پشتی جینۆسایدكرنا ئێزدیان چی هاتەكرن و چی مایە؟
ئلیاس نەعمۆ خەتاری
رۆژا سێی هەشت هاتیە كۆلانە لسەر تەختێ دلێ هەموو ئێزدیان و لسەر دلێ هەموو كەسێن خودان وژدان وهەر كەسێ رامانا پەیڤا مرۆڤایەتیێ دزانت،و ئەڤ رۆژە چ جاران نائێتە ژبیركرن ژبەركو لڤێ رۆژێ مللەتەكێ بەلنگاز و ئاشتیخواز و خێرخواز بۆ هەموو نەژادێن لسەر ئەردی، و مللەتەكێ بێ زولم و بێ زۆرداری مینا مللەتێ ئێزدی ل رۆژا(3/8/2014)ێ ل پێش چاڤێن جیهانێ ب گشتی كەفتە بەر هێرش و پلانێن مەزنترین رێكخراوا تیرۆرستیا داعش دەملدەست ب هەزارەهان خەلكێ سڤیل و بێ گونەهـ هاتنەكوشتن و گرتن و دەربەدەركرن بتنێ ژبەركو ئێزدی بوون.
چەند رۆژ ماینە دێ جارەكا دن بیرهاتنێن رەش ل بیرا مە ئێن و دێ خەم و كول و كۆڤان نوو بنەڤە، لێ ئەڤە دێ بنە هەفت سال ژ رەزیلیێ و بێ قیمەتیێ، دێ بنە هەفت سال و حالێ ئێزدیان هەر ئەو حالێ بەرێ یە، دێ بنە هەفت سال و چاڤێ خەلكێ ل سەلكێت خوارنێ یە، دێ بنە هەفت سال و هێشتا ئێخسیرێت مە د هندابووینە و گۆڕێن ب كۆم دڤەشارتینە و هەستیكێن وان نەدیارن و خەلكێ مە هێشتا دیار نینە و چارەنڤیسێ مللەتێ مە یێ بەرزەیە و دیار نینە، دێ بنە هەفت سال و هێشتا چادر د سۆتن و برسیاتی و بێ ئاڤی و بێ كەهرەبی یە بەردەوامە، و هەتا رادەیەكی خەلكەك وێ تووشی نەخۆشیا خۆكوشتنێ بووی، لێ ئەز ژ وێ چەندێ د ترسم ئاوارەی هەشت یان نەهـ سالان دەربازبكت و تشتەك نەیێ دیاربت گەلۆ ما هەتا كەنگی ئەڤ رەوشا نالەبار دێ وەسا بت و ما نەبەسە كوشتن و گرتن و فرۆتنا مرۆڤان و دەربەدەری و ئێختیماتی، و ب خودێ مللەتێ ئێزدی ب گشتی و شنگالی ب تایبەتی گەلەك رەزیل بوون، و ئەڤە هەموو ژبلی رەڤینێ بۆ ژ دەرڤەی وەلاتی و كو دئێتە هژمارتن ب كوشتنا ب ساخی.
چی هاتبا كرن باش بوو داكو خەلكێ مە زڤری بانە لسەر جهـ و وارێن خۆ؟ وەك وەفاداریەك بۆ وان قوربانیان،ڤیابە شنگال كربانە پارێزگەهـ داكو دەلیڤێن كاری و خزمەتگۆزاری زاڤـبان و خەلكی كاری بان ژیانا خۆ ب ئارامی ب رێڤە ببەن و قەرەبووكرنا خەلكی پشتی هەموو تشت ژدەست داین داكو بكارن خانیێن خۆ ئاڤاكەن و كەلۆپەلێن فەر بخۆ بكرن،چێكرنا جادا و رەسیفا و گەهاندنا ئاڤ وكەهرەبێ بۆ هەموو ناحی و گوندێن شنگالێ،دامەزراندنا گەنجێن شنگالێ ل دام و دەزگەهان داكو ببنە خودان مووچە و راكرنا هەموو مین وتەقەمەنێن لسەر ئاخا شنگالێ و بەردەوامیدان ب ڤەكرنا خۆلێن فێركرنێ وچاكسازیێ بۆ هەموو جۆر و خەلكێ دەڤەرێ،بەلاڤكرنا پێتڤیێن چاندنێ لسەر جۆتیاران وەكو تۆڤی و دەرمانان و ئامیرێن جۆتی و دروونێ وهەتا پەزی و چێلا و جۆرێن دی،كۆلانا سیبایان و دانانا پرۆژەیێن ئاڤێ و بیستانا.
هیڤی و داخوازێن مە ئەون خەلكێ مە ژبن چادران رزگار ببن، ول داویێ دبێژم ل بیرەوەریا هەفت سالیا جینۆسایدكرنا ئێزدیان رەحما خودێ ل روح و گۆڕێن جانگۆریان بت، و هیڤیدارین ژ خودایێ مەزن هەموو ئێخسیرێن مە ب زڤرنەڤە، و خەلكێ مە ڤەگەرن بۆ سەر جهـ و وارێن خۆ، داكو ئەو دەڤەر بكەڤنە بن دەستێ ئێك جیێن فەرمی و خزمەتگۆزاری لێ پەیدابن ب شێوەكی باش و گونجایی ببتە جیێ ژیان و ژیار و ئێمناهیێ.
تُتاح هذه الصورة أيضا في: کوردی