پێتڤیە ژن خۆ ئاڤا كت و ببتە خودان داهات و ئابوور
جوان بەرواری 
ئەگەر ڤەگەرین دیرۆكێ، دێ بۆ مە دیار بت دەستپێكا پێگەهێ مرۆڤایەتیێ ژن پشكدار ب بوو دهندەك بوارێن ژیانێ دا، تایبەت بوارێ جڤاكی و ئابوری دا ژن خودان هێزو هزرمەند بوو، هەتا نهۆ ژی دبت ئەڤ بوارە، دەیندارێ ژنێ بووینە،چنكو ژنێ جڤاك بەر ب قۆناغا شارشستانیەتێ دە بر و بەردەوام هێزا خۆ دا كار پێكرن، ژ پێخەمەت وێ یەكێ داكو جڤاكا وێ بەر ب ئاستێ گهۆرینێ دە بچت.
هەتا ئەو زولم و نە هامەتیا كەفتیە درێیا ژنێ دا ژی هەر لسەر كارێ خۆ یا بەردەوام بوو،لەورا د دیرۆكا شارستانیەتێ دا ژی هاتبوو دیاركرن، كو ژن خودان مال، مولك، ئابوور و ئازادی یە، هەر چەندە ل گەلەك وەلاتێن جودا جودا دا، ئابوورا وان یا باش ژی نەبوو بەلێ ئەڤ چەندە نە بوو رێگر كو ژن، هزر د هەبوونا بوارێ ئابووری دا نە كت، بەلكو ژن ب وێ خزمەتكاریێ ڤە دكاری ب شەڤ و رۆژ كار بكت و بەردەوام بت لسەر بیرۆكە داهێنانێن خۆ یێن جودا دە،هەتا ل رۆژهەلاتا ناڤین دا ئەگەر بنێرین، ژن ل باژێری دە دكارت داهێنانێ ب فكرو بسپۆریا خۆ بكت،لێ یا گوندان ب شێوازەكێ جودا تر داهێنانێ دكت و بەردەوام پێكولا وێ یەكێ دكت، كو داهێنانێن خۆ د بوارێ گشتوكال و چاندن و كارێن شیرەداریێ و ئاژەلداریێ دا دیار بكت،ئەڤ یەكێ جوداهیا راستیا ئابوورا ژنێ دا نرخاندن، چنكو ژن ل كێدەرێ بت دكارە هێزا خۆ دیاربكت و داهاتی خۆ پەیدا بكت ببتە ئێك ژ پێگەهێ جڤاكی ، سیاسی وئابووری و بەر ب قۆناغێن پێشكەفتن و نوویخواز دا بچت،ژ ئالیەكێ دنڤە داهاتێ خێزانێ، هەموو ئەو كارن ئەوێن رۆژانە و هەیڤانە دئێنە دناڤ خێزانێ دا و دگەل چاوانیا بكارئینانا پێتڤیێن مالێ دئێتە خەرجكرن،پیتریا وی داهاتی ژ بەرهەمێ چاندن ، كریان ، ملكی و سەروەت و سامانێ باب و باپیران دئێتە پەیداكرن،د دەمەكێ دا كاركرنا ژنێ بۆ دەرڤەی خێزانێ ب بوو جیێ گرنگیپێدانا چەندین ڤەكۆلەرێن جودا جودا، ژبەركو لدووڤ وێ گرنگیا ژین و ژیارا سەردەمانە دا هۆسان دیار دبوو كو ئێدی ژن ژی دخوازت وەكو زەلامی ببتە خودان داهات،رەنگە ئەڤە ژی ل جەم پرانیا ڤەكۆلەرو جڤاكناسان كارەكێ جیێ گرنگیپێدانێ بوو، بەلێ بەروڤاژی ڤێ یەكێ ل جەم هندەك مرۆڤان ئەڤ یەكە دبوو جیێ سانسوركرنا ژنێ د بەردەوامیا كاركرنێ دا،چنكو پێگەهێ دیرۆك و كلتۆرو رەوشت و ئۆلان دا هاتبوو چەسپاندن، كو نابت ژن ل دەرڤەی خێزانێ دە كاربكت،بەلكو بتنێ بۆ كارێ مالێ و خزمەتا زەلامی یا ب عاقل و هش و تێر زانیاری بت، هەتا كو د بارودۆخێ سەردەمانە ژی دا ئەڤ چەندە لسەر رێژەیەكا ژنان یا سانسوركریە،لەورا ژی ئێدی ژنێ هەست ب كێم بەرپرسیاریا خۆكر و ما دبن بارێ نالەبارو نەزانینێ دە.
