سەرۆك مەسعود بارزانی ئەڤرۆ ب هەلكەفتا 63ەمین سالڤەگەرا شۆڕەشا ئەیلوولێ، پەیامەك بەلاڤكر.

دەقێ پەیاما سەرۆك بارزانی:

ب ناڤێ خۆدێ مەزن و دلۆڤان

شۆڕەشا مەزنا ئەیلوولێ ب ڕابەراتییا بارزانییێ نەمر، مەزنترین شۆڕەشا سەرتاسەری و سیاسی و چەكدارییا جەماوەرێ كوردستانێ بوو ل پێناڤی بەرگریكرن و چەسپاندنا مافێن ڕەوایێن گەلێ كوردستانێ. شۆڕەشا ئەیلوولێ ئیرادە و باوەری ب خۆ بوون بۆ مرۆڤێ كورد ڤەگەڕاند و بوو بنەمایەكێ بهێز یێ سیاسی و ڕێكخراوەیی و جەماوەری بۆ بەردەوامییا خەباتا ڕزگاریخوازا گەلێ كوردستانێ ل دژی ستەم و داگیركارییێ.

شۆڕەشا ئەیلوولێ ب داستان و خۆڕاگرییا سەركردایەتی و پێشمەرگە و جەماوەری، دۆزا ڕەوا یا گەلێ كوردستانێ چەندین پێنگاڤان بەرەڤ پێشڤە بر و بوو ئیلهامبەخشا خەبات و تێكۆشانێ بۆ قۆناغێن دی یێن خەباتا گەلێ كوردستانێ.

د شێست و سێیەمین سالڤەگەرا بەرپابوونا شۆڕەشا مەزنا ئەیلوولێ دا، هزاران سلاڤان بۆ گیانێ پاكێ شەهیدێن شۆڕەشا ئەیلوولێ و هەمی شەهیدێن كوردستانێ دهنێرین. هەروەسا ڕێز و پێزانین بۆ فیداكاری و ماندوونەناسییا هەمی وان پێشمەرگە و خەباتگێڕ و قارەمانان هەنە كو شوین تبلێن وان د وێ شانازییا نشتیمانی دا دیارن. ئەو قارەمانێن مێژوو بۆ گەلێ خۆ تۆماركری و ژیان و خەباتا هەرئێك ژوان وانەیەكا خەبات و خۆڕاگرییێ یە.