خوارنێن سڤك ئەگەرێ دووگیانبوونێ كێم دكن
رووداو-هەولێر
پزیشکانی زانکۆی کوینزلاند لە ئوستراڵیا لە توێژینەوەیەکی نوێییاندا رایدەگەیێن خواردنە خێراکان کاردەکەنە سەر توانای بەپیتی خانمان و ئەگەری وەچەخستنەوەیان کەمدەکەنەوە.
لە توێژینەوەکەدا هاتووە ئەو خانمانەی بەردەوام خواردنە خێراکان (فاستفوودەکان) دەخۆن، توانای بەپیتییان کەمترە بۆیە پزیشکان رێنمایی خانمان دەدەن لە ژەمە خۆراکیەکانییان زیاتر سەوزە و میوە بخۆن تاکو ئەگەری دووگیانبوونیان زیاتربێت.
د.کلاری رۆبێرت، پرۆفیسۆر لە زانکۆ لە ئوستراڵییەکە و سەرپەرشتیاری توێژینەوەکە دەڵێت بۆ ئەو خێزانانەی دەیانەوێت منداڵیان ببێت، خۆراک رۆڵێکی گرنگ دەگێرێت لەسەر توانای بەپیتی هەردوو دایک و باوکەکە، بەڵام خانمان پێویستە زیاتر گرنگی بە پێکهاتە و شێوازی ئامادەکردنی خۆراکەکە بدەن.
توێژینەوەکە لەسەر نزیکەی شەش هەزار ئافرەتی ئوستراڵی، نیوزلەندی و بەریتانی ئەنجامدرا، لەشرۆڤەکردنی داتاکان توێژەرەکان بۆیاندەرکەوت ئەو خانمانەی هەفتانە خواردنە خێراکانی وەک پیتزا، هەمبەرگەر و هاوشێوەکانییان دەخۆن و کەمتر سەوزە و میوە دەخۆن توانای بەپیتییان کەمە و کاتێکی زۆرتریان پێویستە بۆ دووگیانبوون، بە بەراورد بەو خانمانەی لە ژەمەکانییان زیاتر سەوزە و میوە دەخۆن.
پزیشکە توێژەرەکان دەڵێن ئەو خانمانەی کەمتر سەوزە و میوە دەخۆن توانای بەپیتییان بەرێژەی %12 ، ئەوانەشی هەفتانە چوار جار یان زیاتر خواردنە خێراکان دەخۆن توانای بەپیتیان بەرێژەی %16 کەمدەکاتەوە.
تُتاح هذه الصورة أيضا في: کوردی