هێزێن نەیاسایی رێگرن ل هەمبەر ڤەگەریانا خەلكێ شنگالێ
تۆرا لالش یا راگەهاندنێ
هێزێن نەیاسایی كچ وزارۆكێن شنگالێ درەڤینن وكارێن خراب ب وان دكن و بووینە رێگر و ئەگەرەكێ سەرەكی،ل هەمبەر ڤەگەریانا خەلكێ بۆ سەر مال و ملكێ خۆ.
قاسم ششو،فەرماندێ فەرماندا شنگال یا پێشمەرگەیێ كوردستانێ دیاركر:”پەكەكە كچ وزارۆكێن شنگالێ درەڤینت وكارێن خراب ب وان دكت ودبەنە قەندیل وتوركیا،لەورا خەلكێ شنگال نكارت مالێن خۆ بینن و ڤەگەرن،ژبەركو ترسا وان ئەوە زارۆكێن وان ببەت،گۆتژی پەكەكە ژبلی گەفا چ كار نەكرینە وبتنێ كارێن نەباش ل قەزایێ دكن و چ دەڤەر ئازادنەكرینە وبتنێ گەنجێن شنگال وهێزێن پێشمەرگەی شنگال رزگاركریە”.
ژبال خۆڤە”نایف سەیدو” رێڤەبەرێ ناوچەدارییا سنوونێ خویاكر:”هەبوونا هندەك هێزێن نەیاسایی ل دەڤەرێ وەك پەكەكێ ترسەكا مەزن لنك خەلكێ پەیداكریە و ب سەدان ترومبێلێن جام رەش بكار دئینن وكەس نزانت كارێ وان چیە،بووینە رێگر و ئەگەرەكێ سەرەكی كو خەلكێ سنوونێ وكۆمەلگەهێن دووروبەر نەڤەگەرنە سەر مال و ملكێ خۆ”.
هەروەسا “ئسماعیل شێخ بحری”مجێورێ میرگەها میر شەرفەدین گۆت:”شنگال جهێ ئێزدیانە و جهێ شەرەف وناموسا مەیە وب سەدان جانگۆری ل بەر ئاخا وێ داینە وئەم چووجارا قەبوول ناكن ئەو هێزێن كو ژدەرڤە هاتین بێژن شنگال یا مەیە ودڤێت قەزایێ چوول بكن”.
پشتی قەزا شنگالێ ل سەر دەستێ هێزێن پێشمەرگەی هاتیە رزگاركرن،خێزانێن ئاوارێن ئێزدی دەست ب ڤەگەریانێ بۆ سەر مالێن خۆ ب تایبەت ل ناوچەدارییا سنوونێ كرن،لێ ب گۆتنا چەند بەرپرسێن قەزایێ نۆكە ژبەر هێزێن نەیاسایی ترس لنك خەلكێ پەیدابوویە و نكارن بزڤرینە دەڤەرێ.
تُتاح هذه الصورة أيضا في: کوردی