بیرۆكەیا دامەزراندنا دادگەهەكا لۆكال ل جهێ دادگەها نێڤ دەولەتی دئێتە كرن ژبۆ جینۆساید ناساندنا کەیسا کارەساتا ئێزدیا ل شنگال
تۆرا لالش یا راگەهاندنێ
ل رێككەفتی 15/1/2017ێ،شاندەكێ زانا و پسپۆرێن نێڤ دەولەتی ل بوارێ دووڤچوونا تاوانێن جینۆسایدێ سەرەدانا پەرلەمانێ كوردستانێ كر.
پشتی جڤینەكێ دگەل” د.جەعفەر ئیبراهیم ئێمینكی” جێگرێ سەرۆكێ پەرلەمانی،شاندێ ناڤبری دگەل لژنێن پەیوەندیدار و لژنا یاسایی ل پەرلەمانی ،كو پێكهاتیبوون ژبەرێز”شێخ شامۆ”ئەندامێ پەرلەمانێ كوردستانێ و ئەندامێ لژنا جینۆسایدێ یا دەمکی و “د.ڤالا” سەرۆكا لژنا یاسایی ل پەرلەمانی و “خالدە خەلیل”راوێژكار ل پەرلەمانێ كوردستانێ كۆمبوو.
ژئالیێ خۆڤە بەرێز”شێخ شامۆ”و لژنا یاسایی ئاستەنگ و رێكارێن دكەڤنە پێشیا ڤی كەیسی دا دگەل شاندی دانوستاندن كرن،ل ڤی بواری دە “شێخ شامۆ”دوو راپۆرتێن تێر و تەسەل ل سەر ئامارێن گشتی یێن نێزیكی یێن ڤێ كارەساتێ پاشخۆڤە هێلایی ژ كوشتن و گرتنێ و داگیركرنێ و تالانكرنێ و ژناڤبرنا ژێرخانێ ل دەڤەرێن ئێزدیان دڤان بواران دا پێشكێشی شاندی كرن.
دلایەكێ دی یێ كۆمبوونێ دە،چەندین تێبینی و بیروبۆچۆنێن و پێشنیار ل ناڤبەرا ئەندامێن شاندێ مێڤان و لژنا جینۆساید ناساندنا ڤێ كەیسێ و لژنا یاسایی ل پەرلەمانی دەربارەی چاوانیا دووڤچوون و سەرەدەریكرنێ لگەل كەیسێن جینۆسایدێ و بیرۆكەیا دامەزراندنا دادگەهەكا لۆكال ل جهێ دادگەها نێڤ دەولەتی هاتنە كرن،كو ئەركێ دادگەهكرنا تاوانبارێن جینۆسایدێ ئەنجامبدەت ب سەرپەرشتی و مفا وەرگرتن ژشارەزایێن نێڤ دەولەتی.
ل داویێ جەخت ل سەر كارێ هەڤبەش و دروستكرنا گرۆپەكێ كاری و هەماهەنگی ناڤبەرا هەردوو لایان دا هاتە كرن.
بۆ زانین شاندێ زانا و پسپۆرێن نێڤ دەولەتی ل بوارێ دووڤچوونا تاوانێن جینۆسایدێ،پێكهاتبوو ژ دكتۆر “گریگۆری ستانتۆن” مامۆستایێ شارەزا ل ڤەكۆلینێن جینۆساید ل زانكۆیا جۆرج میسون ل ولایەتا ئێكگرتیێن ئەمریكا و خانم ” ئەلیسا یۆدن فۆن فۆركن” جێگرا ئێكێ یا سەرۆكێ هاوبەندا نێڤ دەولەتی یا زانایێن جینۆساید و خانم ” ئیرین فیكتۆریا ماسیمینۆ” مامۆستا ل زانكۆیا بۆینس ئایرس و پارێزەرا نێڤ دەولەتی ل زانستێ جینۆسایدێ.
تُتاح هذه الصورة أيضا في: کوردی