ئەگەر بنێرین كا هەر خێزانەكێ چەند داهات بۆ دئێت چەند دئێتە خەرجكرن دبت خێزان ژ خێزانێ یا جودا بت،و پتریا وێ بەرپرسیاریێ دكەقتە سەر ملێن كێ و كی چاڤدێریێ لسەر ڤی داهاتی و خەرجكرنی دكت،دكەڤن دا دبت پتریا جاران ئەڤ داهاتە ددەستێ زەلامی دا بوو چنكو هەر ژ كەڤن دا وسان هاتبوو دیاركرن كو داهات ، قەر ، خەرجكرن، ملك و سامان هەموو زەلام ژێ بەرپرسیار بوو، چنكو بەشەك ژ ئامادەكرنا كارێن كابانیێ و ب رێڤەبرنا خێزانی و… هتد داهات د كەفت دەستێ ژنێ دە،ئەڤێ یەكێ ژی هزرو بریارا ژنێ ژناڤبربوو،لەورا ژن بەرەف كێمیا پشكداریان دچوو،بەلێ پشتی پەیدابوونا سیستەمێن نوویخواز و سەردەمانە ئێدی ژنێ دخواست ببتە خودان كارو داهاتەك جودا ژ زەلامی.
سەرەرای وێ چەندێ ژی ئەگەر ئەم كاركرنا ژنێ دگەل یا زەلامی دا بەراورد بكەین، بێگۆمان دێ كاركرنا ژنێ زێدەتر بت، ژبەركو ژن ب گەلەك ئەركان رادبت بەلێ پێخەمەت وێ یەكێ ژن دكارت ببتە خودان داهات و ئابوورەك بەرفرەه، داكو بارێ رەگەزێ بەرامبەر سڤك بكت و ژ ئالیێ ساخلەمیێ ڤە ژیانا ژنا خودان كارو داهات ساخلەمترە ژ یا بێ كارو داهات، چنكو ژن ژ دەرڤەی خێزانێ پتر هەستا رەوشەنبیریێ ، زانینێ و بەختەوەری ل نك پەیدابت، ژئالیەكێ دنڤە دزانت دێ چاوان سەرەدەریێ دگەل ئەندامێن خێزانێ كت،لەورا پێتڤیە ژنا خودان بسپۆرو شارەزا و زانست بت هەولا كاركرنا خۆ بدەت داكو بتە خودان داهات و هەست ب هەبوونا وێرەكی و رۆلێ خۆ بكت، دیسان دا نەبتە بارگرانی ژبۆ خێزان یان هەڤژینێ خۆ،بەلكو ئەو بخۆ پاداشتا داهاتێ خۆ د كێم و كاسیێن مالێ زارۆكان دا ب مەزێخت باشترە.
ل داویێ دبێژم: ژنا خودان داهات بت، دێ بەردەوام هەست ب ژین و ژیارا خۆ گهۆرین و پێشكەفتنا پرۆگرێسا دونیایێ كت،لەورا پێتڤیە ئێدی ژن خۆ ناس بكت و ئەو بخۆ هەولا ئاڤاكرن و بوهادارییا خۆ بدەت،داكو بتە خودان داهات و ئابوورا خۆ یا جودا.
تُتاح هذه الصورة أيضا في: کوردی