ل كەمپان پەیوەندیێن خێزانی و جڤاكی بهێز و مكوم دبن
تۆرا لالش:
پشتی جینۆسایدا بسەرێ ئێزدیان دا هاتی ل شنگال لسەر دەستێ رێكخراوا داعش یا تیرۆری،ب هەزاران خەلك دەربەدەر و ئاوارەی پارێزگەها دهۆكێ بوون و ل ناڤا چەندین كەمپان دا هاتن ئاكنجیكرن، پشتی ئاوارەبوونێ خۆگونجاندنەكا باش دناڤبەرا ئاواران دا پەیدابوویە و پەیوندەیێن خێزانی و جڤاكی بتر خورت و بهێز و مكوم بووینە،هەروەسا ئاستێ رەوشەنبیری دناڤا خەلكی دا بلندبوویە و ئاریشێن جڤاكی ژی گەلەك كێمبووینە.
ئەحمەد خەلەف،ئاوارەیەكێ شنگالێ یە بەحسێ تێكەلیێن جڤاكی و شەڤبێریێن ل كەمپان دكت و بۆ رۆژناما دەنگێ لالش دیاركر، پەیوندەیێن خورت بەریا سالا(2014)ێ دناڤ خەلكێ شنگال دا نەبوون،ژبەركو دەڤەرا مە ژ روویێ رووبەری ڤە مەزن بوو و ئاكنجی د زۆربوون،پشتی ئاوارەبووین ل ناڤا كەمپان دا ئاكنجی بووین بتر پەیوندەیێن مە خورت و بهێز بوون و پەیوەندیێن باش یێن جڤاكی دناڤ ئاوارێن ئێزدی دا دروستبووینە،ژبەركو هەر خێزانەك ژ گوندەكی یان كۆمەلگەهەكا شنگالە،هەروەسا خۆ گونجاندنەكا باش دناڤ ئاواران دا هەیە نهۆ بتر خەلك هاتن و چۆنا دەڤەرێن ئێكدوو دكن و دانوستاندنێن دناڤبەرا ئێزدیان دا بهێزترن،بەریا نهۆ ئەڤ چەندە یە كێم بوو یان دكارم بێژم نەبوو و ڤێگاڤێ هەموو دگەل ئێك هاریكارن،گۆتژی پشتی ئاوارەبوونێ و ئاكنجی بووین ل كەمپان كا چاوان ل شنگال شەڤبێری هەبوون هەمان كلتۆر ل كەمپان ژی هەیە و بەردەوام ژبۆ خورتكرنا پەیوەندیێن جڤاكی ئەم ب شەڤ شەڤبێریێن خۆ ئەنجام ددەین،هەروەسا چ پرسگرێگ دناڤ ئاوارەیان دا نینن هەگەر هەبن ژی ب تبلێن دەستان دئێنە هژمارتن،و داخوازا بتر مكومكرنا پەیوەندیێن جڤاكی دناڤ هەموو ئێزدیان دا دكەم.
هەر لدۆر خورتكرن و بهێزكرنا پەیوەندیێن جڤاكی دناڤ ئاواران دا،بەرپرسێ گرۆپێ هیڤی یێ خۆبەخش(فەیسەل حەجی) بۆ رۆژناما دەنگێ لالش دبێژت:ئارمانجا مە ژ دامەزراندنا ڤی گرۆپی ژ سالا (2015)تا نهۆ خزمەتكرن و رەوشەنبیركرنا گەنج و جڤاكی یە بێ جیاوازیا ئۆلی و رەگەزی،ب تایبەت دناڤ ئاواران و شنگال و هەموو دەڤەرێن ئێزدیان دا،هەروەسا هەفتی كارمەندێن مە هەنە واتە پەیوەندیێن جڤاكی دناڤ وان دا دروستبووینە و كارێن خێرخوازی بەردەوام دئێنە ئەنجام دان ل هەموو دەڤەرێن ئێزدیان،داخوازێ ژ هەموو گەنج و لاو و مامۆستا و ئافرەت و قوتابیان دكەین پەیوەندیێن خۆ خورتر بكن.
(میرزا عەلی) وەكو جڤاكناسەك خورتكرنا پەیوەندیێن جڤاكی دناڤ ئاواران و ئێزدیان دا ب باشی دبینت و بۆ رۆژناما دەنگێ لالش خویاكر، هەبوون و خورتكرنا پەیوەندیێن جڤاكی دناڤ ئاواران و هەموو ئێزدیان دا پێشڤەچۆنەكا گەلەكا باشە تایبەت پشتی جێنوسایدا بسەرێ ئێزدیان دا هاتی،پێتڤیە ئەم هەموو حەز ژ هەڤدوو بكەین و پەیوەندیێن جڤاكی خورتر بكەین،هەروەسا ئاستێ رەوشەنبیری دناڤ ئێزدیان دا گەلەك یێ باشە و ئاریشێن جڤاكی گەلەك كێمبووینە و پێتڤیە بتر هەڤكار و هاریكاربین دگەل ئێكدوو د هەموو سێكتەرێن رەوشەنبیری و ژیانێ دا.
تُتاح هذه الصورة أيضا في: کوردی