ماكس بریموراك:ئەمریكا ل ئاستەكی بلند كار لسەر كەیسا ئێزدیان كریە
تۆرا لالش یا راگەهاندنێ/ههولێر
نوونەرێ تایبەتێ كۆچكا سپی دجڤینەكێ دا لگەل چەندین دەزگەه و ئۆرگانێن راگەهاندنێ یێن كێمینەیان ل هەولێرێ راگەهاند،ئەمریكا ل ئاستەكی بلند كار لسەر كەیسا ئێزدیان كریە و دێ بەردەوام بت،ئاشكەراكر ژی ل دەمەكی نێزیك رێیا دناڤبەرا شنگال و دهۆكێ دا دێ ئێتە ڤەكرن.
لسەر داخوازیا نوونەرێ تایبەتێ كۆچكا سپی كو بەرپرسە لسەر پرۆژێن هاریكاریكرنا كێمینەیێن عێراقێ چەندین دەزگەه و ئۆرگانێن راگەهاندنێ یێن كێمینەیان هاتبوون بانگەهێشتكرن و جڤینەك هاتە ل دارخستن و گەنگەشە لسەر چەندین بابەتێن گرێدایی كێمینەیێن سنوورێ پارێزگەها نەینەوا هاتە كرن.
ماكس بریموراك، نوونەرێ تایبەتێ كۆچكا سپی و بەرپرس لسەر پرۆژێن هاریكاریكرنا كێمینەیێن عێراقێ بەحس ل تەرخانكرنا كوژمەكی دراڤی بۆ دروستكرنا قوتابخانە و بنگەهێن تەندروستی وپرۆژەیێن خزمەتكاری كر وداخوازكر ئەڤ دەزگەهێن راگەهاندنێ رۆلێ خۆ بگێرن ل چاڤدێریكرنا ڤان پرۆژەیان.
هەروسا دیاركر:”ئەمریكا بەردەوام لسەر خەتێ بوویە بۆ ڤەكرنا رێیێن ناڤبەرا پارێزگەهێن هەرێما كوردستانێ و نەینەوا دا و ل چەند رۆژێن بۆری دا چەندین رێ هاتنە ڤەكرن،ل دەمەكی نێزیك رێیا دناڤبەرا شنگال و دهۆكێ دا دێ ئێتە ڤەكرن داكو ب ئاسانی دەستێ مە بگەهتە وان دەڤەران و پرۆژەیێن خۆ لێ ئەنجام بدەین”.
د تەوەرەكی دی یێ جڤینێ دا دەرگەهێ ئاراستەكرنا پرسیار وپێشنیاران هاتە ڤەكرن كو نوونەرێ دەستەیا بلندا بنگەهێ لالش و بەرپرسێ نڤیسینگەها لالش ل هەولێرێ بەرێز”عەزیز شەركانی”سوپاسیا رووخساندنا ڤێ دەرفەتێ كر وئامادەیا بنگەهێ لالش نیشان دا بۆ هەر هاریكاریەكێ دخزمەتا پێكهاتەیێن كێمینە دا بت و ب تایبەت ئێزدیان و پرسیارا وێ یەكێ كر كو ئەمریكا هەتا چەند كار لسەر كەیسا ئێزدیان كریە ب تایبەت ڤەگەریانا ئارامیێ بۆ دەڤەرێن وان و گرتیێن دەستێ داعشێ دا،ل بەرسڤێ دا”ماكس بریموراك” راگەهاند ئەمریكا لسەر ئاستەكی بلند كار لسەر كەیسا ئێزدیان كریە و دێ بەردەوام بت،گۆتژی بێگۆمان ئەڤە پرسیارەكە گرنگە و مە هزرا وێ یەكێ كریە ژبەركو چ پرۆژەیەك ب سەركەفتیانە نائێتە ئەنجام دان هەتا كو ئارامی ل دەڤەرێ بەرقرارنەبت ئەم ژی دەربارەی ڤێ مژارێ ل پەیوەندیان دانە دگەل حكومەتا عێراقێ.
تُتاح هذه الصورة أيضا في: کوردی