ئێزدیان زێدەتر ژ 50 بەربژێران بۆ هەلبژارتنێن پەرلەمانێ عێراقێ هەنە
تۆرا لالش یا راگەهاندنێ/لەیت حسێن
بۆ هەلبژارتنێن داهاتی یێن پەرلەمانێ عێراقێ كو بریارە ل رۆژا(12/5/2018) بێنە ئەنجام دان، ئێزدیان زێدەتر ژ(50)بەربژێران هەنە بۆ بەشداریكرنێ دهەلبژارتنان دا،هەروەسا چەند تەخ و چینێن جودا بەشداریا ئێزدیان د هەلبژارتنان دا ب پێنگاڤەكا گرنگ و چارەنڤیساز ل قەلەم ددەن.
(هادی سەعدۆ)گەنجەكە دیاركر،ئەم دبینن دەربازبوونا ئێزدیان بڤێ ژمارا مەزن یا بەربژێران بۆ هەلبژارتنان دۆراندنەكا مەزنە ل پێشیێ و وندابوونا هەزاران ژ دەنگێ ئێزدیانە،وەك ئەم دزانن ئەم وەك كێمینەیا ئێزدیان ب زەحمەتە هندە كورسیان ب دەستڤە بینن هەكە هات و ژمارا بەشداریكرنا عێراقیان ب شێوەكی مەزن بت، هەروەسا هەبوونا ئێزدیان ل بەغدا ب چەندین كورسیان گەلەك یا گرنگە ل دەما داهاتی دا ژبۆ ب دەستڤەئینانا هندەك ژ مافێن ئێزدیان.
هەروەسا(سەعەد حەمۆ)گەنجەكی دی یێ ئێزدی یە دبێژت:نە ئێكبوونا مە دێ بتە ئەنجامەكی نەباش و دەنگێن ئێزدیان دناڤبەرا ڤێ ژمارا بەربژێران دا دێ ئێنە ونداكرن،ئەم ب سیستەمێ عەشیرەتیێ ڤە دگرێداینە كو هەر كەس دێ دەنگ ب كەسەكی نێزیكی خۆ دەت.
وەلاتی(ناسر جندی)خویاكر،بۆ هەلبژارتنێن پەرلەمانێ عێراقێ یێن بێت ئێزدی پێتڤی وی كەسی نە كو نوونەراتیا وان ل پەرلەمانی دا بكت و دەنگێ وان بگەهینت.
ژبال خۆڤە(مەحمود بەرغشی) رەوشەنبیرەكی ئێزدی یە دبێژت: بێگۆمان پرۆسا هەلبژارتنێن پەرلەمانێ عێراقێ یێن داهاتی پێنگاڤەكا گرنگ و چارەنڤیسیە بۆ مە ئێزدیان ژبۆ كو ئەم پلانەكا خۆ یا پاشەرۆژێ دانن،بەشداریا ئێزدیان ل ڤان هەلبژارتنان دا ب پێنگاڤەكا گەلەك گرنگ دئێتە دانان ل قۆناغەكا گرنگ و ب زەحمەت دا و ئەو قۆناغا پشتی داعشێ یە و ب تایبەت ژی پتریا ئێزدیان ل كەمپان دا ئاكنجینە و لاپەرێن كەیسا ئێزدیان هەر وەك خۆنە و تشتەك نینە ب راستی لسەر ئەردێ، ژبەر ڤێ چەندێ لسەر ئێزدیان پێتڤی یە هزر ل هەلبژارتنا بەربژێران بكن و هەلبژارتنا وان نە لسەر بنەمایێ عەشیرەتیێ بت بەلكو لسەر بنەمایێ روەشەنبیری بت و وی كەسی هەلبژێرن یێ باش بت و بكارت نونەراتیا وان بكت و دەنگێن وان بێ بەها نەكەت،ژمارا بەربژێرێن ئێزدی زێدەتر ژ(50) بەربژێری یە و ئەگەرا ڤێ چەندێ نەبوونا جیەكی یان ئالیەكی یە كو نوونەراتیا هەموویان بكت،ژبەركو هەر ئالیەك دگەل حزبەكا بەرچاڤكری یان دەست نیشانكری یە و بەرژەوەندیێن تاكەكەسی لسەر بەرژەوەندیا ئێكەتیا ئێزدیانە.
