رزگاربوویەكا ئێزدی:كەسێن زۆری لمەكرین و كۆمكوژكرین هەتا نهۆ نەهاتینە گرتن
تۆرا لالش یا راگەهاندنێ
كچەكا رزگاربوویا ئێزدی ژ گوندێ كۆچۆ بەحسێ رۆژانێن خۆ و وان نەهامەتی و زۆریا ب سەرێخەلكێ گوندی هاتیە كرن دكت ل دەمێ تیرۆرستێن داعش شنگال داگیركری ل 3 ی تەباخا 2014ێ،ب گۆتنا وێ گەلەك ژ وان كەسێن زۆری لمەكرین و ئەم كۆمكوژكرین هەتا نهۆ دئازادن و نەهاتینە گرتن،ئاشكەراكرژی ل رۆژا 15ی تەباخێ داعش زەلامێن گوندی كۆمكوژكرن.
(زینێ)ناڤێخەیالی یێ كچەكا رزگاربوویا ئێزدی یە ژ گوندێ كۆچۆ تەمەن 26سالە و سالەك و نیڤان د دەستێ داعش دا مایە،بۆ رۆژناما دەنگێ لالش ئاشكەراكر،ل دەمێ هێرشا داعش لسەر دەڤەرا شنگالێ گوندێ مەژ هەموو لایان ڤە هاتە دۆرپێچكرن و ئەو كەسێن هەول ددان خۆ رزگار بكن داعش رێ ل وان گرت و كوشتن ب ڤێ چەندێ چ مەفەر مە نەمان ئەم خۆ رزگار بكن،شێخێن هۆزێن دەورووبەرێن مە( متێوت، خاتونی) دخواستن مە پشت راست بكن و دگۆتنەموختارێ گوندی ئەم ناهێلن كەس زۆرداریێ ل وە بكت،لێ دبنیات دا ئەو بخۆ داعش بوون چنكو وە شەر نەكریە پاشی (ابو حمزە الخاتونی) هاتە جڤاتا گوندی و ب هەمان پەیڤ گۆتە موختاری ئەم چ لگەل هەوە ناكن لێ دڤێت هوون بوسلمان ببن ئەگەر نا دێ وە هەموویا كوژین،لێ زەلامێن گوندی ئێكسەر ئەڤ چەندە رەتكرن پاشی گوندی داخوازا مۆلەتێ ژوان كر دا هزر خۆ بكن لێ هەولدانێن وان دبێ مفا بوون ئەم خۆ رزگار بكن ،چنكو كۆچۆ ب حوكمێ وێ چەندێ جوگرافیا گوندی گەلەك دكەڤتە دكووراتیا دەڤەرێن ئەرەبان دا و چ مەفەر نینە ژبۆ رزگاركرنێ،ل 15 تەباخا 2014ێ هاتن و هەموو خەلك ژێك جوداكرن ژبەر خستن دقوتابخانا گوندی دا و ئەڤجا ژن و زەلام ژی جوداكرن هەر هندەك خستن دقاتەكی قوتابخانێ دا و تیرۆرستێن داعش دگەل وان دا (ئەرەبێن دەوروبەر ،سعودی، تەلەعفەری ، مووسلی ،خاتوونی ، متێوتی ) ژی دناڤ دا هەبوون داخواز ژمە كرن ئەم هەر تشتەكی دگەل وان هەبت مینا ( دراڤ، زێر، مۆبایل) رادەستی وان بكن و گۆتن هەركەسێ ڤەشێرت دێ جلكێن وی هەموویا ژێڤەكەین و كوژین لێ هەر هندەك ژكچان و ژنان مۆبایل ڤەشارتن،تشتێ سەیر من ب چاڤێ خۆ دیتی و رەفتارێن داعش یێن هۆڤانە دگەل وان كچ و ژنێن كوستیلا زێری ددەستێ وان دا نە دهاتن دەر تیرۆرستێن داعش دگۆتن ئەگەر نەئینن دەر دێ تبلێن وە ژێڤەكەین و من دیت هندەكا ژبەر تەنگیا گوستیلا وان دتبلێن وان دا دەمێ دەرئێخستنێ خوون ژدەستێ وان دهات و داعش گوهارێن وان دگرتن و حێل ژگوهێ وان دكشاند و دەردئانی.
