مامۆستایەكێ زانكۆیا دهۆكێ:
قۆناغێن دژوار ل پێشیا ئێزدیانە و دڤێت نفشێ ئێزدی ل بەرامبەر ڤان مەترسیا ب راوەستت
تۆرا لالش:
مامۆستایێ زانكۆیا دهۆك ل كولیژا زانستێن مرۆڤایەتی ئەرشەد حەمەد محۆ،بكالوریوس دبوارێ دیرۆكا كوردا یا نوو ل بەشێ مێژوو هەمان زانكۆیێ ل سالا (2005)ێ وەرگرتیە،پاشی ل سالا(2009)ێ باوەرناما ماستەرێ دبوارێ دیرۆكا ئێزدیان لسەردەمێ ئوسمانیان ل هەمان بەش و زانكۆیێ وەرگرتیە،كاریە ل دەمەكێ كورت دا خزمەتەكا بەرچاڤ یا دیرۆك و ئایینێ ئێزدیان بكت ب ئەنجامدانا ژمارەكا ڤەكۆلینێن زانستی – ئەكادیمی دوارێ ئێزدیناسیێ دا و بەشداری د چەندین كۆنگرێن زانستیێن نێڤ دەولەتی دا كریە.
د دیدارێ دا مامۆستا ئەرشەد حەمەد،بەحسێ كار و ئەزموونێن خۆ و ئەركێ لسەر ملێن نفشێ نوو یێ ئێزدیان دكت و بۆ رۆژناما دەنگێ لالش دبێژت:نهۆ قوتابیێ دكتۆرایێ مە و پرۆژێ وی لسەر ئێزدیان و كەمینەیێن دی یێن ئایینی یە ل دەشتا مووسل دناڤبەرا سالێن(1990 هەتا 2003)،هەروەسا چەندین ڤەكۆلینێت زانستی – ئەكادیمی دوارێ ئێزدیناسیێ دا ئەنجام داینە و بەشداری د چەندین كۆنگرێن زانستی یێن نێڤ دەولەتی دا كریە ب پێشكێشكرنا ڤەكۆلینێن تایبەت ب دیرۆك و ئایینێ ئێزدیان ڤە،ب مەبەستا دیاركرنا ئالیێن ڤەشارتی ژ دیرۆكا ئێزدیان و راستڤەكرنا بۆچۆنێن شاش و نەزانستی دەرهەقا ئێزدیان دا هاتینە نڤیسین ژلایێ نڤیسەرێن نە ئێزدی ڤە.
هەروەسا ئەرشەد حەمەد دیاركر،هێشتا دیرۆك و كلتۆر و ئایین و فلكلۆرێ ئێزدیان پێتڤی لێكۆلینێن زانستی یە و ئەڤ چەندە ژی ب پلا ئێك لسەر ملێت نفشێ نوو یێ ڤەكۆلەرێن ئێزدیان دمینت،چنكو ب سەدان سالا دیرۆك و ئایینێ ئێزدیان هاتیە شێواندن و ب نەوەیی هاتیە نڤیسین لسەر دەستێ مێژوونڤیسێن نە ئێزدی ڤە،ئەڤجا ئێزدی بتر ژ هەموو مللەتان پێتڤی زانست و زانینی نە بۆ دووبارە نڤیسینا دیرۆكا خۆ،نەخاسمە لسەردەمێ نهۆ دەرفەتەكا زێرین هاتیە پێش،ژبەركو هەموو پێتڤیێن مادی و مرۆڤی لبەردەستن، ژ هەبوونا چینەكا نوو یا ڤەكۆلەر و رۆژنامەڤان ومامۆستایێن ئێزدی ل زانكۆیان و هەبوونا ئالاڤێن تەكنەلۆژی و ئینترنێت و پەرتۆكخانە و ژێدەرێن زانستی،دیسان ئەو ئازادیا هاتیە پێش بۆ ئێزدیان ب تایبەت ل كوردستانێ و وەلاتێن دەرڤە كو دكارن ب ئازادانە ودوور ژ فشارا دەستهەلاتدار و حاكمان دیرۆك وكلتۆر و ئایینی خۆ بدەنە ناسكرن بۆ جیهانێ.
لدۆر رەوشا ئێزدیا و ئاسویێن پاشەرۆژێ مامۆستایێ زانكۆیا دهۆكێ گۆت:چوو سەركەفتن و گەهشتن ب ئارمانجان بێ رەنج و قوربانیدان نابت،قۆناغێن سەختر ژ یێت بەری نهۆ ل پێشیا ئێزدیان ماینە چ ل كوردستانێ و چ ل دەرڤە و دڤێت نفشێ ئێزدی یێ نوو هەڤگرتی ل بەرامبەر ڤان مەترسیا ب راوەستت،ژبەر هندێ بەرپرسایەتیەكا مەزن لسەر مللێت وانە كو بەردەوامیێ بدەنە كار و خەباتێن كەسێن بەری خۆ دبوارێ ئێزدیناسیێ دا كاركرین،داكو ناسنامە و هەبوونا ئێزدیان هەر بمینت ب تایبەت لڤی سەردەمی كو مەترسیا نەمان و ژناڤچۆنا مللەتێن بچووك هەیە دناڤا جیهانا سەرمایەداری و پێشكەفتنا بلەز یا تەكنەلۆژی دا.
ژلایەكێ دی ڤە مامۆستا ئەرشەد بەحس ل مەترسیێن خراب بكارئینانا ئامیرێن تەكنەلۆژی و تۆرێن سۆشیال میدیا و چاڤلێكرنا كۆرە یا گەنجان دكت و دیاركر،دڤێت ب هەستیاری سەرەدەری لگەل بێتە كرن و خەلكێ مە ئاگەهداری لایەنێ خرابێ ڤان ئالاڤا بت ، ئەگەر نە مەترسی لسەر هەبوون و ناسناما مە یا كلتۆری و ئایینی هەیە،ژبەركو دناڤا ڤێ ئابۆرا مەزنا تەكنەلۆژیایێ دا سنوور نینن و ئەگەرێ حەلاندنا مەللەتێن بچووك وەكی ئێزدیان بتر هەیە، ژبەر هندێ دڤێت ژلایەكی ڤە ئەم مفای ژڤێ تەكنەلۆژیایێ وەرگرین و بكەینە دخزمەتا ناساندنا كلتۆر و ئایین و دیرۆكا خۆدا ب رێیێن زانستی و دوور ژ توندرەویێ،ژلایەكی دی ڤە ئاگەهداری گەنجێن خۆ یێن نوهاتی بین كو ئینتیمائا خۆ یا ئایینی و نشتیمانی ژ دەست نەدەن ل بن سیبەرا ڤێ ئازادیێ.
تُتاح هذه الصورة أيضا في: کوردی