سه‌رۆك نیچیرڤان بارزانى: ئێكرێزیا ناڤخۆ باشترین یادكرنه بۆ گیانێ قوربانیێن ئه‌نفالان
گاڤ
سه‌رۆكی هه‌رێما كوردستانی په‌یامه‌ك د یادا ئه‌نفالان دا به‌لاڤكر و راگه‌هاند، دڤێت دیرۆكا ته‌حلا گه‌لێن ئیراقێ وانه و په‌ند بن بۆ كارێ پێكڤه و ئێكودوقه‌بوولكرنێ و مسۆگه‌ركرنا ته‌ماما مافێن پێكهاتان د ئیراقا نوى دا بۆ وێ یه‌كێ كاره‌ساتێن بۆرى دورباره نه‌بن و ئێكرێزیا ناڤخۆ باشترین یادكرنه بۆ گیانێ قوربانیێن ئه‌نفالان.
نێچیرڤان بارزانى، سه‌رۆكی هه‌رێما كوردستانی ئه‌ڤرۆ ئه‌ینیێ 25-8-2023یێ په‌یامه‌ك د یادا 35مین سالیادا ئه‌نفالێن به‌هدینان دا به‌لاڤكر و راگه‌هاند، ب رێز یادا شه‌هیدێن خه‌لكێ سڤیلی به‌هدینان و هه‌موو قوربانیێن پێلین ئه‌نفالان دكه‌ین، ل سالا 1988ێ ژ گه‌رمیان تا به‌هدینان 182 هزار وه‌لاتیێن بێتاوان ب زاڕۆ و ژن و پیر و گه‌نج ڤه بوونه قوربانى وێ تاوانێ.
هه‌روه‌سا دیاركر، دادگه‌ها بلندا تاوانێن ئیراقێ پێلا ئه‌نفالان ب جینۆساید و تاوانا جه‌نگى و تاوانا دژى مرۆڤایه‌تیێ ل قه‌له‌م دایه، ل ده‌مه‌كى گیانێ پاقژێ شه‌هیدین ئه‌نفالێ ل بیر دئینین، دوپاتیێ دكه‌ین كو حكومه‌تا ئیراقا فیدرالى دڤێت ئه‌ركێ خۆ بۆ قه‌ره‌بووكرنا خێزان و كه‌سوكارێن قوربانیان بجهـ بینیت و ژ ئێش و ئازارێن وان كێم بكه‌ت.
هه‌ر د ڤێ یادێ دا سه‌رۆك نێچیرڤان بارزانى سوپاسى و پێزانینێن خۆ بۆ خه‌لكێ دلسۆز و جوامێرێ هه‌ولێرێ و به‌حركێ و ره‌خودۆرێن وێ دوپاتكر و دیاركر، ئه‌و د رۆژێن سه‌خت دا دناڤا كه‌مپان دا د هاوارا لێقه‌ومیێن به‌هدینان چوون و ده‌ستێ هاریكاریێ بۆ وان درێژكر.
سه‌رۆك نیچیرڤان بارزانى دبێژیت: خزمه‌تكرنا باشتر یا كه‌سوكارێن ئه‌نفالكریان، ته‌بایى و ئێكرێزیا ناڤخۆ، كارێ جدى و بزاڤ بۆ دوباره‌نه‌بوونا تاوانێن وه‌ك ئه‌نفالێ و ناساندنا وێ ب جینۆساید ل سه‌ر ئاستێ جیهانی باشترین یادكرن و وه‌فادارینه بۆ گیانێ پاقژێ قوربانیێن ئه‌نفالان و ته‌ماما شه‌هیدێن كوردستانێ.
هه‌روه‌سا ئاشكراكر، دڤێت دیرۆكا ته‌حلا گه‌لێن ئیراقێ وانه و په‌ند و هانده‌ر بن بۆ كارێ پێكڤه و ئێكودوقه‌بوولكرن و مسۆگه‌ركرنا مافێن ته‌مام یێ پێكهاتان د ئیراقا نوى دا، بۆ وێ یه‌كی كاره‌ساتێن بۆرى دوباره نه‌بن و ئازادى و مافێن ده‌ستوورى یێن هه‌موویان د پاراستى بن.
تُتاح هذه الصورة أيضا في: کوردی