“داعش زارۆك دبرنە قوتابخانا گوندی و فێری قورئانێ و راهێنانێ لسەر چاوانیا بكارئینانا چەكی دكرن”
هەروەسا دیاركر،نێزیكی دەمژمێر یازدەی نیڤرۆ ل رۆژا 15 ی تەباخێ زەلامێن گوندی كۆمكوژ كرن وی دەمی فرۆكێن هەڤپەیمانا ل سەر سەرێ مە دچوون و دهاتن و داعش هێزەكا ئێكجار زۆر ئینا بوو گوندی و ئەم ل سەر دوو گرۆپان هاتن جوداكرن ژنێن شووكری و زارۆك دان ئالیەكی و كچێن نەشووكری دان ئالیەكی،پشتی ئەم برنە ئاڤاهیێ پەیمانگەهێ ل سۆلاغێ ل قەزا شنگال ل وێدەر ژی ئەو ژنێن ب تەمەن و دانعەمركۆمكرن و مە گۆت دێ بن كێدەرێ گۆتن گەرمە دێ بن بەر سپلێتان و ب مە دكەنین و سڤكاتی بمەدكرن پاشی مە گوه ل دەنگێ تڤەنگان بوو پاشی ترۆمبێل و شەفەل چۆن و دگەل( 12)گەنجێن نێزیكی (14) ژی دگەل وان هەبوون مە زانی ئەو كوشتن، قۆناغا دی ئەم یێن نە شووكری برنە مووسل و یێن شووكری برنە قەزا تەلەعفەر و هندەكان ژمە زارۆك دانە دگەل خۆ و گۆتن ئەم دشووكری نە و ئەڤە زارۆكێن مەنە ئەم ل قوتابخانا (الازاهیر) دا ددەستەسەركری بووین.
“بتنێ سارێژكرنا برینێن خەلكێ كۆچۆ و ئێزدیان ئەوە گرتیێن ماین و كەسوكارێن مە بزڤرنە ڤە”
زینێ ئەو چەندە ژی دا دیاركرن،داعش گەلەك رێ بكاردئینان دا كچ و ژنێن جوان دیار بكت وەك ئەم گەلەك برسی دكرن و دەمێ خوارن بەلاڤدكرن دەنگێ هۆرنێ ترۆمبێلا خوارنێ دهاتە مە مرن دهاتە پێش چاڤێ مە،ژبەر رەفتارێن وان یێن هۆڤانە ئەوان هەر كچ و ژنا ڤیا با ب زۆری دبر ئەگەر رێ ژلایێ دەیكا وێڤە لێ هاتبا گرتن دهات لێدخستن و سەر و دەست و لنگێ وێ دشكاندن،جۆرەكی دەرمانی دكرنە دئاڤا ڤەخوارنێ دا و هەردەم چاڤێ مە ل خەو بوو و ئەم دبێ هێز بوونو بۆ ماوێ (13) رۆژان ل وێ قوتابخانێ دا مان و ئەو ئێزدیێن دی یێن ژدەڤەرێن دی یێن شنگال ئانینە جەم مە،ژبەركو ئەو ئاڤاهیێ قوتابخانێ گەلەكی مەزن بوو،ئەڤجا سەبارەت زارۆكێن ئێزدیان دبرنە قوتابخانێ و فێری قورئانێ دكرن و راهێنان لسەر چاوانیا بكارئینان چەكی دكرن مە دگۆتێ ئەڤە هوون چ ل ڤان زارۆكان دكن دگۆتن مە وێ ژمەرا ببن چەكدار ئەم ئێدی نادەینە وە ،پاشی من هەول دا خۆ رزگار بكەم و ب رێیەكێ من كاری پەیوەندیێ ب خێزانا خۆ بكەمو كەسەك شاندن من رزگار بكت،لێ ژبەر زۆریا بنگەه و زالگەهێن وان نكاری تشتەكی بكت،پاشب رێیەكادی من و كچ مەتا هەول دان و مە كاری خۆ قورتال بكن و مە قەستا مالەكێ كر خەلكێ تەلەعفەر بوون و من گۆتێ ئەز دبەختێ وە دا مە من بحەوینن زەلامێ مالێ گۆت ئەز بەختێ خۆ ددەم تە ئەگەر سەرێ من وەرە ژێڤەكرن وە رادەست ناكەم،لێ دبنیات دا هۆسا نەبوو ئەو زەلام ژی داعش بوو و پاش برمە دەڤەرێن ( مووسل ، كسر المحراب ،قزل قیو، راوە، هیت ،البوكمال).
