فواد مەعسووم سەره‌دانا بارزانی دکت
باسنيۆز:
سەرۆک کۆماری عێراق، سەردانی سەرۆکی هەرێمی کوردستان دەکات و چاوەڕوان دەکرێت، چەند داوایەکی پێشکەش بکات.
سەرچاوەیەک لە سەرۆکایەتیی هەرێمی کوردستان، بە (باسنیوز)ی ڕاگەیاند، کاتژمێر 12:30 خولەکی نیوەڕۆی ئەمڕۆ دووشەممە 6\2\2017، فواد مەعسووم، سەرۆک کۆماری عێراق، لە بارەگای سەرۆکایەتیی هەرێمی کوردستان، سەردانی مەسعود بارزانی، سەرۆکی هەرێمی کوردستان دەکات.
ئەوەشی ڕوون کردەوە کە مەعسووم لەگەڵ مەکتەبی سیاسیی یەکێتیی نیشتمانیی کوردستان کۆبووەتەوە و داوای لێ کردوون کە لەبارەی بابەتەکانی عێراقەوە، یەک گوتاریی خۆیان بپارێزن و هەڵوێستیان لەگەڵ لایەنە کوردستانییەکان بێت، هاوکات داوای لە یەکێتی کردووە کە هەڵوێستی فراکسیۆنەکە لە بەغدا لە هەڵوێستی سەرکردایەتیی حزبەکە جیا نەبێت.
سەرچاوەکە ئەوەشی بۆ (باسنیوز) ئاشکرا کرد: ”ڕەنگە لە کۆبوونەوەکەدا مەعسووم داوا لە بارزانی بکات، کاندید بۆ پۆستەکانی کورد لە بەغدا پێشکەش بکرێت، بەڵام ئەو بابەتە بەلای هەرێمی کوردستانەوە گرنگ نییە، چونکە هیچ بنەمایەک بۆ وەرگرتنەوەی پۆستی وەزیری دارایی لە کورد نەبوو، بۆیە ئەگەر ئەو داوایە بکات، وەڵامێکی یەکلاکەرەوەی نادرێتەوە“.
هەر لەمبارەیەوە، عەبدوڵا عەلیاوەیی، ڕاوێژکاری سەرۆک کۆماری عێراق، بە (باسنیوز)ی ڕاگەیاند: ”سەردانەکە ئاساییە و بۆ باسکردنی عێراق و پەیوەندییەکانی هەولێر و بەغدا و ڕەوشی ناوچەکەیە“. بەڵام وردەکاریی زیاتری نەخستەڕوو.
تُتاح هذه الصورة أيضا في: کوردی