تۆرا لالش
ئيرۆ شهمبوويێ 15-2-2025ێ، ل دهمژمێر 10ى سپێدێ ل هۆڵا كۆنفرانسان ل زانكۆیا دهۆكێ ب پشتهڤانى یا رێزدار مهسرور بارزانى، سهرۆكێ حكومهتا ههرێما كوردستانێ، ڤیستهڤالا لالش یا ڕهوشهنبیری ب چهندين پهنهل و برگهيێن جۆرا و جۆر يێن كهلتوورى هاته گێڕان.
ب ئامادهبوونا ميرێ ئێزديان و بابێ شێخ و د. كاروان محهمهد سابير، ژ نڤيسينگهها بهڕێز(مهسرور بارزانى) سهرۆكێ حكومهتا ههرێما كوردستانێ و ماجد سهید سالح، نونهرێ پارێزگارێ دهۆكێ و ههژمارهكا مەزن یا بهرپرسێن دامودهزگەهێن حكومی و حزبی و كهسایهتیێن ئۆلی و جڤاكى و خهلكێ دهڤهرێن جودا یێن ئێزدیان، بنگههێ لالش یێ رهوشهنبیری و كۆمهلایهتی ل دهۆكێ ڕێورهسمێن فیستهڤالا لالش یا رهوشهنبیری 2025 لژێر دروشمێ (كهلتورێ مه سهرهكانیا ڕهسهنایهتیا مهیه) گێڕا.
وهك رێزگرتن بۆ گيانێ جانگۆريێن كوردستانێ، ل دهستپێكێ ئامادهبوويی خۆلهكهكێ راوهستيان و لدووڤدا ڤيستهڤالێ ب موزيكا پيرۆزا ئيزديان دهڤ و شبابا دهستپێكر.
ل پێرا سهعيد جردۆ، سهرۆكێ بنگههێ لالش پهيڤا بخێر هاتنێ پێشكێشكر و دياركر، شانازيێ دبهين بۆ سازدانا ڤێ ڤيستهڤالا گرنگ ب پشتهڤانى يا رێزدار(مەسرور بارزانی) سەرۆكێ حكومەتا هەرێما كوردستانێ و ئارمانج ژڤێ ڤيستهڤالێ پيشاندانا كهلتوور و فلكلۆرێ ڕهسهنێ ئێزديانه.
پاشان تیپا شاریا یا هونهرێ مللی تابلۆیهكا هونهری پێشكێشكر، د بڕگهیهكا جودا یا ڤیستهڤالێ دا ژبهر كارێ وی یێ پیرۆز خهلاتێ فیستهڤالێ يێ سالانه ژلایێ میر حازم بهگ، میرێ ئێزدیان و سهعید جردۆ، سهرۆكێ بنگههێ لالش ڤه ب بابێ چاویش هاته دان.
ههروهسا دبرگهيهكا دى دا، جۆرێن سترانان و شرۆڤهكرنا وان د كهلتوورێ ئێزدیان ده مینا خزیمۆك و پایزۆك، غهریبی و سترانێن شهران و ئهڤینێ ژلایێ ئيسمایل شێخ میرزۆ و مهروان داود و ناتۆ سلۆ ڤه هاتنه بهحسكرن.
ههر ديسان چهند موزیكژهنێن كچ و خورتێن ئێزدی چهند جۆرێن ئامیرێن موزیكێ یێن گرێدایی كهلتوور و فلكلۆرێ ئێزدیان ڤه ژهنین.
فلمهكێ دیكيۆمێنتاری ل دۆر پاراستنا كهلتووری ل گوند و دهڤهرێن ئێزدیان ژ دهرهێنانا مازن ئێسیانی ڤه هاته پێشكێشكرن.
دووڤدا تیپا رهسهن یا موزیكی چهندین دیلانێن مللی یێن گرێدایی ب ئێزدیان ڤه ب تابلۆیهكێ پێشكێشكرن.
ئارمانج ژ ڤیستهڤالا لالش يا رهوشهنبيرى يا سالانه پيشاندانا كهلتوور و پاراستنا فلكلۆرێ ڕهسهنێ ئێزدیانه.
دبرگهيا داويێ دا، ب ههماههنگى لگهل تايێن بنگههێ لالش پێشانگهههك ل دۆر كهلتوورێ ئێزديان هاته پيشاندان.
فیستهڤالا لالش يا سالانه ب پشتهڤانى يا حكومهتا ههرێما كوردستانێ ژلایێ بنگههێ لالش یێ ڕهوشهنبیری و كۆمهڵایهتی ل دهۆكێ دئێته گێڕان و تێدا چاند و هونهر و فلكلۆرێ ئێزدیان ب چهندین بڕگێن جیاواز دئێنه نمایشكرن.
مللهتێ ئێزدی پشتی چهندین فهرمان و كاودانێن سهخت ب سهردا هاتین كاريه كهلتوور و فلكلۆرێ خۆ بپارێزت.
تُتاح هذه الصورة أيضا في: کوردی