پێلەکا بەفر و باران دێ ب سەر ھەرێمێ دا ھێت
ئەڤرۆ نيوز:
رێڤەبەریا گشتی یا سەقاناسی و بیڤەلەرزان ل ھەرێما کوردستانێ راگەھاند کو ل دووماھیا ڤێ حەفتیێ دێ پێلەکا بەفر و باران ب سەر ھەرێما کوردستانێ دا ھێت.
فازل ئیبراھیم، رێڤەبەرێ گشتیێ سەقاناسی و بیڤەلەرزێ ل ھەرێما کوردستانێ د داخۆیانیەکێ دا بۆ ئەڤرۆ نيوز گۆت: “رۆژا چارشەمبی دھێتە پێشبینیکرن پێلەکا باران بارینێ ھەرێما کوردستانێ ڤەگریت و دێ ھەوایەکێ سار ل گەل خوە ئینیت و پلێن گەرمێ دێ ھێنە خوار”.
زێدەتر گۆت: “پلێن گەرمێ ل دەڤەرێن چیایی دێ چنە د بن سفرێ دا ئانکو پلێن بەستینێ و ھەتا سپێدەھیا رۆژا ئەینی دێ یا بەردەوام بیت و ژبلی ڤێ چەندێ ژی دێ بیتە ئەگەر کو بەفر ل دەڤەرێن چیایی بباریت”.
ئاشکەرا ژی کر کو ھەتا نوکە وەکو د نەخشەی دا ھاتیە دیارکرن ب تنێ ل سەنتەرێ باژێرێ سلێمانیێ دھێتە پێشبینیکرن بەفر بباریت، بەلێ ژ بەر کو دھۆک دەڤەرەکا چیایی یە ئەگەرێ بەفر بارینێ ل وێرێ ژی ھەیە.
ب گۆرەی راپۆرتەکا سەقاناسیا عیراقێ ژی دھێتە پێشبینیکرن ل پارێزگەھێن ھەرێما کوردستانێ و ناڤەراستا عیراقێ بەفر بباریت و ل پارێزگەھێن باشوور ژی باران.
تُتاح هذه الصورة أيضا في: کوردی