تووتنا گەلیێ كەرسێ ناڤ و دەنگیا خۆ ل كوردستانێ و عێراقێ هەیە
تۆرا لالش:
تووتنا گەلیێ كەرسێ ژ باشترین و ب ناڤ و دەنگترین جۆرێن توونێ یە ل كوردستانێ و عێراقێ،سێ جۆرێن تووتنێ ل گەلیێ كەرسێ دئێنە چاندن ژ وان ژی تووتنا تۆڤێ حكوومی كو ژ هەموو جۆرێن دی یێن تووتنێ باشتر و چێترە و بتر تێتە فرۆتن،بارا بتر كەسێن دانعەمر ڤێ تووتنێ بكاردئینن و گرنگیێ ددەنێ ژبەر ناڤ و دەنگیا وێ.
فەقیر عەمو،ئێك ژ جۆتیارێن گوندێ كەرسێ یە ل شنگالێ سالانە بەرهەمێ تووتنێ هەبوویە بۆ رۆژناما دەنگێ لالش دیاركر،تووتنا گەلیێ كەرسێ ژ باشترین و ب ناڤ و دەنگترین جۆرێن توونێ یە ل كوردستانێ و عێراقێ،جیێ چاندنا توونێ ل گەلیێ كەرسێ ژ كەڤن دا یێ دیار و بەرجاڤە پشتی وەرزێ زڤستانێ ب داوی تێت و دبتە سەرێ وەرزێ بەهارێ خەلكێ دەڤەرێ دەست ب چاندنا توونێ دكن،پاشی ل سەرێ هەیڤا گولانێ عەردێ دروست دكن ب شێوێ هێلێن راست و درێژ و ئاڤ ددەن و شتلێن تووتنێ تێدا تێنە چاندن و هەر هەشت رۆژان جارەكێ تێنە ئاڤدان و دئێتە چاڤدێریكرن ژ ئالیێ خودانی ڤە هەتا دەمێ چنینێ،هەكە كێم بێتە ئاڤدان تامە وێ خۆشتر و شیرینترە،نەخاسمە ئەگەر گەلەك بێتە ئاڤدان تووشی زیان گەهاندنێ دبت و پاشی هشك دبت،پشتی بۆرینا نێزیكی پێنجی رۆژان كولیلكا تووتنێ ژلایێ جۆتیاران ڤە دئێتە برین.
وی جۆتیاری خویاكر ژی ل دەستپێكا وەرزێ پایزێ تووتنا گەلیێ كەرسێ دئێتە چنین و ب سێ قۆناغا دەست پێ دكت،پشتی چنین ب داوی دئێت دبەینە مال و د كەبسینن هەتا زەر دبت پاشی ب سەر قیتكە دا دكن بۆ ماوێ دەه رۆژان تا هشك دبت و بەری ببنە ناڤ مالێ هندەك ئاڤێ لێ درەشینین هەتا كو رتوبە پێڤە بمینت و پشتی هنگی دبەینە مال دكەین تاخ د كەبسینن بۆ ماوێ دوو رۆژان،پاشی بۆ فرۆتنێ دئێتە ئامادەكرن و ب خلیلیە دئێتە فرۆتن و هەر خلیلیەك دوو كیلۆیە و ب چل هەزار دیناران ل بازاری دئێتە فرۆتن.
ناڤهاتی گۆتژی سێ جۆرێن تووتنێ ل گەلیێ كەرسێ دئێنە چاندن ئەو ژی تووتنا(تۆڤێ حكوومی،بەلوت،بناڤی)،لێ تووتنا تۆڤێ حكوومی ژ هەموو جۆرێن دی یێن تووتنێ باشتر و چێترە و بتر تێتە فرۆتن،چنكو پەلگێن وێ د زەهڤن و قەبارێ وێ یێ ناڤنجی یە و تام خۆش وشرینە،بارا بتر كەسێن دانعەمر ڤێ تووتنێ بكاردئینن و گرنگیێ ددەنێ ژبەر ناڤ و دەنگیا وێ،هەتا گەلەك جاران ناڤێ وێ د ستران و دوركێت فلكلۆری دا هاتیە گۆتن،هەروەسا گەلەك جارا دانعەمر ب پیرێ تووتنێ سوند دخۆن.
تُتاح هذه الصورة أيضا في: کوردی