ژلایەكی دی ڤە (مازن شنگالی) رۆژنامەڤانەكی ئێزدی یە خویاكر،ئەڤ ژمارا زێدە یا بەربژێرێن ئێزدی نە دبەرژەوەندیێن ئێزدیان دایە ژبەركو دێ بنە ئەگەرێ وێ یەكێ دەنگێن ئێزدیان بێنە بەربەلاڤكرن و ڕەنگە زۆریا ڕێژا بەربژێران ببتە ئەگەرێ سەركەفتنا ژمارەكا كێم یا بەربژێران،بێگۆمان بەشداریكرنا گەلێ ئێزدی د دەنگدانێ دا تشتەكی مێژوویی و گرنگە ژبەر چەند ئەگەران ژوانا هەلبژارتنێن جڤاتا نوونەرێن عێراقێ نە و هەبوونا هندەك كەسێن خودان شیان یێن ئێزدی د حەرەما پەرلەمانێ عێراقێ دڤێ قۆناغا نازك یا رەوشا ئێزدیان دا تشتەكی فەر و گرنگە،لێ پێتڤیە ئەڤ جارە ئێزدی دوور ژ هەڤالینی و عەشیرەتیێ دەنگ بدەن و وان كەسان هەلبژێرن ئەوێن خودان باگڕەوەندێن باش و بزانن كو ئەو دێ كەیسا ئێزدیان بەرەف پێشڤەبن،دنهۆ دا خەلكێ ئێزدی درەوشەكا تایبەت و ب زەحمەت دا دژین دناڤا چادران دا و پێتڤیە ئەو كاندیدێن ئێزدی یێن بسەر دكەڤن ئێكەم كارێ وان ئەو بت شنگال بێتە ئاڤەدانكرن و پاراستنا ئێمناهییا وێ دەڤەرێ بێتە بەردەست كرن وگرەنتیا وێ یەكێ ب خەلكێ ئێزدی بێتە دان كو چوو كارەساتێن دی دوبارە نەبن تا كو خەلك بكاربن ڤەگەرنە سەر ملك ومالێن خۆ.
ژ ئالیەكی دی ڤە چالاكڤانێ ئێزدی(ئیبراهیم ئەلقیرانی)دیاركر،نهۆ ئەم ل قۆناغەكا پر ب زەحمەت دا دبۆرن و ب تایبەتی ژی دگەل بەربژێركرنا ڤێ ژمارا مەزن یا كەسان و دناڤ لیستێن جێواز و مەرەم ژێ ئەوە دیسان دەنگێ ئێزدیان وندا بكن و هەموو دەنگێن مە بۆ یێن دی بچن،لەوما ژی لسەر مە پێتڤی یە ب هزرەكا مەزن سەرەدەریێ دگەل رەوشێ بكن و تەكەزێ لسەر ژمارەكا كەسێن باش و دووركەڤن ژ عەشیرەتیێ بكن،ژبەركو ب دیتنا من عەشیرەتی ژی جۆرەك ژ یێن توندرەویێ یە و ئەگەر مە تەكەز بۆ دەنگدانێ كر ژڤی دەرگەهی ئەم ژبلی كورسیەكێ ب دەستڤە نائینن،ژبەركو مە ئەزموونا هەلبژارتنێن چۆی ژی دیتیە و ب ڤان هزران ئەم وەك شنگالی دگەل شێخان نكارن ژبلی كورسیەكێ ب دەستڤە بینن كو ببتە لسەر كوتا ژنان،ئەگەر مە ئامارەكا بچووك لسەر ژمارا كورسیێن پارێزگەها نەینەوا كر كو گەهشتینە 34 كورسیێن پەرلەمانی كو3 ژ وان پشكا كوتاینە و ٦ ژ وان پشكا كوتا یا ژناینە،بەلێ ئەو كورسیێن دی یێن ماین نێزیكی( 700)بەربژێر هەڤركیێ لسەر دكن،لەوما ژی لسەر مە پێتڤیە ئەم تەكەزێ لسەر كەسەكی بكن كو هندەك رەوشەنبیری و هزری و دیتنەك لسەر كەتوارێ سیاسی هەبت یێ كو ئێزدی تێدا دبۆرن ب شێوەیەكی گشتی.
تُتاح هذه الصورة أيضا في: کوردی