جەژنا رۆژیێن ئێزی
خالد خدر
ئۆلا ئێزدیا ژ ئۆلێت هەری كەڤن و دێرینە كو باوەری ب خودایێ ئێك و مەزن ئێزدانێ میهرەبان ئینای، و ئەڤ چەندە پتر دووپات دبیت دناڤا و قەول و سەبەقە و تێكستێن مەیێن پیرۆزێن ئۆلی دا ، و هەر وەسا دچارچووڤێ ب رێڤەبرنا رێورەسمێن مەیێن ئۆلی ، و جەژن و هەلكەفت و پیرۆزیێن ئۆلی دا كەلەك سیمایێن دێرین وكەڤن ب ئۆلا ئێزدیان ڤە خویا دبن ، و رەه وریشالێن ئێزدیاتیێ دگەهنە ئۆلا میترایی ( شەمسانی ،نوورانی ) ، ئەڤ چەندا هەنێ هیچ گومان و گەنگەشان ناوەرگرن، و بۆ دووپاتییا ڤێ چەندێ ئانكو خودا پەرێسییا ئۆلا ئێزدیان ، د ناڤ تێكستێن مەیێن ئۆلی دا هاتیە و ژ قەولێ زەبوونی مەكسور :-
براهیم خەلیل ژ نوقتەكا سادقە
هەرو ب سێ حەرفە دبوو مەنتقە
حەتا خودێ خۆ ناس كر ب حەقە
و ئێزدیاتی باوەریەكا گەلەك كەڤنە و دڤی دەربارەیی دا (مامۆستایێ هێژا پیر خدر سلیمان دبێژیت : ئێزدی ژ بەرمایكێن كەڤنترین كۆمێن مرۆڤایەتیێ نە یێن كو ژیاین ل میزۆبۆتامیا و كوردستانا نهۆ ، وكو ئۆلا ئێزدیان ژ كەڤنترین ئۆلێن كوردایە ل دەڤەرا لاندكا شارستانییەتان ل رۆژهەلات و باوەریا ئێزدیا بەری ئاڤیستایە بەلكو كەڤنترە ژ ڤیدا هندی ). بەلێ دیاركرنا دیرۆكا دەینان و دیاربوونا ئۆلا ئێزدیان كارەكی ئالۆزە و نەیێ ئاسانە و پێدڤی كەلەگ گرۆڤە و بەلگانە ، و ئێزدیاتی د سێ قۆناغێن سەرەكی را دەربازبوویە ، قۆناغا ئێكێ پەرستنا خوداوەندا و پیرۆزیا دیاردێن سرووشتی ، قۆناغا دووێ هزرا خودێ پەریسیێ كو ئێزدیان پەرستنا خودێ مەزن و میهرەبان كر وەك مە لسەری دیار كری و هەروەسا لگۆر سەبەقا قەولێ زەبونی مەكسور ، قۆناغا سیێ پشتی هاتنا شیخادیێ كورێ موسافری ژ شامێ بۆ لالشێ ، و ئە ریفۆرما وی و پشتی وی میراتگرێن وی كرین دناڤا ئۆلا ئێزدیاتیێ دا ، و ئێزدی سێ رۆژیان دگرن دبێژنێ رۆژیێن ئێزی (ئێزدان ،ئێزیدا ،ئێزدا ) و ئەڤ رۆژی یە دكەڤنە سێ شەمبووا ئێكێ ژ مەها كانوونا ئێكێ ب هژمارا شەرقی و هژمارا میلادی 13 رۆژا لپێش یا شەرقی یە ، رۆژێن سێ شەمبوو و چار شەمبوو و پێنچ شومبوو رۆژی گرتنە و رۆژا ئینیێ جەژنا رۆژیێن ئێزی یە ، و ئەڤ رۆژیێن هەنێ بۆ ئێزی خودێ نە و دباوەریا مە ئێزیان دا ئێزی ناڤە كە ژ ناڤێن خودێ ، ولگۆر ڤێ سەبەقا قەولی كو تێدا هاتیە ( ئێزی ) ناڤە كە ژ ناڤێن خودێ :-
سلتان ئێزی ب خۆ پەدشایە
هەزار و ئێك ناڤ ل خۆ دانایە
ناڤێ مەزن هەر خودایە
هەژی ئاماژەپێكرنێ یە كو مە ئێزیان جێواز ژ هەمی ئۆل و مللەتان ب شێوەكی گەلەك جوان و ژهەژی ،ناڤێ خودێ دبێژین و دئینینە سەر زمان و ب زمانێ خۆ یێ شرین و قەشەنگ هەر وەسا یێ كو هەمی قەول و بەیت و تێكستێن مەیێن ئۆلی پێ هاتینە دەینان ، ئەوژی ب ڤی رەنگی : خودێ – یێ كو خودا یێ ،خۆدایی ، ئێزدان – یێ كو ئەزدایی .
ژێدەر :
الایزدیون والتراپ الكوردی /پیر خدر سلیمان ، گۆڤارا لالش هژمارا (14) بەرپەرێ (8)
تُتاح هذه الصورة أيضا في: کوردی