قووناغا ئێكێ یا ئۆپه‌راسیۆنا مووسل ب دووماهی هات
ئه‌ڤرۆ نیوز:
هێزێن عیراقێ پشتی گه‌هشتینه رووبارێ “الخوصە” ل به‌رێ چه‌پێ یێ مووسل دووماهی ب قووناغا ئێكێ یا ئۆپه‌راسیۆنا خوه بۆ كونترۆلكرنا باژێرێ مووسل ئینا.
لیوا روكن سامی عارز فه‌رماندێ هێزێن بژاره یێن دژه تیرۆرێ بۆ ئاژانسا “أین” راگه‌هاند، هێزێن وان گه‌هشتنه رووبارێ خه‌وسه ل به‌رێ چه‌پێ یێ باژێرێ مووسل و دووماهی ب قووناغا ئێكێ یا ئۆپه‌راسیۆنێ ئینا.
هه‌ر د ڤێ ده‌ربارێ دا گۆت: “ب ئێكگه‌هشتنا هێزێن عیراقی پێنگاڤه‌كا گرنگه بۆ ئۆپه‌راسیۆنا له‌شكری و ب له‌ز رزگاركرنا باژێرێ مووسل”.
هێزێن دژی تیرۆرا عیراقی هه‌ر ئه‌ڤرۆ چوونه ناڤ تاخێ فه‌لاحات ل لایێ چه‌پێ یێ باژێرێ مووسل.
ئۆپه‌راسیۆنا كونترۆلكرنا مووسل ل 17ی چریا ئێكێ 2016 ب فه‌رمانا فه‌رماندێ هێزێن چه‌كدارێن عیراقێ حه‌یده‌ر عه‌بادی و ب پشكداریا نێزیكی 100 هزار كه‌سان ژ هێزێن عیراقی و كوردستانی و تیمێن تایبه‌ت یێن ئه‌مریكا و پشته‌ڤانیا ئه‌سمانی یا هه‌ڤپه‌یمانان ده‌سپێكریه و هه‌تا نوكه زێده‌تر ژ نیڤا تاخێن لایێ چه‌پێ یێ مووسل كونترۆل كرینه.
ئه‌وی فه‌رماندێ له‌شكری یێ دژی تیرۆرێ ئاماژه ب وێ چه‌ندێ ژی كریه كو هێزێن وان رۆژا شه‌مبی هه‌رچار تاخێن قادسیه یا ئێكێ، نمور، مه‌شارق و شه‌خچیه‌یان ل رۆژهه‌لاتێ مووسل كونترۆل كرینه و هه‌تا نوكه 33 تاخ كۆنترۆل كرینه.
ل دووڤ ڤان گۆتنێن ئه‌ڤی فه‌رماندێ دژی تیرۆرێ ب تنێ 10 تاخ ل لایێ چه‌پێ یێ باژێرێ مووسل دمینن كو نه‌هاتبنه كونترۆل كرن.
تُتاح هذه الصورة أيضا في: کوردی