نێچیرڤان بارزانی: دخوازین دانوستاندنێن ھەولێر و بەغدابێ بەردەوام بن
WAAR-دهۆك:
سەرۆکوەزیرێ ھەرێما کوردستانێ راگەھاند؛ حکومەتا ھەرێمێ ئالیگرا دانوستاندنێن رژدە د ناڤبەرا ھەولێر و بەغدایێ و داخواز کر ئەو دانوستاندنە بەردەوام بن.
نێچیرڤان بارزانی سەرۆکوەزیرێ ھەرێمێ ئەڤرۆ پێشوازی ل تۆن ئەلەرس بالیۆزا نوو یا نۆرویجێ ل ئیراق و ئوردن کر، تێدا بالیۆزا نۆرویجێ رۆلێ حکومەتا ھەرێمێ د ڤەحەواندنا وێ ژمارەیا زێدە یا ئاوارە و پەنابەران دا و ھەروەسا پێکڤەژیانا ئۆلی و نەتەوەیی یا ل ھەرێما کوردستانێ بلند نرخاند و دوپات کر، کو وەلاتێ وێ پشتەڤانیێ ل دانوستاندنێن رژدە د ناڤبەرا ھەولێر و بەغدایێ دا، ل گۆرەیی دەستووری ئیراقێ.
ژ ئالیێ خوەڤە نێچیرڤان بارزانی، ھاریکاریێن مرۆڤاتی و سەربازی یێن وەلاتێ نۆرویجێ بلند نرخاندن و ھەروەسا دوپات کر، کو حکومەتا ھەرێمێ دێ ل سەر گرنگی پێدانا کلتۆرێ پێکڤەژیانێ یا بەردەوام بیت.
سەبارەت کێشەیێن ھەولێر و بەغدایێ ژی سەرۆکوەزیرێ ھەرێمێ خوەیاکر، کو حکومەتا ھەرێمێ ئالیگرا دانوستاندنێن رژدە د ناڤبەرا ھەولێر و بەغدایێ و خواست بەردەوامی پێ بھێت دان و گۆت ژی : ھندەک کێشە ھەنە د شیان دایە زوو بھێن چارەکرن، ھندەک ژی پێدڤی ب دەمی و دانوستاندنێن زێدەترە.
تُتاح هذه الصورة أيضا في: کوردی