بریتانیا: پشتهڤانییا حكومهتهكا بهێز ل ههرێما كوردستانێ دكهین
WAAR-دهۆك:
بریتانیا پشتهڤانییا خوه بۆ چارهكرنا كێشهیێن ههولێر و بهغدا و حكومهتهكا بهێز ل ههرێما كوردستانێ راگههاند.
ل گۆرهیی مالپهرێ فهرمی یێ حكومهتا ههرێمێ، نێچیرڤان بارزانی سهرۆكوهزیرێ ههرێما كوردستانێ پێشوازی ل جۆن وێلكس بالیۆزێ بریتانیا ل ئیراقێ و شاندهكا ل گهل كر و بالیۆزێ بریتانیا پێشوازی ل رێكهفتنا ههولێر و بهغدا و ڤهكرنا فرۆكخانهیێن ههرێما كوردستانێ كر و دیاركر، دانوستاندنێن نێچیرڤان بارزانی و حهیدهر عهبادی ههردو ئالی ڤهگهراندن رێكهفتنێ و پشتهڤانییا وهلاتێ خوه ژی بۆ چارهكرنا كێشهیێن ههولێر و بهغدا دوپات كر.
ههروهسا پشتهڤانییا بریتانیا بۆ حكومهتهكا بهێز ل ههرێما كوردستانێ راگههاند و دا زانین، دێ هاریكاریێن وان بۆ ههرێما كوردستانێ بهردهوامبن و خواست ژی پهیوهندیێن ههرێما كوردستانێ و بریتانیا د ههموو بیاڤان دا بهێنه پێشخستن، ب تایبهتی د بیاڤێن ئاڤهدانكرن و دپلۆماسیهتێ دا.
نێچیرڤان بارزانی ژی بریارێن حكومهتا ئیراقێ ب تایبهت ڤهكرنا فرۆكهخانه و هنارتنا پشكهكا مووچهیێ فهرمانبهرێن ههرێمێ ب ئهرێنێ ل قهلهم دا و ب گاڤهكا باش بۆ قوناغهكا باشتر و چارهكرنا كێشهیان ناڤكر.
سهرۆكوهزیر بارزانی ب پێدڤی زانی ههڤپهیمان و ههولێر و بهغدا كار ل سهر پرۆژهیهكێ ههڤپشك بۆ رێگریكرنێ ل سهرهلدانا تیرۆرێ ل دهڤهرێ بكهن و بهرههڤیا ههرێمێ بۆ ههماههنگیێ د ڤی بیاڤی دا نیشان دا
تُتاح هذه الصورة أيضا في: کوردی