22 سال لسەر وەغەرا هونەرمەندێ مەزن تەحسین تاهایی دەربازبون
بەریا 22 سالان، د رۆژەکا وەکی ئەڤرودا رێکەفتی 28-5-1995 هونەرمەند تەحسین تاها ل وەلاتێ هولەندا، ژئەگەرێ راوەستا دلی، گیانێ خۆ ژدەستدا.
مـیدیـا دهـۆک
ئەڤرو رێکەفتی 28-5-2017 ساڵرۆژا وەغەرا دووماهیێ یا هونەرمەندێ بناڤ و دەنگێ کوردستانی بگشتی و دەڤەرا بەهدینان ب تایبەتی( تەحسین تاها )یە، کو دناڤا تورا جڤاکیا فێسبوکی دا، دەنگویەکێ زۆر لدویڤ خودا ئینایە و دەربرینا هەڤخەمیاخو ژ بۆ گیانێ هۆنەرمەندێ مەزنێ کورد ددەنە دیارکرن.
هونەرمەندێ بناڤ و دەنگێ کوردستانێ، تەحسین تاها، ل سالا 1941 ل قەزا ئامێدیێ هاتیە سەردونیایێ و ناڤێ وی یێ چوار قولی( تەحسین تاها محمد سەلیم )ە، هەر ژ بچیکاتیاخۆ دناڤا خێزانەکا کوردپەروەر و حەژێکەرێن موسیکێ دا دژیت.
هونەرمەندێ نەمر، هەر ژ زاروکینیا خودا، مالاوان ژبۆ چەندین دەڤەرێن جودا جودا دهێتەڤەگوهاستن، ژبەر وێ چەندێ قوناغا خواندنا سەرەتایی دگەل جهان ژوانا (ئامێدیێ، مانگێشک، زاخۆ) دخوینیت تاکوب دووماهی دئینیت.
ل سالا 1956خواندنا قوناغا ناڤنجی ب دووماهی دئینیت، پاشان، ل سالێن 1960 دچیتە کولیا هونەرێن جوان، پشکا شانویێ ل زانکویا مویسل. لێ ژبەر هەستا بلندا نەتەوەیی و ڤیانا وەڵاتی خواندنا خو بجهـ دهێلیت و دچیتە دناڤا رێزێن شورەشێ، پاشان ل سالا 1963 دووبارە ڤەدگەریتەڤە و خواندنا خۆ تمام دکەت و دبیتە ماموستایێ هونەرێ.
ل سالا 1970 ل رادیۆ تێلەڤزیونێن بەغدا دەست ب سترانان دکەت و چەندین سترانان توماردکەت و هوسان دهێتە دناڤا جیهانا هونەرێ کوردی دا و دبیتە ستێرەکا گەش دئاسمانێ دونیا سترانا کوردی دا.
هونەرمەندێ ناڤدار تەحسین تاها، ل سالا 1994 دچیتە ئەوروپا ژبۆ گێرانا چەندین کونسێرتان، ژبەر سەختی یا کاودانێن سیاسی یێن کوردستانێ داخوازا ل جوئا سیاسی دکەتن ژ وەلاتێ هولەندا، پاشان توشی ئێشا دلی دبیت و ژبەر ئەگەرێ ئێشان و راوەستانا دلێ هونەرمەندێ مەزن، ل رێکەفتی 28-5-1995 د رۆژەکا وەکی ئەڤرودا وەغەرا دووماهیێ کر
تُتاح هذه الصورة أيضا في: کوردی