قایمقامێ شنگالێ: حکومەتا ئیراقێ کار ل سەر خودانکرنا خێزانێن داعشێ دکەت
گاڤ نیوز
قایمقامێ شنگالێ و ئەندامێ بەرێ یێ پەرلەمانێ ئیراقێ داخواز ژ حکومەتا ئیراقێ کر ناسنامەیێن ئیراقی ژ هەمی وان چەکدارێن داعشێ وەربگرن یێن ژ کەمپا هۆلێ ڤەگوهاستینە نەینەوا.
مەحما خەلیل بۆ گاڤ گۆت: زێدەتر ژ 100 خێزانێن داعشێ ژ کەمپا هۆلێ یا رۆژئاڤایێ کوردستانێ بۆ پارێزگەها نەینەوا هاتینە ڤەگوهاستن، 22 ژ وان خێزانان خەلکێ نەینەوا نە و 88 خێزانێن دی ژی خەلکێ دەڤەرێن دی یێن ئیراقێ نە.
هەروەسا گۆت: ڤەگوهاستنا وان چەکداران د رێکا شنگالێ دا بێرێزیە ل هەمبەر خەلکێ شنگالێ و بێرێزیە ل هەمبەر شەهید و قوربانیێن وێ دەڤەرێ.
هەروەسا دیار کریە کو هەمی وەلاتێن جیهانێ رازی نەبوون چەکدارێن خۆ یێن داعشێ وەرگرن و ناسنامەیێن وان راگرتینە، لەورا داخوازێ ژ حکومەتا ئیراقێ دکەین ناسنامەیێن وان چەکدارێن ئیراقی ژی رابگرن.
مەحما خەلیل هوشداری ژی دان کو تا نوکە هزرا تیرۆ و توندوتیژی د سەرێ وان خێزانان دا مایە و ئینانا وان ب ڤی رەنگی بۆ ئیراقێ رێخۆشکرنا وێ هزرا توندە و داعش دێ ب رێکا شانەیێن خۆ یێن نڤستی دوبارە خۆ بهێز ئێخیت.
قایمقامێ شنگالێ رەخنە ل وەزارەتا کوچ و کۆچبەرێن ئیراقێ ژی گرت و گۆت: ل شوینا کو ئەو وەزارەت رەڤاندیێن ئێزدی رزگار بکەت، کار ل سەر خودانکرنا خێزانێن داعشێ دکەت.
تُتاح هذه الصورة أيضا في: کوردی