ئێزدی تووشی پاكرنا نەژادی بوون و گەلەك نەمابوو ئەو بێنە ژناڤبرن
خالد خدر
ل تەباخا سالا 2014 ئێزدیێن دەڤەرا شنگالێ تووشی هێرشەكا دڕندە و كێم وێنە بوون ژ ئالیێ چەكدارێن رێكخراوا تیرۆرستییا بناڤێ دەولەتا خیلافەتا ئیسلامی یا (داعش) ، دئەنجامێ ڤێ هێرشا هۆڤانەیا تیرۆرستێن داعش جڤاكێ ئێزدی تووشی مەزنترین زیان بوو ، ب هەزاران هاتنە كوشتن و رەڤاندن وزەلام هاتنە كوشتن و ژن و زارۆك هاتنە سەبیكرن و كچ وژن وەك جارییە هاتنە فرۆتن ل بازارێن مووسل و رەقایێ ،ژبلی زیانێن ماددی و ئابووری كو دەڤەرێن ئێزدیان ژێرخانەیا وێ یا ئابووری هاتە ژناڤبرن ب تایبەتی ل شنگالێ و باشیك وبارزانێ (بەحزان) ، ودەڤەرێن ئێزدیان تووشی خرابكرنێ و تالانكرنێ بوون ژئالیێ چەكدارێن داعش ڤە، كو هەر كار وكریارەكا نە مرۆڤایەتی و دوور ژ رەوشت و یاسا ورێسایێن مرۆڤایەتی ل دژی ئێزدیان هاتنە ئەنجامدان ، وئەگەرا سەرەكی یا ڤێ هەموویێ ئەو جیرانێن ئێزدیان بوون ب تایبەتی هندەك هۆزێن ئەرەب وسوننەیێن شنگال وتەلەعفەرێ ئەنجامدەرێن سەرەكی بوون ل تاوانێن هاتینە كرن ل دژی ئێزدیان.
هەژی یە بێژین كو وان ئەو كار وكریار ئەنجام دان ل دژی ئێزدیان ب تایبەتی رەڤاندن وسەبیكرن و فرۆتنا كچ وژنا ، كو ب مەرەمێن خۆ یێن رەگەزپەرستیا كۆرە دەستدرێژی لسەر كچ وژنا كرن ب تایبەتی لسەر زارۆكێن كچ ، تشتێ سەرنج راكێش وجیێ سەرسۆرمانێ ! كو هەتا نهۆ هیچ تاوانبارەك یان ئالییەك ژ وان نەهاتیە گرتن یان سزادان وب تایبەتی پشتی ژناڤچۆنا داعش ل مووسلێ پتریا وان بووینە ئاوارە و خۆ ددەنە دیاركرن وەك بێ گونەه ونهۆ ل كەمپادا درونشتینە پشتی ریهێن خۆ تەراشین و ب سەدان زارۆكێن ئێزیان یێن بچووك دناڤ خێزانێن خۆدا ڤەشارتینە وزمانێ دەیكێ ژبیرا وان برینە ، ئێزدی تووشی پاكرنا نەژادی بوون و گەلەك نەمابوو ئەو بێنە ژناڤبرن ، وئەو چەندا هاتی كرن ل دژی وان تاوانەكا هەرە مەزن بوو كو نەهاتیە سەرێ هیچ مللەتەكی دی ب تایبەتی دڤی سەردەمێ نوو دا، ب كورت وكورمانجی ئەوا هاتی سەرێ ئێزدیان دئێتە هژمارتن جینۆساید چنكو ئێزدی وەك ئایینەك وپێكهاتەكا رەسەن و دێرین ل دەڤەرێ كو رەه وریشالێن وان دزڤرتە بەری هەزارێن سالان پێش زایینێ ، وجهێ مخابنیێ یە دانپێدان ب جینۆسایدا ئێزدیان نەهاتیە كرن ب شێوەیەكێ فەرمی ، ژ ئەنجامێ وێ هێرشا هەنێ ئێزدی كەفتنە لبن گەف ومەترسییا نەمانێ و هەرسكرنێ كو تووشی مەرگەساتەكا هەری مەزن بوون ل دیرۆكا خۆدا ، كو ژبلی كوشتن و رەڤاندن وسەبیكرنا كچ وژنا نهۆ ب سەدێن هەزارا ئاوارەنە ل ناڤ كەمپان دا وكۆچكرنا ئێزدیان بۆ ئەورۆپا ژی هێشتا بەردەوامە، تشتەكێ دی یێ مەترسیدار پشتی ئازادكرنا شنگالێ ب تەمامی خەلكێ وێ نكارن بزڤرنەڤە ب تایبەتی رەخێ باشوور ژبەر هەڤركیێن سیاسی و هەبوونا گرۆپێن چەكدارێن جۆراوجۆر ل گۆرەپانا شنگالێ دا، ب تایبەتی پشتی هاتنا حەشدا شیعی بۆ شنگالێ ، ونهۆ ئاخا شنگالێ هاتیە دابەشكرن دناڤبەرا هێزێن سەرب پەكەكێ ڤەوهێزێن حەشدا شیعی وهێز ودام ودەزگایێن یاسایی یێن حكومەتا هەرێما كوردستانێ ڤە.
ئیرۆ ئێزدی د رەوش و بارودۆخەكی دژوار دا دەرباس دبن كو ئایندە وپاشەرۆژا ئێزدیان كەفتییە د مەترسییەكا ئێكجار مەزن دا ، ئێزدی پێتڤی ئێكرێزیێ و گۆتارەكا ئێكگرتی نە بۆ داهاتییێ خۆ و دووبارە زڤراندنا باوەریێ بخۆ و ڤەكرنا لاپەرێن نوو داكو رابنە سەرخۆڤە،چنكو ئێزدی نە كێمترن ژ چوو مللەتێن دی ئەگەر دەرفەت بۆ وان بێتە دان.
تُتاح هذه الصورة أيضا في: کوردی