شاندەكێ هۆنەرمەندێن ئێزدی ل ئەورۆپا سەرەدانا كوردستانێ دكن بۆ پشتەڤانیكرنا ریفراندۆمێ
تۆرا لالش یا راگەهاندنێ/جەعفەر سمۆ
شاندەكێ ناڤەندا هۆنەرمەندێن ئێزدیان ل ئەورۆپا،سەرەدانا كوردستانێ كرن بۆ پشتەڤانیكرنا ریفراندۆمێ كو چاڤەرێ یە ل 25ڤێ هەیڤێ بێتە ئەنجام دان.
هۆنەرمەند”زەردەشت میردینی”ئەندامێ شاندی دووپات كر كو ئارمانج ژ سەرەدانا وان بۆ كوردستانێ وەك هۆنەرمەند ئەوە بۆ پشتەڤانیكرنا پرۆسا ریفراندۆمێ ل كوردستانێ،ئەڤە پشكەكە ژ ئەركێ نەتەوی و رەوشتیانە هەمبەر كوردستانێ.
هەروەسا دیاركر:” وەك هۆنەرمەندێن ئێزدی ل ئەورۆپا ب گشتی و ئەلمانیا ب تایبەتی ئامادەنە بۆ پشتەڤانیكرنا پرۆسا ریفراندۆمێ ب هەموو هێز و ئالاڤێن لبەر دەست،چنكو ئێزدی پشكەكن ژ نائێنە ڤەقەتاندن ژ نەتەوا كوردی”.
میردینی رۆنكر:”لسەر مە هەموویان پشتەڤانیا ڤێ رۆژا دیرۆكی بكەین،ژبەركو ئەوا گەلێ كورد د درێژاهیا دیرۆكێ دا تووش بوویێ ژ سەدان ئەنفال و فەرمانان،ئەنجام ژبەر نە ئێكرێزیا وان بوو”.
تەكەز كر:”لسەر هەموو پارتێن كوردی پشتەڤانیا ڤێ بوویەرا دیرۆكی بكن كو ژ چەرخەكی وەرە ل هڤیێ،داخوازێ ژ ئێزدیان دكەم پێكۆلێن خۆ زێدەتر بێخنە كار بۆ سەركەفتنا ڤێ پرۆسێ،چنكو ئێزدی گەلەك زەرەرمەند بووینە و پتر ژ پێكهاتێن دیتر ژبەر ئایین و نەتەوا وان،ئەركە لسەر وان هەڤكار بن و ب هەموو هێزا خۆ بۆ سەرئێخستنا ڤێ پرۆسێ”.
بۆ زانین شاندێ ناڤهاتی پێكهاتی بوو ژ هۆنەرمەندان(بەدیل ئبراهیم،زەردەشت میردینی،عەلی روناق،جەگەر خوین ئازاد،ئاوندر ئازاد،شڤان جان).
تُتاح هذه الصورة أيضا في: کوردی