ئیدریس زۆزانی: پەكەكێ چەكدارێن خۆ ژ سوریا ئیناینە شنگال
باسنيوز:
بەرپرسێ نڤیسینگەها رەوشەنبیری و راگەهاندنا لقێ 17 پارتی ل قەزا شنگال دیار كر پەكەكێ چەكدارێن خۆ ژ وەلاتێ سوریا ئیناینە شنگال. مەرەما وان ئەوە شنگال چۆل نەكەن، نۆكە رەوشا شنگال بەرەڤ پەقینێ چوویە.
ئیدریس زۆزانی، بەرپرسێ نڤیسینگەها رەوشەنبیری و راگەهاندنا لقێ 17 پارتی ل قەزا شنگال بۆ (باسنیوز) راگەهاند كو: “دڤان رۆژێن بۆریدا پەكەكێ گەلەك چەكدارێن خۆ ژ وەلاتێ سوریا ئیناینە شنگال ولڤینێ دكەت. مەرەما وان ئەوە شنگال چۆل نەكەن ئەڤە بویە ئەگەر رەوشا شنگال بەرەڤ پەقینێ بچیت. نۆكە ئیران و عێراق و حەشدا شەعبی وپەكەكێ هەموو هەولدەن تەناهی ل شنگال پەیدا نەبیت وبەردەوام ب رێیا پەكەكێ گەفان دكەن و بێژن ئەم شنگال چۆل ناكەن. نۆكە شنگال وەكو ئاگری لێهاتیە، رەوش زۆر ئالوز بوویە”.
ئاشكەرا كر: “بۆ بەرژوەندیێن خۆ یێن تایبەت حەشدا شەعبی وپەكەكە ناهێلن تەناهی ل شنگال پەیدابیت. ئەڤە دەمەكە پەكەكە دەست ب لڤینا چەكدارێن خۆ دكەت هەتا ژی پەكەكێ چەكدارێن خۆ ژ سوریا ئیناینە شنگال ب تایبەتی ژی دناڤ چیایێ شنگال دا وچەكدارێن خۆ بەلاڤكرینە”.
حسێن حەسەن نەرمۆ، پەرلەمانتارێ یەكێتی ل جڤاتا نوونەرێن عێراقی بۆ (باسنیوز) دیار كر: “هەكە حكومەتا عێراقی یا رژد بیت راستی ژی پەكەكە ل شنگال نامینت چونكو بەرژوەندی دگەل ئێك هەنە هەكە بەغدا مۆچێ چەكدارێن پەكەكێ ل شنگال نە مەزێخت بێگومان پەكەكە ژی نەشێت دەستێ خۆ وەسا خراب دانتە سەر شنگال “.
ئاشكەرا كر: “رێكەفتنا شنگال كلیلا چارەسەركرنا هەموو ئاریشەیێن شنگالێ یە، گەلەك یا گرنگە رێكەفتنا دناڤبەرا حكومەتا هەرێما كوردستانێ و عێراقێ دا بۆ باشكرنا رەوشا شنگال بجه بهێت ل ڤێدەرێ ژی پێدڤیە بەغدا پێنگاڤیێن رژدتر بهاڤێت چونكو راستی ژی گونەھە رێكەفتنا شنگال نەهێتە بجه ئینان داكو ئالوزی ل شنگال بدووماهی بهێن”.
تُتاح هذه الصورة أيضا في: کوردی