سهرۆك بارزانى: ئهم دێ د بزاڤێن خۆ دا بهردهوام بين تا كو روفاتێن ههمى ئهنفالكريان ڤهدگهڕینین
گاڤ نيوز
سهرۆك بارزانى ئهڤرۆ رۆژا شهمبيێ د رێورهسمێن پێشوازيكرنێ ل ڤهگهڕاندنا روفاتێن 100 ئهنفالكريێن بارزانيان دياركر كو پێدڤيه كهلتۆرێ لێبۆرينێ جهێ كهلتۆرێ رهتكرنێ بگريت.
سهرۆك بارزانى د پهيڤهكێ د چارچووڤهيێ رێورهسمان دا دياركر؛ پێدڤيه كهلتۆرێ لێبۆرينى جهێ كهلتۆرێ رهتكرنێ بگريت و رێك ل دوبارهبوونا ڤان كارهستان ل پاشهرۆژێ بهێته گرتن.
خۆيا ژى كر؛ ههمى ئاريشه و ناكۆكيێن ل ئيراقێ و ب تايبهت يێن دناڤبهرا ههولێرێ و بهغدا دا قابلى چارهسهركرنێ نه ئهگهر نيهتێن پاقژ و ئيرادهيهكا راست ههبيت ژبلى وان ناكۆكيێن كو لايهنێ بهرانبهر رهتدكهن كو د كهلتۆرێ شۆفينى يێ رژێما ئيراقێ يا بهرێ دا دژى كوردان بهرجهسته دبيت.
ديار ژى كر؛ پێدڤيه كهلتۆرێ رهتكرنا يێ دى نهمينيت و بهرهڤ كهلتۆرێ لێبۆرينێ، پێكڤهژيانێ و ڤيانێ ڤه بچين.
راگههاند ژى؛ ئهنفالكرنا بارزانيان خهلهكهك بوو ژ زنجيرهيا تاوانێن رژێما بهرێ، ئهم دێ د بزاڤێن خۆ دا بهردهوام بين تا كو روفاتێن ههمى ئهنفالكريان بهێنه ڤهگهڕاندن.
ئاماژه دا وێ چهندێ ژى؛ ههر ژ سالا 2003 وهره دهستوور ل ئيراقێ هاتيه پشتگوههاڤێتن و كار پێ نههاتيه كرن.
رێورهسمێن ڤهگهڕاندنا روفاتێن 100 ئهنفالكريێن بارزانيان ئهڤرۆ رۆژا شهمبيێ ل ههولێرێ برێڤهچوو.
رێورهسم ب بهرههڤبوونا ههر ئێك ژ سهرۆك بارزانى، نێچيرڤان بارزانى سهرۆكێ ههرێما كوردستانێ و جينين پلاسخارت نوينهرا نهتهوهيێن ئيكگرتى ل ئيراقێ و ژمارهيهكا بهرپرسێن سياسى و لهشكهرى برێڤهچوو.
تُتاح هذه الصورة أيضا في: کوردی