تۆرا لالش
پێشەکی: بابەتەک نە بۆ کینێ، بۆ بیرهاتنێ
ئەم ل ڤێده‌رێ باسێ ئێزدیا ناکەین وەکی ژمارەیه‌کا دەنگا ل پەرلەمانی، یان وەکی کارتەکا سیاسی ل بەغدا، ئەم باسێ ناسنامە، ئاخ، ئول و دیرۆکەکا ٧٤ فەرمانان دکەین.
ئەڤە ماوەکە هندەک کەس ب ناڤێ ئێزدییا و شنگالێ دەرکەفتینە سەر شاشەیێن تەلەڤیزیونێ و تورێن کۆمەلایەتی، ئەو خۆ ددەنه دیارکرن وەکی ڕێبەر و مەرجەع، لێ د ڕاستی دا ئەو نە ڕێبەرن و نه‌مه‌رجه‌عن، نە پارێزەرن، ئەو بازرگانێن ب خوین و ب ناڤێ قوربانیێنە، بێ شەرم و بێ عەیب دبێژن، ئەم دگەل عەرەباین و نە کوردستانین، و دژاتیا کورد و کوردستانێ دکەن.
ئەڤە ڕایەکی سیاسی نینە. ئەڤە خوفروشیە.
١. کێ بەرەڤانی ژ شنگالێ کر و کێ قوربانی دا ؟
ئەڤ کەسە ژ بۆ مانا خۆ ل پەرلەمانێ ئیراقێ، ژ بۆ کۆمکرنا چەند دەنگەکا، ژ بۆ ترسا ژ تیک تۆکچیا و رازی کرنا ئەفسەرێن لەشکەرێ ئیراقێ و حەشدا شعبی، هەر تشتەکی دبێژن، ئەو خۆ د لاوازن، نە مێرخاسن، نە شۆرەشڤانن، نە پێشمەرگەهن، نە زێرەڤانن نە چەک هه‌لگرێن پاراستنا شنگالن.
هەكەر پارێزەر و شەرڤان بان، وەکی حەیدەر شەشو و قاسم شەشو و قاسم ده‌ربۆ و ب سەدان مێرخاسێن شنگالی بان، نە دێ ژ دەنگدانێ ترسیان، نە ژ تیک توکێ، وان دێ ڕاستیا دیرۆکێ بێ ترس گۆتبا، لێ ئەڤە ئەو نینن، ئەڤە ئەون خۆ ب مووچەکی و پۆستەکێ و وێنەکێ دگەل بەرپرسەکێ حەشدێ فرۆتینە.
٢. ئێزدی کینە؟ ناسنامە، زمان، ئۆل و ئاخ
ئێزدی بەشەکێ ڕەسەن و بنەڕەتی یێ گەلێ کوردن، نە ژ ئێراقێ هاتینە، نە ژ عەرەبا، نە ژ دەریایێ هاتینە، دیرۆکا وان دیرۆکا کوردستانێ یە.
زمان: زمانێ ئێزدیا کوردیە، کورمانجیە، دایک و باب و کال و باپیرێن وان ب کوردی ئاخڤتینە، ستران، دوعا، قەسیدە و چیرۆکێن وان ب کوردینە.
ئۆل: ئولا ئێزدیاتیێ ئۆلا کوردانە، ئولا ڕەسەنە، لالشا نورانی نە ل بەغدایە، نە ل نەجەفێ یە، نە ل کەربەلایە. لالش د دلێ کوردستانێ دایە، ل دەڤەرا شێخانێ یە، ل سەر ئاخا کوردستانێ یە، ئەو بنەکوک و کولیلكا کوردستانێ یە.
ئاخ: شنگال چیایێ کوردستانێ یە، شنگال نە عەرەبستانە، نە دەشتا عەرەبانە، شنگال ب چیایێ خۆ، ب گوندێن خو، ب لالشا خو ڤە کوردستانیە.
ئەوێن شک و گومان ل کوردستانیبوون و کوردبونا ئێزدیا و شنگالێ هەیی، بلا شه‌رمێ ژ دیرۆک، زمان و ئۆل و ئاخا خۆ بكن.
٣. شنگال و ٧٤ فەرمان: بیرهاتنێن كۆمکوژییان
شنگالێ ٧٤ فەرمان دیتینە، ٧٤ جار کوشتار و تالان و بەرەڤانیکرن و کۆچبەرکرن، هەر جار ب دەستێ داگیرکەر و نەیاران هاتیە، لێ چ جار ئێزدیان دەست ژ کوردستانیبوونا خۆ بەردا نە.
د فەرمانا ٧٤ێ دا، ل ٢٠١٤ێ، کوردستانێ و گەلێ کورد خۆ ل شنگالێ و ئێزدیان کرە خودان، دەرگەهێ مزگەفتان ڤەکرن و بەتەنیێن سەر زاڕۆکێن خو دانە زارۆکێن ئێزدیان، کورێن خۆ بۆ شنگالا خۆراگر شەهید کرن.
