دەم هات برینان دەرمان بكەین
جوان عزەت 
ژن د پەراوێزا هەرفاندن و داهێنان و ژیانا خۆ یا بێ چارەنڤیس دا بەردەوام رووبرووی هزرێن ناكوك و دژە تیرۆر و هەرفاندنێ بووینە،سەرەرای هەلنگافتنا ئێشێن خۆ یێن بێ چارەنڤیس ژی قەد نكارینە خۆ ژ هەموو ئاوارتەیێن ژیانێ دووربگرن،بەلكو لسەر وێ ئەجندە و بیروباوەرا كو هەیە،بەردەوام هزر دچاوانیا ئاراستەكرن و ئیرادەیا جەوهەری بووینە،لسەر ڤی وێنەیێ كو هاتیە وەشاندن ئەگەر ب كووراتیا ژیانێ هزر بكەین،ب تایبەت ئەو بوویەرێن د دیرۆكێ دا هەتا نهۆ ژن تێدا دەربازبووی و پێ هاتیە راستەرێكرن،دبت گەلەك پێناسە و وێنەیێن بێ ڤەگەر د هەبوونا وان دا هەمبێز بكەین،چنكو ژن نە ب جارەكێ هاتیە تەپەسەكرن،بەلكو ب سەدان جاران بوویە قوربانیا دەستكەفت و بێ بهاكرنا ژیانەكا نە چارەسەركری،ژبەركو د هەر مللەتەك و جڤاكەكی ژن ب شێوەكی دایە پێناسەكرن و چارچۆڤەكرن،ب راستی ئەڤە ژی وێنەیەكی دی نیشا مرۆڤی ددەت كو ژن تاكە بوونەوەر بوویە كاریە خۆ لبەر ئاستەنگ و هێرشێن دوژمنكاری بگرت، بەرەڤانیێ ژ هەبوونا رەگەزایەتیا خۆ بكت و هەولبدەت خۆ وەك ئورگانەك بدەت نیاسین نەك بوونەوەرەك سادە،هزربكە خالێن كو شنگال بەرەف ڤێ تراژیدیێ ڤە بری ئەو بوو، پرسا داعش ئەرێ چەند ژ مە هزركرن كا داعش چ بوو، كی بوو؟ ژ چ پەیدابوو و ژ كووڤە هات؟ یان ژی مە پرسا خۆ كر ئەرێ كەنگی ئەم دێ بۆ تراژیدیەك و بوویەرەكا دی ئامادەبین و چ پێویستە و ئەم بكەین؟،دیارە ل ڤێدەرێ كێشە نەئەوە كو ئەم دناڤا خۆ دا هندابووینە،بەلكو كێشا هەرە سەرەكی ئەوە دەمێ ئەم پرس و بوویەر و چارەنڤیسێ خۆ وەكو ئاست و بەرپرسیاری و هەلوست و هەبوونگەرایی نە خوونین و د هەردەمەكی دا ئەم هزردكەین كو ئەم مللەتەكی دروستین و دووری هزرێن ناكوكین،راستە مللەتێ كورد د بوارێ قەهرەمانیێ دا تەخسیرنەكریە،بەلێ د بوارێ تراژیدیان دا ب هزرا من هێش وەكو پێویست ل خۆ نەگەریایە،چنكو مەزنترین تراژیدی یا كو ڤێ داویێ دیاربووی سەربرینا پێنجی ژنێن ئێزدی ل باغۆزا سووریا،بگرە ژ شنگال رەقا و باژێر و ناچەویێن دەوروبەر هەتا گەهشتیە ئەفرین، چارەنڤیسێ سەدان ژنان رووبرووی هێزێن تیرۆرێ بوون،بەلێ ئەڤ ژنێن باغۆزێ نە بتنێ سمبولا ژنیبوونێ بوون،بەلكو سمبولا جیهان و ئافراندنێ بوون لێ بڤی ئەنجامی ژ پێخەمەت تیرۆرەكا هۆڤانە ئەڤ ژنە د هەموو ئالیەكی دا هاتن ژناڤبرن،بەلێ هێش مە نزانیە كا ئەم دێ چاوان ژنێن ماین رزگاركەین،زارۆكێن وان بۆ كووڤە ئاكنجی كەین و دێ ب چ شێوە پەروەردە كەین؟ یان ژی دێ چاوان پرسا ژنێ دناڤ جڤاكی دا دەینە ئازراندن؟،ئەنجام:پێویستە بەرسڤێن ڤان پرسیاران بدەین خووندن، ژ نهۆ پێدا ئەم ب هزر و ئەقل و رێیێن خۆ دەرگەهێ شارشتانیێ بۆ ئێش و ئازارێن ژنێ ڤەكەین و دەستێ خۆ دانین سەر وژدانا خۆ یا مرۆڤایەتی، بێژین دەم هات ئێدی هندەك برینان دەرمان بكەین، كو ل داهاتوویی مە پێتڤی ب چ تراژیدی و كارەساتێن دی یێن بڤی رەنگی نەبت و ئەم بخۆ تیرا ئاڤاكرن و برێڤەبرنا ئەرك و مافێن خۆینە، هەتا بكارن مللەتەكی دووری زۆری و ستەم و زۆرداریێ ئاڤا بكەین و ژنێن مایی ب شنگالەكا دی،جڤاكەكی دی و كەلتۆرەكی نوو بدەین ناسكرن و ئاڤاكرن.
تُتاح هذه الصورة أيضا في: کوردی