بەرپرسێ بنگەهێ لالش تایێ سنوونێ:
بنگەهێ لالش و هۆلێن لالش ل سنوونێ ژلایێ پەكەكێ ڤە هاتینە داگیركرن
تۆرا لالش:
بەرپرسێ بنگەهێ لالش تایێ سنوونێ ئاشكەراكر،كو رەوشا شنگال رۆژ بۆ رۆژێ خرابتر لێهاتیە و بەرەف تاریێ ڤە دچە،وەكو بنگەهێ لالش پێنگاڤێن خۆ ب هشیاری و ترس دهاڤێژن ل شنگال و ئاڤاهیێ بنگەهێ لالش و هۆلێن لالش و بیرەوەریان ژلایێ پەكەكێ ڤە هاتینە داگیركرن.
سلێمان فانۆ، بەرپرسێ بنگەهێ لالش تایێ سنوونێ بۆ رۆژناما دەنگێ لالش راگەهاند،وەكو بنگەهێ لالش تایێ سنوونێ و نڤیسینگەهێن بسەر ڤە ئەم دبینن بارودۆخێ شنگال ب شێوەكی گشتی گەلەكێ خرابە و رۆژ ب رۆژ بتر بەرەف تاریێ ڤە دچە ژبەر گەفێن تووركیا و ئیرانێ كو ئارمانج ژێ نەهێلانا سەقامگیریێ یە ل شنگال،ژبەر وێ یەكێ ب راستی خەلكێ مە درەوشەكا تەنگاڤدایە و ئەم هەموو بێ ئۆمێد بووینە و شنگال ئارامی و تەناهیێ بخۆ ڤە نابینتە و گۆت:(( وەكو بنگەهێ لالش پێنگاڤێن خۆ ب هشیاری و ترس دهاڤێژن ل شنگال و ئاڤاهیێ بنگەهێ لالش ل سنوونێ ژلایێ هندەك لایەنێن سەر ب پەكەكێ ڤە هاتیە داگیركرن،هۆلێن لالش و یێن بیرەوەریان ژی ل هندەك كۆمەلگەهان ژئالیێ داعش ڤە هاتیە پەقاندن و سۆتن و یێن ماین ژی بتریا وان نهۆ د دەستێ داگیركەرا و ب تایبەت دەستێ وان لایەنێن سەر ب پەكەكێ ڤە دایە،لەوا ئەم نكارن چ جاران كار و چالاكیان تێدا بكن و نڤیسینگەهێن خۆ یێن لالش تێدا ڤەكەین)).
سلێمان فانۆ دووپاتكر،هەكە بارودۆخێ شنگال بڤی ئاوایی بچت،خەلكێ ڤەگەریایە شنگال دێ نەچار بت شنگالێ چۆل بكن و جارەكا دی دەست ب ئاوارەبوونا بەروڤاژی بۆ ناڤا كەمپان بكن.
تُتاح هذه الصورة أيضا في: کوردی