کوردێن ئێزدی: عەیبە دچارچووڤێ دەولەتەکێدا بمینن ھەرچەند سالان جارەکێ کارەساتەکێ بسەرێ خەلکێ مە بینت
باسنيوز:
کوردێن ئێزدی ل ھەموو دەڤەران ئاھەنگ وپشتەڤانیا خوە بۆ رێفراندوما سەربەخۆیا کوردستانێ دیار دکەن و دبێژن وان کەسان چوو سەربوو وشارەزایی نێنە یێن بیژن نەخیر ئەو دێ کارەساتەکا دێ بسەری ئێزدیان ئینن، لەورا گەورە و بجووکێن ئێزدیان دێ بەرەڤ سەندوقێن دەنگدانی چن ب دەنگێ بەلێ بۆ ریفراندوما سەربەخۆیا کوردستانێ دەنگ دەن.
بریڤان سەلیم شەمۆ، نوونەرا کوردێن ئێزدی جڤاتا پارێزگەھا دھۆکێ و جیگرا سەرۆکی جڤاتا پارێزگەھا دھۆکێ، بۆ (باسنیوز) دیار کر: “ب دیتنا من عەیبە ئەم دچارچووڤی دەولەتەکێ دا بمینن ھەر چەند سالان جارەکێ کارەساتەکێ بسەری خەلکێ مە ئێزدی بینت سالە 2007 حکومەتا عێراقی ل سیبا شیخدر و گرعزیر کارەساتەکا مەزن بسەری ئێزدیان ئینا ل سالە 2014ی ژی ھەر حکومەتا عێراقی بوو ئەگەر شنگال تووشی کارەساتەکێ ببیت ئەڤە دماوی ڤان چەند سالاندا دوو کارەسات دناڤ حکومەتا عێراقی دا بسەری مللەتی مە ئێزدی ھاتن”.
جیگرا سەرۆکی جڤاتا پارێزگەھا دھۆکێ، ئاماژە دا وی یەکی ژ: “کوردێن ئێزدی ھەموویان مانا خوە دگەل عێراقی دیتن کا عێراقی چ بسەری کوردێن ئێزدی و ھەموو مللەتی کورد ئینا ل ڤی جاری ئێزدی دەنگدانی دێ خوە ژکارەسات و مالویرانیی رزگارکەن”.
شێخ عیدان کالۆ، رێڤەبەری کاروبارێن ئێزدیان ل دھۆکێ، ب سەر وەزارەتا ئەوقاف و کاروبارێن ئاینی ڤە ھەرێما کوردستانێ، بۆ (باسنیوز) دیار کر: “ھەر کەسەکێ دەنگێ نەخیر دەنگ بدەت، ئەو کەس دێ بیتە ئەگەر کارەساتەکا دێ بسەری کوردێن ئێزدی بھێت، ئەم ھەموو ھێز وشیانێن خوە کار دکەن بۆ زێدەکرنا دەنگین بەلێ بۆ رێفراندوما سەربەخۆیا کوردستانێ چونکو دێ مافێن ئێزدیان ھێنە پاراستن”.
رێڤەبەری کاروبارێن ئێزدیان ل دھۆکێ ب سەر وەزارەتا ئەوقاف و کاروبارێن ئاینی، بۆ (باسنیوز) دیار کر: “ھەر کەسەکێ دەنگی بەلێ بۆ رێفراندوما سەربەخۆیا کوردستانێ دەنگ نەدەت وێ کەسی چوو سەربور نینە وتیگەھشتنا وی گەلەک خەلەت ئەو کەس دێ زارۆک و خێزانا خوە تووشی مالویرانیی کەت پێدڤیە ئەو کەس لینێرینەکێ د خۆە دا بکەت و ب دەنگی بەلێ بۆ رێفراندوما سەربەخۆیا کوردستانێ دەنک بدەن چونکو دێ پاشەرۆژا زارۆکێن خوە کوردستانێ دا مسۆگەر کەت”.
بەھزاد قەوال سلیمان، کەسایەتی کوردێن ئێزدی، دیارکر کو: “دەولەتا کوردستانێ دێ بۆ پاراستنا مافێن ھەموو پێگھاتێن ئاینی و نەتەوەیی ھێتە دروستکرن لەورا ژی دخوازین ھەموو خەلکێ مە دەنگێ بەلێ بۆ رێفراندوما سەربەخۆیا کوردستانێ بدەن، ئەو خیانەت و غەدرا عەرەبان بسەری مللەتی مە ئینایی نابیت بھێتە ژبیرکرن ئەڤە دەم ھات ئەم بریاری ل سەر چارەنڤیسی خوە بدەن ئیتر دگەل عێراقی نەبین چونکو سەردەمێ دامەزراندنا دەولەتا عێراقی ھەتا نوکە کوردێن ئێزدی تووشی مالویرانیی و کارەساتان بووینە”.
نایف سەیدۆ، رێڤەبەرێ ناحیا سنۆنێ، بۆ (باسنیوز) دیار کر: “ئاریشە ئێزدیان ل عێراقی د وی چەندی دایە ئەم کوردن وئەم ئێزدی نە لەورا ئەم ھەردەم تووشی کارەسات و فەرمان دبن ئەز دبینم ململانا سیاسی ل دەڤەرا شنگال چوو کارتیکرنی ل ریژا زێدەکرنا دەنگین شنگالیان ناکەت و گەورە و بجووکێن شنگالیان دێ بەرەڤ سەندوقێن دەنگدانی چن ب دەنگی بەلێ دێ دەنگ دەن”.
خۆیا ژی کر: “حکومەتا عێراقی درێژاھیا میژویی دا شن گال پشتگوە ھاڤتیە ھەتا ئەڤرۆکە ژی بەغدا بۆ شنگال چوو نەکریە ھەر حکومەتا عێراقی سالە 2014ی سەردەمێ مالیکی بوو ئەگەر کچ وژن و زارۆکێن ئێزدیان ل بازاری مووسل و رەقە و تەلەعفەر بھێنە فروتن ھەتا نوکە ژی ھزارەھا دایک چاڤەری ڤەگەراندنا کچ وزارۆکێن خوە رەڤاندی دکەن وچارەنڤیسی وان دیار نینە ئەو دایکا چەرگ سووتی چاڤەری رۆژا 25/9/2017 دکەت بۆ سەربەخۆیا کوردستانێ بۆ تولەڤەکرنا کچ و زارۆکێن خوە ژ دوژمنان”.
تُتاح هذه الصورة أيضا في: کوردی