كارتێكرنا سرووشتی لسەر جەژنێن ئێزدیان..جەژنا سەرێ سالێ وەك نموونە
سەلام باعەدری
وەك یە دیار و ئاشكەرا ئێزدیان ژمارەكا زۆر یا جەژن و هەلكەفتان هەینە،د هەر جەژن و هەلكەفتەكێ دا ژمارەكا زۆر یا رێورەسمان دئێنە گێران،هەر ئێك ژ وان رێورەسمان ژی خودان واتا،هزر و فەلسەفەیا خۆ یا تایبەتە بتریا وان پەیوەندی ب سرووشتی ڤە هەبوویە، ژ وان جەژن و هەلكەفتان جەژنا سەرێ سالێ وەك نموونە:ئەڤ جەژنە ئێك ژ كەڤنترین جەژنێن ئێزدیانە و دكەفتە چارشەموویا ئێكێ ژ هەیڤا نیسانێ ب هژمارا رۆژهەلاتی،رێورەسمێن وێ ل پەرستگەها لالش و دەڤەرێن ئێزدیان دئێنە گێران ،ل هێڤارا جەژنێ ل پەرستگەها لالش وەك رێورەسم پووتەكا مەزن ب ئاگری دئێتە دان و ب ئاوایەكی زۆر فتیلێن ئاگری ( چرا ) ل سووكا مەعریفەتێ و لبەر نیشانگەهێن خاس و چاكا دئێنە هلكرن و هەر كەسەكی ئامادە دڤێت پشكداریێ ِدڤێ رێورەسمێ دا بكت،هەروەسا دیندار و قەولزان قەول و بەیتا ب رێز دكن و سەما ژی تێتە كێشان،ب وێ باوەریێ مەلەك زان(تاووس مەلەك ) دئێتە ئەردی،هەروەسا زارۆك و گەنج قەستا هاوری گوندو باژێرا دكن، كولیلكێن نیسانێ و بێناڤێ (كاریێ) دئینن،دگەل رۆژهەلاتێ كابانیا مالێ قەفتكەكا كولیلكێن نیسانێ و گیایێ بێناڤێ دگەل قالكێن هیكێن رەنگا و رەنگ ب هندەك هەریێ بسەر دەریێ مالا و خانیان ڤەدكت،ب رامانا نیشانا هاتنا بەهارێ و سالا نوویە،دیسان رێورەسمێن ڤێ جەژنێ دەربرینێ ژ ئافراندن و درووستبونا كنیاتێ دكن،دڤێ جەژنێ دا گرنگیەكا مەزن ب هیكێ دئێتە دان،چنكو هێمایەكە ژبۆ فەلسەفەیا گەردوونی و درووستبوونا كنیاتێ،بڤی رەنگی:هیك هێمایەكە ژبۆ تۆپكا ئەردی كا چاوا زانا ل وێ باوەرێ بووینە ئەرد پچەكێ یێ خوارە،ئانكو گەلەك نە یێ بازنەی یە،هیك ب دروستی رۆلێ هێماكرنێ ژبۆ ئەردی دگێرت ،ئانكو هەلبژارتنا ئێزدیان یا هیكی ب تۆپكا ئەردی هەلبژارتنەكا د جیێ خۆ دا بوویە، دیسان شكاندنا هیكی هێمایەكە ژبۆ پەقینا دورێ یا كو گەردوون ژێ دروست بووی، كەلاندنا وێ هێمایە ژبۆ جەبرین و دروستبوونا كنیاتێ،رەنگكرنا وێ ژی نیشانا پەیدابوونا ژیانێ و سرووشتی یە لسەر روویێ ئەردی،هەروەسا جەژنا سەرێ سالێ دكەفتە د هەیڤا نیسانێ دا و هەیڤا نیسانێ ژ هەموو هەیڤێن دی پیرۆزترە ژبەر سرووشت د رەوشا شینبوونێ دایە و رێزێ ل سرووشتی دگرن و ئەردێ نا كۆلن ژبەر هەموو كەسكاتی دەست ب گەشبوونێ دكت،ڤێجا كۆلانا ئەردی دڤێ هەیڤێ دا ب گوننەه دئێتە دانان،تاكو جوانتر روویێ ئەردێ بخەملت و ژینگەه بێتە پاراستن،هەر ژبەر هندێ هەیڤا نیسانێ ب هەیڤا پیرۆز دزانن و داوەتا دوێ هەیڤێ دا ناكەن،چنكو نیسان بخۆ بووكا سالێ یە و چ بووكا دسەر خۆرا قەبوول ناكت.
تُتاح هذه الصورة أيضا في: کوردی