دبەردەوامیا ئاخفتنا خۆ دا گۆت:پشتی بریمە البوكمال ل سووریا و كرمە دشوقەیەكێ دا ژبەر بێزاربوونا من و رەوشا نەخۆش یا تێدا دژیام زۆر دلتەنگ و بێ حال ببووم،ئەڤجا من پەنجەرا شوقەیێ ڤەكر رۆژەكێ من ل خوار نهێری ژنەك ل خوارە و لمن نهێری گۆت تە خێرە من چیرۆكا خۆ بۆ ڤەگێرا گۆتە من دێ هاریكاریا تەكەم من ژمارا خێزانا خۆ دایێ ئەوێژی ب رێیا كچا خۆ ل (حەسكە) پەیوەندی ب مالا من كر و زانین ئەز لكێدەرێ مە و ئەوێ ژنێ گۆت ئەم نەوێرێن خۆ گەلەك نێزیكی داعش بكن و ئەو بخۆ ژداعش دترسیان و نە دگەل وان بوون گۆت ئەگەر هەیڤەكا دی بمینی دێ رزگاركەم لێ من نەباوەرە بمینم پاشی ب پەیوەندیێن مالا مە دگەل قاچاخچیەكێ دگەل داعش خەلكێ( راوە) بوو هات ئەز ژ وی چەكداری كریم ، چەكدارێ ئەز فرۆشتم هەر هەفتیەكێ دهات چاڤدێریا من دكر كا ئەز نەرەڤیمە لێ پاشی ئەو چەكدارێ داعش ب بوردۆمانەكا فرۆكا هات كوشتن،نێزیكی هەیڤەك و نیڤا ل( راوە ) پاشی ئینامە تەلەعفەر و ژوێدەرێ ژ دەمژمێر 7ی هێڤاری ئەم ب رێكەفتین بێ سەكناندن هەتا ئەم گەهشتن چیایێ شنگالێ و دگەل من دا ژی ژنكەك و زەلامێن بوسلمان هەبوون ئەوژی ژبەر داعش رەڤیا بوون.
ل داویێ ژی زینێ گۆت:هیڤدارم حكومەت و هەموو دەزگەهێن ئەمنی ئەو زارۆكێن مایین ددەستێ داعش دا و یێن ل كەمپێن مووسل هەین بزڤرینن ناڤ كەسوكارێن وان،دیسان ئەو كەسێن زۆری لمەكرین و ئەم كۆمكوژكرین بگەهنە سزایێ خۆ چنكو گەلەك ژوان نهۆ دئازادن و حكومەتێ هەتا نهۆ نكاریە وان بگرت و دادگەه بكت و بتنێ سارێژكرنا برینێن خەلكێ كۆچۆ و ئێزدیان ئەوە كو گرتیێن ماین و كەسوكارێن مە بزڤرن و هیڤدارم حكومەت خۆ ل ڤان رزگاربوویان بكەتە خودان،ژبەركو ئەم دبارودۆخەكی بزەحمەت را دەرباس دبن و هەرۆژ مرن دئێتە بەرچاڤێ مە.
تُتاح هذه الصورة أيضا في: کوردی