ئەڤە دیرۆکە، نە پروپاگەندە یە. ئەوێن ئیرۆ دبێژن ئەم دگەل عەرەباین، ئەو هەمان كه‌سن کو ئیرۆ دژی هەبوونا ئێزدیاتیێ و پیلانا دادڕێژن ژ بۆ پاشەڕۆژەکا وندا.
٤. حەشد و ٤٠ گروپێن چەکدار
هێشتا ٤٠ گروپێن چەکدار ل ئێراقێ هەنە، نە یەک، نە دوو، ٤٠، هەموو ب ناڤێن جودا، لێ ب ئارمانجەکا هه‌ڤپشك، داگیرکرنا شنگالێ و بێدەنگکرنا ئێزدیا و کوردا.
حەشدا شەعبی و گروپێن ب سەر ڤە، شنگال کرینە قادا خو یا لەشکەری، نە ژ بۆ پاراستنا ئێزدیا، ژ بۆ کۆنترولکرنا ئێزدیا، ئەو دخوازن شنگال ژ کوردستانێ ببڕن و بکەنە پارچەکا ئێراقا عەرەبی.
هندەک ئێزدیێن خۆفرۆش بوونە کرێگرتیێن ڤان گروپا، ب مووچەکی، ب پۆستەکێ، ب پاراستنا خۆ، خۆ فروتینە، نە ژ بۆ خەلکی، ژ بۆ خۆ.
٥. یەبەشە و هەڤپەیمانیا ئێزدیان: رادەستبون ل سەر بانگەوازیا ئیمرالی و قەندیلێ
سەرانیێن یەبەشە و بەرپرسێن هەڤپەیمانیا ئێزدیان خۆ رادەستێ عەرەبا کرن ل سەر بانگەوازیا ئیمرالی و قەندیلێ.
چەند سالن وان ب ناڤێ ئێزدیاتییێ، ئێزدیا ژ کوردستانێ دووردخن و بەرەڤ عەرەبا دبەن، وان شنگال کرە جهێ ململانێیا حیزبی و ئایدیولوژی، وان خەلکێ شنگالێ کرە قوربانیێن سیاسەتا قەندیل و ئیمرالیێ.
ئەڤ بەرپرسە دبێژن ئەم نەکوردین، ئەم ئێزدینە، بێ شەرم دبێژن ل دەمێ لالشا نوورانی هەموو دیرۆکا خۆ ب کوردی گۆتیە، ئەڤە دبێژن ل دەمێ زارۆکێن شنگالێ ب کوردی دگریان و دایکێن وان ب کوردی شین دکر.
ئەڤە نە خەباتە، ئەڤە خۆفروشییە.
٦. پەرلەمان، دەنگ و تیک توک
هندەک ژ وان یێن بوونە پەرلەمانتار ل بەغدا، ژ بۆ مانا خو ل وێده‌رێ، ژ بۆ ترس ژ دەنگ ونداکرنێ، ژ بۆ ترسا ژ تیک تۆکچیا، هەر تشتەکی دبێژن، ئیرۆ دبێژن ئەم عەرەبین، سبە دبێژن ئەم نە کوردین، دوسبە دبێژن ئەم دگەل حەشدن.
ئەڤە پەرلەمانتاری نینە، ئەڤە بازرگانیا ب دەنگێ قوربانیان، دەنگێ ئێزدیێن شنگالێ، دەنگێ وان ژنێن هێشتا د دەستێ داعشێ دانە، دەنگێ وان کچێن هێشتا نەڤەگەریاینە، وان کرینە بازار.
ئەو د ترسن ژ ڕاستیێ، ژ بەر کو ڕاستی دێ وان شه‌رمه‌زار کەت، ڕاستی ئەوە: ئێزدی کوردن، شنگال کوردستانە.
٧. ئەنجام: دیرۆک ژبیر ناکەت
ئەڤ بابەتە نە ژ بۆ كه‌رب و كینێ یە، ژ بۆ بیرهاتنێ یە، ئەوێن شک و گۆمان ل کوردستانیبوونا ئێزدیا هەی، بلا بچنە لالشێ، بلا ل گۆرێن شەهیدێن شنگالێ بنێڕن، بلا ل چاڤێن دایکێن شنگالێ بنێڕن کو هێشتا ل کچ و کورێن خو دگەرن.
ئێزدیاتی بێ کوردستانێ نابە، شنگال بێ کوردستانێ نابە، لالش بێ کوردستانێ نابە.
ئەڤ خۆفروشە دێ د دیرۆکێ دا وەکی خۆفروش ئێنه نڤیسین، دیرۆک وان ژبیر ناکەت.
تُتاح هذه الصورة أيضا في: کوردی