ئێزدیان چ ژ راگەهاندنا كوردی دڤێت؟
جەعفەر سمۆ
لگۆر سالناما زاینی ژسالا (ئێكێ تا 2014)ێ زاینی نێزیكی هەر (27)سالان جارەكێ ئێزدی تووشی فەرمانەكێ بووینە،ئانكو پرانیا جیلێن ئێزدیان زاراڤێ فەرمان ئانكو جینۆساید گوهلێبوویە،ئەڤ دەردەسەری و مالوێرانكرنا بەردەوام ددەرهەقا مللەتەكی دا كو د درێژاهیا دیرۆكێ دا تووشی قركرنێ بووین تێرا هندێ دكت تاكێ ئێزدی هنەكێ ژدیرۆكێ بترست و باندۆرێ لێ بكت،گەلەك ژ نڤیسكارێن عەرەب یێن تووندرەو ب پلان دیرۆكا ئێزدیان بەروڤاژی راستیا وان نڤیسی یە، و رەنگە ئەڤ بخۆ پیلانەكا وان یە دارشتی بت بۆ هندێ ئێزدیان دوور بكن ژ ئاخ و زمان و نەتەوا وان،چنكو فەلسەفە و ئەدەبیات و كلتۆرێ ئێزدیان هۆكارەكێ سەرەكی یێ پاراستنا زمانێ كوردی یە،ئێزدیان پشتی شۆرەشێن كوردی ل چەرخێ بۆری تا رادەیەكی هەست ب هەبوونا خۆ كرن و پشكداریەكا كارا دڤان شۆرەشان دا كرن بۆ هندێ دیرۆكا پر تراژیدیا وان دووبارە نەبتە ڤە، بۆ ڤێ قۆناغێ ئێزدیان پێتڤی ب راگەهاندنا كوردی هەیە كو ئێزدیاتیێ ب زمانەكی زانستی بۆ جیهانا ئاشتیخواز بدەنە ناسكرن،دڤێ قۆناغێ دا راگەهاندن رۆلەكێ مەزن دگێرت و گەرەكە گرنگیەكا مەزن بڤی پێكهاتەی بدەت،خالا هەرە گرنگ یا كو دخوازم دڤێ نڤیسینێ دا داكۆكیێ لسەر بكەم ئەوە راگەهاندنا كوردی لدەمێ روودانەك چێدبت ل دەڤەرەكا ئێزدیان وێ روودانێ وەكو ئێزدی نەدەنە ناسكرن بۆ نموونە ئەگەر گەنجەكێ ئێزدی ل شاریا روودانەك چێكر دروست نابینم ئەگەر راگەهاندن بێژت گەنجەكی ئێزدی روودانەك چێكر،بەلكو یا باشتر ئەوە بێژت گەنجەكی ل شاریا روودانەك چێكر،هنگی ئەو ژی دێ بینت كو ئەوژی تاكەك ڤی وەلاتی یە وەكو هەر تاكەكێ دی،رەنگە نەشارەزایا هندەك رۆژنامەڤانان دگەل ڤان بوویەران باندۆرەكا نەرێنی لسەر سایكۆلۆژیەتا تاكێ ئێزدی بكت ،گەرەكە دڤی سەردەمی دا ئەم هەموو كاربكن بۆ هشیاركرنا گەنجێن خۆ ب تایبەت دبیاڤێ پرۆسێسا پێكڤەژیانێ دا دناڤبەرا هەموو پێكهاتەیان دا،چنكو كوردستان وەلاتێ مەیە و جوانیا وێ د هەمەرەنگیا وێ دایە،ب كورتی راگەهاندنا كوردی دكارت درێیا ڤان هەرسێ بیاڤان دا بتر خزمەتا ئێزدیان بكت:1ـ ئێرو گەلەك ئەكادیمی دناڤا ئێزدیان دا هەنە،دكارن درێیا ڤان كەسان را راستیا دیرۆك و میتۆلۆژیا ئێزدیان بینن زمان،2_ل كوردستانێ چ كەنالێن تایبەت ب ئێزدیناسیێ ڤە نینن ،گەرەكە كەنالێن كوردی د رێیا بەرنامێن تایبەت را خزمەتا ڤێ ئۆلا دێرین بكن،3_بتر رۆلی بدەنە گەنجێن ئێزدی كو دناڤا سازیێن راگەهاندنا كوردی دا كاربكن بۆ هندێ لسەر بنیاتەكێ باوەری بخۆ هەبوونێ بێنە ئاڤاكرن، 4_دەمێ دەنگوباسەك یان راپۆرتەك یان دكیۆمێنتەك لدۆر داوی جینۆسایدا ئێزدیان ل شنگالێ تێتە چێكرن كەسێن تایبەتمەند شلۆڤە بكن، 5_بلا راگەهاندنا كوردی بۆ فەلسەفە و میتۆلۆژیا ئێزدیان خۆ نێزیكی كەسێن شارەزا د ئێزدیناسیێ دا بكن.
تُتاح هذه الصورة أيضا في: کوردی