تەرمێ میر تەحسین بەگ ھاته ڤەشارتن
WAAR-دهۆك:
تەرمێ میرێ ئێزدییان ئه‌ڤرۆ د رێورەسمەکێ ئۆلی دا ل مالا وى ل شێخان هات ڤەشارتن، بەھیا وی ژی ھەر ئەڤرۆ دێ ھێت دانان.
ھنارتیێ وار ل شێخان راگه‌هاند؛ سعه‌ت یازده‌ى سپێدێ رێورەسمێن ئۆلی ژبۆ ڤەشارتنا تەرمێ میر تەحسین بەگی، میرێ ئێزدییان ل کوردستانێ و جیھانێ، دەستپێکرن، د وان رێورەسمان دا، قەول و دوعایێن تایبەت ب ڤەشارتنا میران د ئێزدییاتیێ دا، ژ ئالیێ قەولبێژان ڤە ھاتن گۆتن.
دیار ژی کر، ژماره‌یه‌كا مه‌زن یا به‌رپر و نوونه‌رێن ئالیێن سیاسى و كه‌سایه‌تیێن ئۆلى و جڤاكى و خه‌لكێ ده‌ڤه‌رێ پشكدارببوون و ھەر ئەڤرۆ دێ رۆژا ئێکێ یا بەھیێ ل ھۆلا شێخان هێته دانان و بۆ دەما حەفت رۆژان یا به‌رده‌وامبیت.
تەرمێ میرێ ئێزدییان، دوھی ب رێیا فرۆکخانەیا نێڤدەولەتییا ھەولێرێ گەھشتبوو ھەرێما کوردستانێ و د رێورەسمەکێ مەزن دا پێشوازی لێ ھاتبوو کرن.
میر تەحسین بەگ، ل ٢٨ مەھا بۆری ل نەخۆشخانەیەکا باژێرێ ھانۆڤەر ل ئەلمانیا د ژیێ ھەشتێ و شەش سالیێ دا وەغەرا داویێ کربوو.
تُتاح هذه الصورة أيضا في: کوردی