پەیاما بارزانی ب ههلكهفتا نەورۆز و سەرێ سالا كوردی
رووداو – هەولێر
مەسعود بارزانی، سەرۆكی هەرێمی كوردستان، لە پەیامێكدا بەبۆنەی جەژنی نەورۆز و سەری ساڵی كوردی، پیرۆزبایی لە هاونیشتمانیانی هەرێمی كوردستان و هەموو كوردانی ناوەوە و دەرەوەی وڵات و هەموو پێكهاتە نەتەوەیی و ئایینییەكانی كوردستان دەكات.
لە پەیامەكەیدا بارزانی مانگی ئازار بە مانگی سەركەوتن و خۆشی و ئێش و نەهامەتییەكانی گەلی كوردستان پێناسەدەكات و دەڵێت “لەگەڵ ئەوەیشدا ئازار و نەورۆز بۆ گەلەكەمان هێمای تێكشكاندنی زوڵم و دەركەوتنی رووناكی و ژیانەوە دەدەن و ئەوەیش بەو مانایە دێت كە قوربانیدان و خەبات ئەنجام و بەرهەمی دەبێت”.
بە ئاماژەكردن بە تێكشكاندنی داعش و بەردەوامبوون لەسەر كاركردن بۆ سەربەخۆیی كوردستان، بارزانی دەشڵێت “خۆڕاگری و قوربانیدانی بێ هەژماری گەلی كوردستان لە قۆناغە سەختەكانی خەباتدا هەر لە بەرگریكردن لە مان و ناسنامەییەوە بگرە هەتا تێكشكاندنی تیرۆریستانی داعش دەبێ ئەنجامی هەبێت و پێویستە ئەو خەبات و دەستكەوتانە یەك هەنگاویش بەرەو پاشەوە نەڕۆت و دەبێ گەلی كوردستان بگاتە سەروەریی خۆی و خاوەن بڕیار و چارەنووس و ژیانی خۆی بێت. هەر ئەوەیشە باشترین وەڵام و باڵاترین وەفا بۆ خوێنی شەهیدان و قوربانیدانی گەل”.
سەرۆكی هەرێمی كوردستان داوا لە خەڵكی كوردستان دەكات ئومێدیان بەهێزبێت، چونكە بەدڵنیاییەوە خۆڕاگرییەكەیان بەرهەمی دەبێت: “داوا دەكەم لە بەرانبەر هەر هەوڵ و دەنگێكدا خۆڕاگربن كە بیەوێ بڕوابەخۆبوونیان لێبستێنێتەوە و پاشكۆیی بچەسپێنێت”.
دەقی پەیامەكەی مەسعود بارزانی، سەرۆكی هەرێمی كوردستان
بەناوی خودای بەخشندە و میهرەبان
بەبۆنەی جەژنی نەورۆز و سەری ساڵی كوردییەوە گەرمترین پیرۆزبایی خۆم ئاڕاستەی هاووڵاتیانی هەرێمی كوردستان و هەموو كوردانی ناوەوە و دەرەوەی وڵات و هەموو پێكهاتە نەتەوەیی و ئایینییەكانی كوردستان دەكەم. هیوای ساڵێكی خۆش و پڕ لە بەرەكەت و بەختەوەری بۆ هەموو لایەك دەخوازم.
مانگی ئازار مانگی سەركەوتن و خۆشی و ئێش و نەهامەتییەكانی گەلی كوردستان بووە. لەگەڵئەوەیشدا ئازار و نەورۆز بۆ گەلەكەمان هێمای تێكشكاندنی زوڵم و دەركەوتنی ڕووناكی و ژیانەوە دەدات و ئەوەیش بەو مانایە دێت كە قوربانیدان و خەبات ئەنجام و بەرهەمی دەبێت.
خۆڕاگری و قوربانیدانی بێ هەژماری گەلی كوردستان لە قۆناغە سەختەكانی خەباتدا هەر لە بەرگریكردن لە مان و ناسنامەییەوە بگرە هەتا تێكشكاندنی تیرۆریستانی داعش دەبێ ئەنجامی هەبێت و پێویستە ئەو خەبات و دەستكەوتانە یەك هەنگاویش بەرەو پاشەوە نەڕوات و دەبێ گەلی كوردستان بگاتە سەروەریی خۆی و خاوەن بڕیار و چارەنووس و ژیانی خۆی بێت. هەر ئەوەیشە باشترین وەڵام و باڵاترین وەفا بۆ خوێنی شەهیدان و قوربانیدانی گەل.
ئەو قوربانییەی گەلی كوردستان داویەتی و ئەو فەرهەنگە بەرزەی لە پێكەوەژیان و لێبوردەییدا هەیەتی و ئەو قارەمانێتییەی پێشمەرگە تۆماری كردووە، لەچاوی جیهانیاندا شاراوە نییە و ئێستا جیهان شانازی بە گەلی كوردستان و پێشمەرگە دەكات.
لەم بۆنەیەدا داوا لە خەڵكی سەربەرزی كوردستان دەكەم ئومێدیان بەهێز بێت چونكە بە دڵنیاییەوە خۆڕاگرییەكەیان بەرهەمی دەبێت. داوا دەكەم لە بەرانبەر هەر هەوڵ و دەنگێكدا خۆڕاگر بن كە بیەوێ بڕوابەخۆبوونیان لێ بستێنێتەوە و پاشكۆیی بچەسپێنێت. نەورۆز لە خانەوادەی سەربەرزی شەهیدان و هەموو پێشمەرگە قارەمانەكان پیرۆز دەكەم.
هەر لە خۆشیدا بن.
مسعود بارزانی
20ـی 3ـی 2017
تُتاح هذه الصورة أيضا في: کوردی