رۆلێ رێكخراوان ل كەمپان نە ل ئاستێ پێتڤی یە
نەشوان خەلۆ
رۆلێ رێكخراوان ل دەستپێكا ئاوارەبوونا خەلكێ شنگالێ د ئاستەكێ گەلەكێ باش دابوو كو هاریكاریێن گەلەك باش دابین دكرن وەك ئاڤاكرنا كەمپان و قوتابخانان و بنگەهێن ساخلەمیێ و باغچێن زارۆكان و دابینكرنا خزمەتگۆزاریان،هەروەسا ڤەكرنا چەندین خۆلێن فێركرنێ ب ئەڤێ چەندێ ئاوارەیێن شنگالێ مفایەكێ زۆر باش ژوان وەردگرت.
بەلێ دڤان سالێن بۆری دا كێمبوونا رێكخراوان دناڤ كەمپێن ئاواران دا ب تایبەتی یێن شنگالێ و چۆنا وان بەرەف دەڤەرێن ژ نوو رزگاربووی كارتێكرنەكا مەزن ل ئاوارێن شنگالێ كریە و كەفتینە دناڤ كێمبوونەكا مەزن یا هاریكاریان دا،ئەڤە چەندین سالن وەزارەتا كۆچ و كۆچبەرێن عێراقێ ب ئەركێ خۆ نەرابوویە ژبۆ دابینكرنا پێتڤیان بۆ خەلكێ ئاوارە كو نهۆ ژنوو هەولددەت ئاوارەیان بزڤریننە جیێ وان،بەلێ دسالێن بۆری دا هندەك رێكخراوێن نێڤ دەولەتی ب ئەركێ خۆ رادبوون و هاریكاریا ئاواران دكرن، لێ ئەڤان سالان دا هێدی هێدی ئەوژی بەرەف كێمبوونێ ڤە چۆن و ئەڤ كار هەموو دكەفتە سەر ملێ حكومەتا هەرێما كوردستانێ هەرچەندە قەیرانا دارایی و پەتایا ڤایرۆسێ كۆرۆنایێ كارتێكرنەكا مەزن ل هەرێمێ كریە، ژبەر هندێ نهۆ هەزاران خێزانێن ئاوارە پێتڤی ب هاریكاریێن رێكخراوانە چ ژلایێ ماددی یان مەعنەوی ڤە،ژبەركو ئاوارێن شنگالێ كەفتینە دناڤبەرا پشتگۆهاڤێتنا حكومەتا عێراقێ و چۆنا رێكخراوان دا.
ئەڤ كێمبوونا رێكخراوان كارتێكرنەكا نەرێنی لسەر ئاواران هەیە وەك،كێمبوونا خزمەتگۆزاریان و پیسبوونا ژینگەها كەمپێ و زێدەبوونا مەترسیێ ل سەر بەلاڤبوونا نەخۆشیان دناڤ ئاوارەیان دا،زێدەبوونا بێكاریێ و كێمبوونا خۆلێن فێركرنێ و زێدەبوونا حالەتێن خۆكوشتنێ دناڤ گەنجان دا.
تُتاح هذه الصورة أيضا في: کوردی