مەسروور بارزانی: پێدڤیە ئەنفال ب جینۆساید بهێتە ناساندن
گاڤ نیوز
سەرۆکێ حکومەتا هەرێما کوردستانێ پەیامەک بۆ یادا 33 سالیا ئەنفالا بەهدینان بەلاڤ کر و تێدا داخواز ژ حکومەتا ئیراقێ کر ب زویترین دەم کەسوکارێن وان ئەنفالکریان قەرەبۆ بکەت.
مەسروور بارزانی د پەیاما خۆ دا نڤیسیە “ل دوماهی قووناغا پێلا ئەنفالێ رژێما بەعس یا ئیراقێ پرۆسەیا ئەنفالکرنا دەڤەرا بەهدینان دەست پێ کر و د ئەنجام دا، ب هزاران مرۆڤێن بێتاوان ژ پێکهاتەیێن جودا یێن دەڤەرێ شەهید و بێسەروشین کرن، ب سەدان گوند وێران کرن و ب دەهان هزار کەس ژی ئاوارە و دەربەدەر کرن”.
هەروەسا نڤیسیە “د ڤێ هەلکەفتا خەمگین دا جارەکا دی دوپات دکەین کو پێدڤیە حکومەتا ئیراقێ قەرەبۆیا کەسوکارێن قوربانیێن تاوانێن جینۆسایدا ئەنفالێ بکەت، دێ ل سەر بزاڤێن خۆ بەردەوام بین بۆ ب جینۆساید ناساندنا ئەنفالان ژ ئالیێ جڤاکا نێڤدەولەتی ڤە. هەروەسا حکومەتا هەرێما کوردستانێ ژی پێگیریا خۆ ب خزمەتکرنا زێدەتر یا کەسوکارێن ئەنفالکریان دوپات دکەت”.
تُتاح هذه الصورة أيضا في: کوردی