شێخ شامۆ: شنگال بوویە مەیدانەكا موخابراتی یا بازاركرنێ
باسنيوز:
سەرۆكێ دەستەیا بلندا بنگەهێ لالش یێ رەوشەنبیری و كۆمەلایەتی دیار كر گرۆپێن نها ل شنگال ب كراسەكێ دی هاتینە ناڤ شنگالدا و هاتینە چێكرن بۆ جوداكرنا ئێزدیان ژ نەتەوا وان كوردی و جوداكرنا شنگال ژ كوردستانێ.
شێخ شامۆ، سەرۆكێ دەستەیا بلندا بنگەهێ لالش یێ رەوشەنبیری و كۆمەلایەتی و شیرەتكارێ سەرۆك وەزیری هەرێما كوردستانێ بۆ كارۆبارێن ئێزدیان بۆ (باسنیوز) دیار كر: “تەناهیا جڤاكێ و ئەمنی وسیاسی ل شنگال نینە، هەموو بووینە گرۆپ بۆ مەرەمێن خوە سیاسی كاردكەن. هەر گرۆپەكێ ژی دەستهەلاتا خوە هەیە و شنگال بوویە مەیدانەكا موخابراتی یا بازاركرنێ ل سەر چارەنڤیسێ شنگال. ئەڤە ژی لێدانا تایبەتمەندیا ئێزدیان ل شنگال دهێتە كرن. هندەك ئەجندایێن سیاسی ل پشت وان گرۆپێن شنگال هەنە بۆ بێ بهاكرنا خەلكێ مە. راستی ژی ئەڤە جهێ قەبوولكرنی نینە ئەركێ حكومەتا عێراقێ یە رابیت دگەل هەرێما كوردستانێ ب زووترین وەخت رەوشا شنگال چارەسەر بكەت ڤێ ململانا خراب قورتال بكەن چونكو هەكە شنگال وەسا بمینت دێ ئالوزیێن مەزنتر بۆ خەلكێ شنگال دروست بن”.
خویا ژی كر: “ئەڤ پێنگاڤێن ل شنگال دهێنە هاڤیتن دێ بنە ئەگەر شنگال بەرەڤ چارەنڤیسەكێ تاری بچیت ونابیت شنگال ب هیڤیا ڤان گرۆپان ڤە بهێتە هێلان. پێدڤیە سنۆرەك بۆ ڤان گرۆپان بهێتە دانان وشنگال چۆل بكەن ب هەر رێكەكا هەبیت”.
تُتاح هذه الصورة أيضا في: کوردی