ل دووڤ ئەو لیستا نوو یا مە بەلاڤ کری، ناڤێ سێ هه‌زار و 590 ڕزگاربوویێن دەستێ داعش د ڤێ پرۆسەیێ دا هەیە و ئەم بەردەوامین د گەهاندنا هاریکارییان دا بۆ وان.”

ئاماژە ب وێ چەندێ کر، دابەشکرنا هاریکارییان دێ ل چار جهێن جیاواز بت و گۆت: “پڕۆسە ل ژێر چاڤدێرییا هوور یا نڤیسینگەها مەسرور بارزانى، سه‌رۆكێ حكومه‌تێ و ب ڕێيا بنگەهێ لالش یێ ڕه‌وشەنبیری و کۆمەلایەتی ب ڕێڤەدچت، کو تایبەت هاتییە کرن بۆ خوشک و برایێن ڕزگاربوویێن ئێزدی.”

هەروەسا بەحس ل وێ چەندێ ژی کر کو ئەڤ پڕۆژەیە ماوەیێ دوو سالانە ب شێوەیەکێ ڕێک و پێك بەردەوامە و گۆت ژی: “د هەیڤا تەممووزا ئەڤ سالە دا پڕۆژە دێ بتە دو سال کو بێی چ ئاریشە و ب شێوەیەکى زه‌لال، هاریکاری ل سەر ڕزگاربوویان دئێنە دابەشکرن.”

ل دووڤ ئەوى خشتەیێ هاتییە دانان، ژ ڕۆژا ئينيێ، 22ی ئه‌یارا 2026 تا ڕۆژا دووشەمبوويێ، 25ی ئه‌یارا 2026، دێ ل چار جهێن جودا هاریکاری ئێنە دابەش کرن.

جهێ ئاماژەپێکرنێ یە، حکومەتا هەرێما کوردستانێ ب ڕێيا نڤیسینگەها مەسرور بارزانى، سه‌رۆكێ حكومه‌تێ ب بەردەوامی د بزاڤێن پشتەڤانیکردنا ئاوارە و ڕزگاربوویێن دەستێ تیرۆرستێن داعش دایە، ب تایبەتی پێکهاتەیێ ئێزدی، ب مەبەستا سفككرنا بارگرانییا سەر ملێ وان و دابینکرنا پێدڤيیێن ده‌ستپێكى یێن ژیانا وان.