ئەمریکا و روسیا ل دۆر سووریێ رێککەفتن و چارەنڤیسێ کوردان دیار نینە
ئەڤرۆ نيوز:
رۆژنامەکا ئەمریکی دیار دکەت کو شاندێن ئەمریکا و روسیا ناڤەرۆکا رێککەفتنا ل دۆر سووریێ ئامادە کرینە و ل گۆر رێککەفتنێ ئەمریکا دێ ھەموو ھێزێن خوە ژ سووریێ ڤەکێشیت و دێ روسیا ژی ھێزێن ئیرانێ ژ سووریێ دەرخینیت و ھەتا نھا دیار نینە کا دێ چارەنڤیسێ کوردان ل سووریێ چ بیت.
رۆژناما واشنتۆن پۆست یا ئەمریکی دوھی د راپۆرتەکێ دا دیارکر کو دەمەکە ھەر دو شاندێن ئەمریکی و روسی ل سەر بەرنامێ ھەڤپشک یێ ھەر دو وەلاتان بۆ چارەکرنا قەیرانا سووریێ کار دکەن و نھا ئەڤ بەرنامە ئامادەیە و بریارە د ھەڤدیتنا ڤێ ھەفتیێ یا د ناڤبەرا پوتین و ترامپی دا بھێتە ئیمزاکرن.
د بەردەوامیا راپۆرتێ دا ئەو یەک ژی ھاتیە دیارکرن کو ل گۆر ھندەک خالێن رێککەفتنێ دڤێت ئەمریکا ھەموو سەربازێن خوە ژ سووریێ ڤەکێشیت و ھاریکاریا ھێزێن سووریا دیموکراتیک نەکەت، ل ھەمبەر ڤێ یەکێ ژی دێ روسیا ھەموو ھێزێن ئیرانێ ژ سووریێ و سنورێ ئیسرائیلێ دەرخینیت و دێ روسیا کار کەت کو ھێزێن سووریا دیموکراتیک ل گەل رژێما سووریێ پێکڤە کار بکەن و ھەروەسا روسیا دێ بیتە ناڤبژیڤان بۆ چارەکرنا ئاریشێن وێ ھێزێ ل گەل رژێما بەشاری.
رۆژناما واشنتۆن پۆست یا ئەمریکی د پشکەکا دی یا راپۆرتا خوە دا ئاماژە ب ھندێ ژی کریە کو جۆن بۆلتۆن شیرەتکارێ ئاسایشا ئەمریکا ل دژی ڤێ رێککەفتنێ یە و داخواز ژ سەرۆکێ ئەمریکا کریە کو ڤێ رێککەفتنێ ئیمزا نەکەت، چونکو ھەکە ئەمریکا ھەموو ھێزێن خوە ژ سووریێ ڤەکێشیت نەشێت کارتێکرنا خوە ل سووریا نوو بکەت و دێ پێگەھێ ئەمریکا ل رۆژھەلاتا ناڤین لاواز بیت، ھەروەسا ئەمریکا نەشێت فشارێن خوە ل سەر ئیرانێ زێدە بکەت، چونکو ھەکە ئەمریکا ژ سووریێ دەرکەڤیت دێ جارەکا دی ئیران پێگەھێ خوە ل سووریێ و دەڤەرێ ب ھێز کەت و روسیا ژی دێ ھاریکاریا ئیرانێ کەت و ئەو یەک د بەرژەوەندیا ئەمریکا دا نینە.
د دووماھیا راپۆرتێ دا ئەو یەک ژی ھاتیە دیارکرن کو گەلەک ژ بەرپرسێن وەزارەتا بەرگیریێ یا ئەمریکا ل دژی ڤێ رێککەفتنێ نە و دخوازن ترامپ ڤێ رێککەفتنێ ئیمزا نەکەت، چونکو دەرکەفتنا ھێزێن ئەمریکا ژ سووریێ دێ وەکو ئەزموونا ڤەکێشانا ھێزێن ئەمریکا یا ل عیراقێ بیت کو بوو ئەگەرێ ھندێ عیراق ب تەمامی بکەڤیتە دەستێ ئیرانێ و ھەتا نھا ژی ئەمریکا نەشێت ھێزێن ئیرانێ ژ عیراقێ دەرخینیت و ھێزێن سەر ب ئیرانێ ئاستەنگیێن مەزن ل ھەمبەر پرۆژێن ئەمریکا ل عیراقێ و رۆژھەلاتا ناڤین دروست دکەن، ژ بەر ھندێ ژی دڤێت ئەمریکا شاشیا بەری نھا ل عیراقێ کری ل سووریێ ھەمان شاشیێ دوبارە نەکەت.
تُتاح هذه الصورة أيضا في: کوردی